Prezident İlham Əliyevin “Azərbaycan Respublikasında əhalinin sağlamlığının qorunması və koronavirus infeksiyasına qarşı mübarizənin gücləndirilməsi ilə bağlı tədbirlər haqqında” 2020-ci il 19 mart tarixli Fərmanına əsasən yaradılan Koronavirusla Mübarizəyə Dəstək Fonduna cəmiyyətin müxtəlif sferalarından maliyyə yardımları köçürülür və ianələr edilir. Maraqlıdır ki, yardımlaşma, maddi dəstək prosesinə qoşulanların sırası günü-gündən genişlənir. Artıq bu prosesə bölgələrdəki mədəniyyət ocaqları, teatrlar da qoşulublar.
Qax Dövlət Gürcü Dram Teatrından aldığımız məlumata görə, teatrın direktoru Zita Xəlilova Koronavirusla Mübarizəyə Dəstək Fonduna 2000 manat vəsait köçürüb.
Paytaxt teatrları ilə müqayisədə daha az vəsait qazanan bölgə teatrları bu prosesə qoşulubsa, paytaxt teatrları nə üçün bu istiqamətdə addımlar atmırlar?
Mövzu ilə əlaqədar bir neçə teatrla əlaqə saxladıq.
- Cavid Zeynallı: “Teatrın bədii rəhbər-direktoru, Xalq artisti Azər Paşa Nemətovun və kollektivi adından martın 25-də Koronavirusla Mübarizəyə Dəstək Fonduna ianə edilib”
Akademik Milli Dram Teatrının mətbuat xidmətinin rəhbəri Cavid Zeynallı baki-xeber.com-a bildirdi ki, təmsil etdiyi teatr artıq təşəbbüsə qoşulub və Koronavirusla Mübarizəyə Dəstək Fonduna vəsait köçürüb. “Teatrın bədii rəhbər-direktoru, Xalq artisti Azər Paşa Nemətovun və kollektivi adından martın 25-də Koronavirusla Mübarizəyə Dəstək Fonduna ianə edilib” - deyə qeyd edən C.Zeynallı, həmçinin, bildirdi ki, teatrın direktoru və bədii rəhbəri A.P.Nemətov rəhbərlik etdiyi teatrın kollektivi adından koronavirusdan əziyyət çəkən insanlara şəfa diləyib və insanları özünü qorumağa, dövlətin müəyyən etdiyi qaydalara ciddi əməl etməyə çağırıb: “Koronavirusla Mübarizəyə Dəstək Fondunun yaradılması və ora olan ianələr bizim birliyimizin, həmrəyliyimizin göstəricisidir. Bu, dövlətimizin öz vətəndaşlarının sağlamlığına böyük qayğısının bariz nümunəsidir. Həmvətənlərimiz ianələr etməyə, xəstələrə maddi və mənəvi yardımlar göstərməyə böyük istəklə qoşulurlar. İnanıram ki, dövlətimizin böyük köməyi, vətəndaşlarımızın həmrəyliyi nəticəsində bu pandemiyadan əziyyət çəkən insanlarımız tezliklə öz sağlamlıqlarına qovuşacaqlar”.
Azərbaycan Teatr Xadimləri İttifaqı Koronavirusla Mübarizəyə Dəstək Fonduna vəsait köçürüb. Teatr Xadimləri İttifaqının sədri, Xalq artisti Azər Paşa Nemətov bildirib ki, Azərbaycan Respublikasında koronavirus infeksiyasının yayılmasının qarşısının alınması və onunla mübarizə istiqamətində səhiyyə tədbirlərinin həyata keçirilməsi məqsədilə Azərbaycan Respublikası Prezidentinin 19 mart tarixli Fərmanına əsasən yaradılan Koronavirusla Mübarizəyə Dəstək Fonduna ianə edilib.
- Pərvin Nurəliyeva: “Dövlət Gənc Tamaşaçılar Teatrı tərəfindən çağdaş dünyanın ən böyük bəlası olan koronavirusla mübarizə üçün müəyyən miqdarda vəsait Koronavirusla Mübarizəyə Dəstək Fonduna köçürülüb”
Azərbaycan Dövlət Gənc Tamaşaçılar Teatrının mətbuat xidmətinin rəhbəri Pərvin Nurəliyeva dabizimlə söhbətində teatrın təşəbbüsə qoşulduğunu dedi. “Dövlət Gənc Tamaşaçılar Teatrı tərəfindən çağdaş dünyanın ən böyük bəlası olan koronavirus ilə mübarizə üçün müəyyən miqdarda vəsait ölkə başçısının "Azərbaycan Respublikasında əhalinin sağlamlığının qorunması və koronavirus infeksiyasına qarşı mübarizənin gücləndirilməsi ilə bağlı tədbirlər haqqında” 2020-ci il 19 mart tarixli Fərmanına əsasən yaradılmış Koronavirusla Mübarizəyə Dəstək Fonduna köçürülüb
P.Nurəliyevanın verdiyi məlumata görə, teatr rəhbərliyi və kollektiv ölkə Prezidentinin başlamış olduğu bu nəcib təşəbbüsə məmnuniyyətlə qatılıblar. “Gənc Tamaşaçılar Teatrı cənab Prezidentin müəllifi olduğu bu nəcib təşəbbüsə artıq qoşulub” - deyə o bildirdi. Teatrın mətbuat xidmətinin rəhbəri, həmçinin, teatrın rəsmi internet səhifəsində tamaşaçıları həmrəyliyə, Operativ Qərargahın sosial izolyasiya qaydalarına əməl etməyə çağıran müraciət yayımlandığını dedi. Müraciətdə dövlətimiz və onun strukturlarının virusa qarşı yönəlik tədbirlərinin öz müsbət nəticələrini verəcəyinə və xalqımızın tezliklə bu bəladan xilas olacağına inam ifadə olunub. Artıq teatrın sevilən aktyorlarının iştirakı ilə sosial şəbəkələrdə #evdəqal aksiyası çərçivəsində videoçarxların yayımlanması reallaşdırılıb. “Teatrımızın sevilən sənətkarları öz evlərindən “Evdə qal” aksiyasına qoşulublar və aksiya çərçivəsində müxtəlif şairlərin şeirlərindən parçalar səsləndirirlər. Sonda böyük şairimiz Mikayıl Müşfiqin “Yenə o bağ olaydı” şeirini səsləndiriblər. Bu sınaq günlərində şeirin hər misrası ümid verir, insanı gələcək haqqında nikbin düşünməyə sövq edir” - deyə P.Nurəliyeva qeyd etdi.
- Azərbaycan Dövlət Akademik Musiqili Teatrı da Koronavirusla Mübarizəyə Dəstək Fonduna ianə edib
Azərbaycan Dövlət Akademik Musiqili Teatrı dünyanı cənginə alan koronavirus pandemiyasının ölkə ərazisində yayılmasının qarşısının alınması, vətəndaşların sağlamlığının qorunması məqsədilə Azərbaycan Respublikasının Prezidenti İlham Əliyevin sosial həmrəylik nümayiş etdirilməsi barədə tövsiyələrinə uyğun olaraq irəli sürdüyü təşəbbüsə qoşulub.
Bu barədə bizə teatrın mətbuat xidmətindən bildirilib. Məlumat verilib ki, teatr rəhbərliyinin aylıq əməkhaqqından könüllülük prinsipi əsasında ayırdığı vəsait ölkə başçısının "Azərbaycan Respublikasında əhalinin sağlamlığının qorunması və koronavirus infeksiyasına qarşı mübarizənin gücləndirilməsi ilə bağlı tədbirlər haqqında” 2020-ci il 19 mart tarixli Fərmanına əsasən yaradılmış Koronavirusla Mübarizəyə Dəstək Fonduna köçürülüb.
- “Yuğ” Teatrı Koronavirusla Mübarizəyə Dəstək Fonduna vəsait köçürülməsi təşəbbüsünə qoşulub...
Azərbaycan Dövlət “Yuğ” Teatrı Koronavirusla Mübarizəyə Dəstək Fonduna vəsait köçürülməsi təşəbbüsünə qoşulub.
Teatrın direktoru, Əməkdar mədəniyyət işçisi İslam Həsənov mədəniyyət ocağının rəhbərliyi adından Azərbaycan Respublikası Prezidentinin 19 mart 2020-ci il tarixli “Azərbaycan Respublikasında əhalinin sağlamlığının qorunması və koronavirus infeksiyasına qarşı mübarizənin gücləndirilməsi ilə bağlı tədbirlər haqqında” Fərmanına əsasən yaradılmış Koronavirusla Mübarizəyə Dəstək Fonduna ianə edildiyini bildirir. O qeyd edir ki, “Yuğ” Dövlət Teatrının kollektivi koronavirusla mübarizə tədbirləri çərçivəsində Nazirlər Kabinetinin qərarlarına və tövsiyələrinə ciddi riayət edir.
COVID-19 virusunun Azərbaycan ərazisində geniş yayılmasının qarşısının alınması məqsədilə ölkə ərazisində həyata keçirilən tədbirləri yüksək qiymətləndirən İ.Həsənov bir çox sosial məhdudlaşdırma tədbirinin həyata keçirilməsinin, kütləvi tədbirlərin, konsertlərin, tamaşaların təxirə salınmasının dövlətimizin öz vətəndaşlarını qorumaq istəyindən irəli gəldiyini bildirib. “Son aylar ərzində baş verən hadisələr, o cümlədən, Koronavirusla Mübarizəyə Dəstək Fondunun yaradılması və bir çox qurumun, özəl şirkətlərin və ayrı-ayrı şəxslərin bu fonda ianələr bağışlaması bütün dünyanı cənginə alan virusa qarşı mübarizədə dövlətin və xalqın həmrəylik göstərməsinin bariz göstəricisidir. “Yuğ” Teatrının kollektivi də pandemiyanın ölkəmizə mənfi təsirinin qarşısının alınması üçün əlimizdən gələn maddi və mənəvi dəstəyi göstərməyə hazırdır”, - deyə İslam Həsənov vurğulayıb.
İradə SARIYEVA
