Məlum olduğu kimi, ölkəmizdə koronavirusla mübarizə müstəvisində kifayət qədər tədbir həyata keçirilib və həmin tədbirlərdən biri də karantin elan edilməsi, sosial izolyasiyanın gerçəkləşdirilməsidir.
Bildiyimiz kimi, mübarizə tədbirləri çərçivəsində əsas hədəflərdən biri maksimum dərəcədə insanların evdən bayıra çıxmaması ilə bağlıdır ki, bunun da virusun daha geniş miqyasda yayılmasının qarşısının alınmasında rolu danılmazdır.
Qeyd edək ki, Nazirlər Kabineti yanında Operativ Qərargahın yaydığı rəsmi məlumata görə, martın 30-da koronavirus (COVID-19) infeksiyasının Azərbaycan Respublikasının ərazisində geniş yayılmasının qarşısının alınmasına dair əlavə tədbirlər müəyyənləşdirilib. Yeni karantin tədbirləri çərçivəsində qadağalar müəyyən edilib və bununla da karantin tədbirləri daha da sərtləşdirilib.
Bu gün bütün dünyada böyük həyəcan, təlaş, ölüm risqi yaradan, canlar alan koronavirusla mübarizədə hər ölkə özünəməxsus mübarizə üsulu təqdim etməyə çalışır. Bildirək ki, koronavirusun yayıldığı bir sıra Avropa ölkələrində karantin qaydalarını pozanlara qarşı zorakılıq belə tətbiq edilir. Qonşu Rusiya, İran, Gürcüstan,Türkiyə,Gürcüstanda artıq karantin rejimi tətbiq edilir. Ermənistanda isə koronavirus nəzarətdən çıxıb və kütləvi şəkildə ölkə ərazisinə yayılır. Ermənilərin bu epidemiyanı işğal altında saxladıqları Azərbaycan torpaqlarında da yaydığı məlumdur.
Azərbaycanda isə, dediyimiz kimi, bu məsələyə olduqca ciddi yanaşılır və koronavirusla mübarizə fonunda çox ciddi tədbirlər görülür. Sözsüz ki, bu tədbirlərdən biri də vətəndaş məsuliyyətinin gücləndirilıməsidir.
Azərbaycanda karantin rejimi şəraiti basqa ölkələrdən hansı üstünlüklərlə fərqlənir?
İlqar Hüseynli:“Azərbaycan dövlətinin koronavirusla bağlı həyata keçirdiyi mübarizə tədbirləri, karantin rejiminin gerçəkləşdirilməsi üçün yaradılan şərait, bu məsələyə yanaşması tamamilə özünəməxsusdur”
Sosial sahə üzrə tanınmış ekspert İlqar Hüseynli Azərbaycan dövlətinin həyata keçirdiyi karantin tədbirləri üçün yaradılan şəraitin başqa ölkələrdən daha üstün olduğunu baki-xeber.com-a bildirdi. “Azərbaycanın, ilk növbədə, bu məsələdə üstünlüyü ondan ibarət oldu ki, koronavirus ölkəmizə daxil olmamışdan əvvəl bu virusa qarşı qabaqlayıcı tədbirlər həyata keçirildi. Deyərdim ki, başqa respublikalarla müqayisədə koronavirus bizim ölkəmizə gec gəldi. İranda artıq ilk yoluxma halları baş verdiyi zaman biz mübarizə və mühafizə tədbirlərini daha da gücləndirməliydik, gücləndirdik də. Bu gün koronavirus artıq bizim ölkənin sərhədlərindən içəri daxil olub və xalq, dövlət olaraq çox həssas, çətin mərhələdəyik. Sözsüz ki, koronavirusla bağlı digər ölkələrin ortada xeyli təcrübəsi vardı, çünki bu virus həmin ölkələrdə Azərbaycandan əvvəl yayılmışdı. Azərbaycanda həyata keçirilən karantin tədbirlərinin olduqca gücləndirilməsi diqqəti daha da cəlb edir. Mənə elə gəlir ki, burada karantin şərtlərinin üstünlüyündən, yaxud qeyri-üstünlüyündən danışmaq bir az çətin olar. Çünki, konkret olaraq, Ümumdünya Səhiyyə Təşkilatının koronavirusdan qorunmalarla bağlı sərt təlimatları var. Bu tədbirlərdən də çıxış edərək hər dövlət öz müdafiə tədbirlərini işə salıb. Elə ölkələr var ki, ümumiyyətlə, orada koronavirusla bağlı karantin elan edilməyib. Məsələn, İsveçdə bu addım atılmayıb. Koronavirusla mübarizəyə yanaşmalar müxtəlifdir. Deyək ki, koronavirus yayılan kimi Gürcüstan hökuməti dərhal fövqəladə vəziyyət elan etdi. Türkiyə küçəyə çıxmaqla bağlı yasaq tətbiq etdi. O cümlədən də Azərbaycanda karantin tədbirləri daha da sərtləşdirildi və artıq zərurət olmadan küçəyə çıxmaq rəsmən yasaqlandı. Mənə elə gəlir ki, koronavirusla bağlı həyata keçirilən mübarizə tədbirlərini, gerçəkləşdirilən karantin rejimini vaxtında görülən tədbir kimi qiymətləndirmək olar. Bu gün sosial-maddi tədbirlərin gücləndirilməsi çox vacibdir. Təbii ki, burada söhbət daha çox aztəminatlı ailələrin və günəmuzd işləyən şəxslərin sosial rifahının gücləndirilməsindən gedir. Hesab edirəm ki, bununla bağlı tədbirlər planı işə salınmalıdır”.
İ.Hüseynli qeyd etdi ki, ölkəmizdə həyata keçirilən mübarizə və karantin tədbirləri nəticəsində Azərbaycanda virusa yoluxanların və bu virusdan həyatını itirənlərin sayı başqa ölkələrlə müqayisədə azdır. “Karantin tədbirlərinin gücləndirilməsi nəticəsində ölü və xəstələrin sayının azlığına görə Azərbaycan başqa ölkələrdən üstün mövqedədir. Bunu biz axıra qədər saxlamalıyıq. Təbii ki, bu da daha çox vətəndaşlardan asılıdır, onlar karantin tədbirlərinə məsuliyyətlə əməl etməlidirlər. Yəni vətəndaş olaraq təcrid səylərimizi artırmalıyıq, maksimum səfərbər olunmalıyıq. Burada vətəndaş-dövlət, media əlaqəli şəkildə işləməli, cəmiyyətə doğru informasiyalar çatdırılmalıdır. Bu çox əhəmiyyətli məsələlərdir. Azərbaycan dövlətinin koronavirusla bağlı həyata keçirdiyi mübarizə tədbirləri, karantin rejiminin gerçəkləşdirilməsi üçün yaradılan şərait, bu məsələyə yanaşması tamamilə özünəməxsusdur. Hesab edirəm ki, Azərbaycanın bu problemə yanaşması daha doğru və əsaslı yanaşmadır. Düşünürəm ki, Azərbaycan cəmiyyəti, dövləti bu koronavirus problemindən də alnıaçıq, üzüağ çıxacaq və virus kabusu silinəcək, arxada qalacaq” - deyə İ.Hüseynli qeyd etdi.
Aytəkin Kamranqızı:“Bu gün Ermənistanda koronavirusla bağlı vəziyyət tamamilə nəzarətdən çıxıb, bəzi Avropa ölkələrində karantin elan olunsa da, onun tətbiqi üçün şərait yaradılmayıb”
Sosioloq Aytəkin Kamranqızı isə hesab edir ki, Azərbaycanda tətbiq edilən karantin rejimi öz ciddiliyi ilə daha çox seçilir. Onun sözlərinə görə, bu da onu göstərir ki, Azərbaycan dövləti vətəndaşlarının sağlamlığını, onların təhlükəsizliyini daha çox düşünür, hər bir vətəndaşın qayğısına qalır: “Azərbaycan dövləti tərəfindən əvvəlcədən koronavirusla bağlı önləyici tədbirlərin görülməsi çox böyük effekt verdi. Başqa ölkələrlə müqayisədə ölkəmizdə bu virusa yoluxanların sayı azdır və bu da tətbiq edilən karantin rejimi sayəsində baş verib. Ölkəmizdə karantin rejiminin tətbiqi və ona hər bir vətəndaşın riayət etməsi üçün şərait yaradılıb. Məsələn, bu gün bir sıra dövlət qurumlarında çalışan vətəndaşlarımız işə getmədən öz aylıq əməkhaqlarını alacaqlar. Bu, vətəndaşın sosial rifahının zəifləməməsinə xidmət edən amillərdən biridir. Ölkədə karantin rejimi reallaşdırılır və bu zaman vətəndaşın sosial-maddi rifahı nəzərə alınır, bir ay müddətində işə getməyən şəxs ayın sonunda əməkhaqqını alır. Bu çox müsbət addımdır. Bu gün elə ölkələr var ki, orada karantin elan olunub, amma vətəndaşın sosial rifahı qətiyyən nəzərə alınmayıb. Məsələn, ölkələr var ki, karantin rejiminə görə vətəndaş işə getmirsə, işini itirir. Bu gün Ermənistanda koronavirusla bağlı vəziyyət tamamilə nəzarətdən çıxıb, bəzi Avropa ölkələrində karantin elan olunsa da, onun tətbiqi üçün şərait yaradılmayıb, bəzi ölkələrdə, ümumiyyətlə, vətəndaşı taleyin ixtiyarına buraxıblar, Azərbaycanda isə belə deyil, karantinin tətbiqi üçün lazımı şərait yaradılıb. Başqa ölkələrdən fərqli olaraq, bizim ölkədə karantin rejiminə görə işə gedə bilməyən vətəndaşların nə işdən çıxarılması baş verir, nə də onların maaşının kəsilməsi yaşanır. Azərbaycan dövləti vətəndaşın taleyini həmişə diqqət mərkəzində saxlayır. Əlbəttə, bu, Azərbaycan dövlətinin ən çətin anlarda belə vətəndaşı düşünməsi ilə bağlıdır. Karantin rejiminin sərtləşdirilməsi çox gərəkli addımdır və bütün vətəndaşların buna riayət etməsi mütləqdir”.
İradə SARIYEVA
