Fuad İbrahimov: “Hökumətin bu kateqoriyadan olan vətəndaşları qoruması müsbət addımdır”
Nazirlər Kabinetinin Mətbuat Xidmətinin rəhbəri İbrahim Məmmədov bildirib ki, aztəminatlı vətəndaşlara yardım ediləcək: “Günəmuzd işləyənlər, sosial təminatı aşağı olan insanlar narahat olmasınlar. Dövlət onları unutmur”.
Onun sözlərinə görə, hazırda sosial müdafiə paketi müzakirənin son mərhələsindədir: “Paket elan olunacaq və bu kateqoriyaya aid olan insanlar dövlətin himayəsindədirlər”.
İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı isə bildirib ki, qlobal şokların Azərbaycana təsirini azaltmaq üçün hökumətin dəstək proqramı zərərçəkən 4 sektoru və 20 fəaliyyət istiqamətini əhatə edəcək. Bu çərçivədə 9 proqram layihəsi işlənilir. İlk növbədə 44 min sahibkarı və 304 min muzdlu işçini əhatə edən proqramı qeyd etmək lazımdır. O bildirib ki, İqtisadiyyat nazirinin rəhbərliyilə İşçi qrupu sahələrin zərər çəkməsini üç dərəcədə qiymətləndirib: ən çox, əhəmiyyətli və minimal ziyan çəkən sahələr.
V.Qasımlının sözlərinə görə, belə yanaşma dəstək proqramının ədalətliliyi və ünvanlılığı, habelə resursların səmərəli istifadəsi baxımından əhəmiyyətlidir: “Nəzərə almaq lazımdır ki, Azərbaycanda 1,6 milyona yaxın muzdlu işçinin 915 min nəfəri onsuz da dövlət və neft sektorunda çalışdığından müntəzəm qaydada maaşını alır. Yerdə qalan 640 min muzdlu işçinin 304 min nəfərinin maaşına dövlət dəstək verəcək. Burada fəaliyyət sahəsinin çəkdiyi ziyanın dərəcəsinə uyğun olaraq sahibkarlıq subyektinin əməkhaqqı fondu dövlət tərəfindən dəstəklənəcək. Əlbəttə, bu zaman əsas meyar 712 manat səviyyəsində olan orta əməkhaqqı səviyyəsidir”.
Görünən odur ki, yaranmış vəziyyətlə əlaqədar olaraq aztəminatlı vətəndaşlar, günəmuzd işləyənlər də diqqətdən kənarda qalmayacaqlar. Onlara da müəyyən yardım ediləcək.
- “Hesab edirəm ki, bütün bunları bir qədər də tezləşdirmək lazımdır”
Məsələyə münasibət bildirən iqtisadçı-ekspert Fuad İbrahimovun sözlərinə görə, hökumətin aztəminatlı insanları diqqət mərkəzində saxlaması müsbət addımdır: “Nəzərə almaq lazımdır ki, ilkin olaraq ölkə rəhbərliyi tərəfindən bu məqsədlə 1 milyard manat ayrılıb. Məlum olub ki, əlavə vəsait də büdcədən ayrılacaq. Hökumət bununla bağlı geniş tədbirlər paketi hazırlayıb. Dövlətin müvafiq qurumları və ekspertlər sosial paketlərin hazırlanması ilə bağlı geniş müstəvidə iş aparıblar. Bu da onu göstərir ki, aztəminatlı təbəqəyə yardım ediləcək. Hesab edirəm ki, bütün bunları bir qədər də tezləşdirmək lazımdır. Ona görə ki, karantin rejiminin tətbiq edilməsi ilə əlaqədar günəmuzd işləyənlər gündəlik işləməkdən məhrum olublar. Belə insanların sayı çoxdur. Bu da sözügedən kateqoriyadan olan insanların sosial vəziyyətinə mənfi təsir edir. Bütün hallarda, hökumətin bu kateqoriyadan olan vətəndaşları qoruması müsbət addımdır. Sözügedən məsələ ilə bağlı geniş təkliflər hazırlanıb. Çox güman ki, aztəminatlı vətəndaşlara həm ərzaq yardımı olacaq, həm də kommunal xidmətlərlə bağlı güzəştlər ediləcək. Bütün hallarda, belə bir məsələdə çox diqqətli olmalıyıq və ən optimal variantı qəbul etməliyik. Optimal variant ondan ibarətdir ki, bu bəla uzandıqca, biz bunun öhdəsindən gələ bilək. Yoxsa istənilən sosial paketi çərçivəsiz şəkildə tətbiq etmək olmaz”.
Vidadi ORDAHALLI
