29/05/2020 11:15
728 x 90

Azərbaycanda xüsusi karantin qaydalarının sərtləşdirilməsi nədən zərurət oldu...

İsmayıl Ağayev:“Qayadalara riayət etməyəcəyimiz təqdirdə bizi daha böyük fəlakətlər gözləyə bilər”

img

Azərbaycanda koronavirus infeksiyasının yayılmasının qarşısının alınması üçün bütün lazımi tədbirlər görülür. Bununla əlaqədar Nazirlər Kabineti yanında Operativ Qərargah tərəfindən 2020-ci il mart ayının 31-dən etibarən bir sıra əlavə qadağalar tətbiq edilib. Daxili İşlər Nazirliyinin şəxsi heyəti respublikanın bütün şəhər və rayonlarında karantin rejiminin tələblərinin təmin edilməsi məqsədilə gücləndirilmiş iş rejimində xidmət aparır. Vətəndaşlardan bir daha tələb olunur ki, evdən (mənzildən) yalnız təxirəsalınmaz tibbi yardıma zərurət olduqda, həyat və sağlamlığa bilavasitə təhlükəli vəziyyət yarandıqda, fəaliyyətinə icazə verilən mağazalara və əhaliyə xidmət göstərən obyektlərə getmək, məişət tullantılarının atılması hallarında, eləcə də xüsusi karantin rejimi dövründə fəaliyyət göstərən təşkilatlarda xidməti vəzifələrini icra etmək məqsədilə çıxsınlar. Evdən çıxmaq zərurəti yarandıqda qoruyucu tibbi vasitədən (maska) istifadə etsinlər, insanlarla təmas zamanı 2 metrlik ara məsafəsini saxlasınlar, mütləq qaydada şəxsiyyət vəsiqəsini (və ya şəxsiyyəti təsdiq edən digər sənədi), fəaliyyətinə icazə verilmiş təşkilatlarda işləyən şəxslər isə xidməti vəsiqələrini və ya bu faktı təsdiqləyən rəsmi arayışı özləri ilə götürsünlər. Ciddi zərurət olmadan şəxsi avtomobillərdən istifadə etməsinlər.

Xatırladırıq ki, şəxslərin və nəqliyyat vasitələrinin rayonlararası və şəhərlərarası hərəkəti qadağan edilib. Nəzərə alınmalıdır ki, Azərbaycan Respublikasının Nazirlər Kabineti yanında Operativ Qərargahın müəyyən etdiyi qadağalara və məhdudiyyətlərə, həmçinin karantin rejiminin təmin olunmasına cəlb edilmiş polis əməkdaşlarının və hərbi qulluqçuların qanuni tələblərinə əməl etməyən şəxslər haqqında hüquqi məsuliyyət tədbirləri görüləcək.

Göründüyü kimi, Operativ Qərargah karantin qaydalarını bir qədər də sərtləşdirməyə zərurət görüb. Bu addımın atılmasını şərtləndirən başlıca amillər hansılardı? Beynəlxalq Diaspor Mərkəzinin sədri İsmayıl Ağayev “Bakı-Xəbər”ə açıqlamasında bildirdi ki, vətəndaşlarımızın üzərinə düşən ən vacib məsələ qaydalara tabe olmaqdır:“Bu yalnız bizi narahat edən bəla deyil. Görürsünüz ki, bu epidemiya bütün dünyada pandemiya kimi elan olunub. Hər halda anlamaq lazımdır ki, hökumətimiz bu addımları zərurətdən atır. Fikir verin, qəbul olunan qadağaların birinci ziyanı ölkənin iqtisadiyyatına, dövlətin büdcəsinə dəyir. Deməli, hökumət bunları etməyi zəruri sayır. Nəyə görə? Əhalinin, sizin, bizim sağlamlığımızı qorumaq üçün. Buna görə vətəndaşlarımız da maksimum məsuliyyətli olmalıdırlar. Təmasları azaltmalı, ən əsası isə, zərurət olmadığı halda bayıra çıxmamalıdırlar. Ancaq biz təəssüflə qeyd etməliyik ki, bir çox vətəndaşlarımız bunu etmək istəmir. Hətta yaşı 65-i keçən bəzi vətəndaşlarımıza qadağa izah ediləndə, onlar bəzən polislə mübahisəyə girişirlər. Dövlətin əlində daha sərt rıçaqlar var. Lazım olsa onları da tətbiq edə bilər. Ancaq hələlik bu, maarifləndirmə və tövsiyələr üzərində qurulub. Operativ Qərargahın son qərarını lazımi atılmış addım kimi dəyərləndirirəm. Hesab edirəm ki, hökuməti qaydaları sərtləşdirməyə vadar edən amil daha çox vətəndaşların səhlənkarlığı, qadağalara məsuliyyətsiz yanaşması oldu. Görürsən ki, savadlı, cəmiyyətdə mövqeyi olan adamdı, ancaq elan olunan qadağaları lağa qoyan statuslar paylaşır. Belə olmaz. Xüsusilə də cəmiyyətin ziyalı təbəqəsi bu istiqamətdə düzgün maarifləndirməni aparmalıdır. Qayadalara riayət etməyəcəyimiz təqdirdə bizi daha böyük fəlakətlər gözləyə bilər”.

Məhəmmədəli QƏRİBLİ

Son xəbərlər