“Qarabağ klanı” ilə Nikol Paşinyan iqtidarı arasında hələ də ciddi savaş getməkdədir. Düzdür, ötən müddət ərzində Paşinyan klanın mövqeyini xeyli sarsıda bilib. Amma hələ də Azərbaycanın işğal edilmiş ərazilərindəki rejim üzərində tam nəzarəti bərpa edə bilməyib. Əksinə, separatçı rejimin nümayəndələri Paşinyanı indi getdikcə daha çox hədələyirlər. Xüsusilə bu rejimdə “hərbi vəzifə” tutmuş Vitali Balasanyan Paşinyana qarşı qiyam təşkil edə biləcəklərini açıq bəyan edir.
Belə bir vaxtda bəlli olub ki, “Qarabağ klanı”nın Ermənistan təmsilçiləri də separatçı rejimlə sıx işbirliyindədir. Eyni zamanda, onlar Ermənistan daxilində siyasi cəhətdən də yenidən təşkilatlanır. Artıq bu fonda məlum olub ki, həbsə atılan Ermənistanın eks-prezidenti Robert Köçəryan yeni partiya yaratmağa da hazırlaşır. Eks-prezidentin oğlu Levon Köçəryan atasının Ermənistan Milli Təhlükəsizlik Xidmətinin keçmiş rəhbəri Artur Vanetsyanla əməkdaşlıq etmək ehtimalının da olduğunu bildirib. Robert Köçəryan özü isə iddia edir ki, artıq Ermənistandakı siyasi proseslər yekunda növbədənkənar seçkilərlə başa çatacaq. O, artıq cəmiyyətin reallığı olduğu kimi qəbul etdiyini bildirib: “Bu, Paşinyanın populyarlığının sürətlə itməsini və hər şeyin növbədənkənar seçki ilə bitəcəyini əminliklə deməyə əsas verir. Bunun gələn il baş verməsi ehtimalı həddən artıq yüksəkdir və hər şey müxalifətin qətiyyətindən asılıdır”.
Ermənistanın “İrates” nəşri isə yazır ki, Paşinyanın komandasında yer alanların bir çoxu da artıq baş nazirə qarşı olanlarla bir sırada yer almaq niyyətindədir:“Elə bu səbəbdəndir ki, dekabrın 12-də Ermənistan hökumətinin iclası zamanı Paşinyan bildirib ki, dövlət idarəetmə sistemi inqilaba müqavimət göstərir. Əslində, nəinki bütün sahələrdə “inqilab”ın başa çatması, həmçinin dövlət sisteminin fərqli bir məntiqlə işləməyə başlaması İsa və Roma papasına çevrilmiş Paşinyanı narahat edir. “Mənim addımım” fraksiyasında olduğu kimi, idarəetmə dairələrində də Paşinyanın tərəfdlarları yoxdur”. Erməni siyasi şərhçi Aram Amatuni də məsələyə bu prizmadan nəzər salaraq bildirir: “Hakimiyyət dəyişikliyindən sonra Ermənistanda formalaşan hakimiyyət bir kollektivlikdir, bəzən bir-birinə zidd olan elementlər toplusudur”. Onun sözlərinə görə, qəribə görünsə də, Ermənistanda hökumətin formalaşması prosesində hazırda müxalifətin formalaşması məsələsi daha da aktuallaşıb:“Müxtəlif subyektiv və ya substantiv səbəblərə görə müxtəlif vəzifəli şəxslər işdən çıxarılır, hətta bəzən ittiham olunaraq həbs edilir, dünənki qəhrəmanlar anti-inqilabçılara çevrilir və sair. Bununla yanaşı, Ermənistanda hakimiyyətin süzgəcdən keçməsi, sözdə “kristallaşması” prosesi hava və su kimi müxalifətin mövcudluğunu zəruri edən bir mərhələyə çatıb. Bu vəziyyətdə müxalifət güzgü və ya bir “rentgen” olacaq, burada hökumət öz imicini daha aydın görməli, qiymətləndirməli, lazımi nəticələr çıxarmalıdır.
Ermənistanda ən zəif problem həll olunmayıb, müxalifət yoxdur, çox sərt, çox kəskin tənqid var, amma müxalifət yoxdur. Sadəcə tənqid müxalifət deyil, əks halda tənqidçi hər hansı bir media orqanı və ya ekspert siyasi müxalifət sayılardı. Beləliklə, Ermənistanda hökumətin nə olduğunu göstərmək üçün əyri olub-olmadığını qiymətləndirə biləcək bir güzgü belə yoxdur. Amma Köçəryanın yenidən siyasətə atılması vəziyyəti dəyişə bilər. Bax onda Paşinyanın ciddi çətinlikləri üzə çıxacaq. Çünki Paşinyanın komandasında yer alanların çoxu Köçəryanın tərəfinə keçə bilər”.
Erməni politoloq Armen Badalyan isə bildirir ki, Paşinyanın davranşıları onun komanda üzvlərini də bezdirib. Onun sözlərinə görə, Ermənistan Respublika Partiyasının artıq bir ildən çoxdur hakimiyyətdə olmamasına baxmayaraq, Ermənistan hələ də investisiyalara malik deyil: “Bu durumda Paşinyanın reytinqinin düşməsi təbiidir. Belə vəziyyətdə Paşinyan vəziyyəti lehinə dəyişdirmək üçün yeni düşmənlər axtarır. İndi bu “düşmən” rolunda hüquq-mühafizə sistemi çıxış edir. Hüquq-mühafizə sistemi deyəsən yenidən investisiyalara “mane olur”. Baş nazir daim “düşmən”lərin axtarışındadır. “Düşmən” hər zaman dəyişə bilər, diqqət etsəniz, bu 1,5 il ərzində çox dəyişib”. Onun sözlərinə görə, hüquq-mühafizə sisteminin bütün rəhbərlərini Paşinyan təyin edib. Badalyan qeyd edib ki, Ermənistanın polis rəisi və Milli Təhlükəsizlik Xidmətinin direktoru vəzifələrini müvəqqəti icra edən şəxslər Paşinyanın istədiyi adamlardır, lakin bu halda belə korrupsiyaya qarşı mübarizədə uğur qazanılmır, bunun səbəbi isə məsələyə məzmunlu yanaşmanın olmamasıdır: “Qırmaq, əzmək, divarı suvamaq, döşəməni suvamaq, dövlət aparatını parçalamaq baş nazirin yanında yaxşı alınır, hə, bunu etmək asandır, bəs sonra bərpa edə biləcək? Deyəsən, onun təsəvvürləri yalnız bu barədədir, yaxşı olardı ki, bütün bunların əvəzinə ölkənin inkişafı üçün baxış təqdim etsin. Bu yoxdur və Paşinyanın qəzəbinə tuş gələn məmurlar keçmiş hakimiyyəti istəyirlər. Məhz bu fonda da ölkədə yeni hakimiyyt çaxnaşması tamamilə gözləniləndir”.
“Aykakan Jamanak” qəzeti isə yazır ki, belə vəziyyətdə Paşinyanın Ermənistanın digər keçmiş prezidenti Serj Sarkisyanı həbsə atmaq niyyəti “Qarabağ klanı”nı daha tez müddətdə baş nazirə qarşı qəti hərəkətə keçməyə sövq edə bilər. Xatırladaq ki, dekabrın 4-də Serj Sarkisyana qarşı ittiham irəli sürülüb. O, 2013-cü il yanvarın 25-dən 7-dək bir qrup məmurdan 1 milyon dollardan çox maddi vəsait mənimsəməkdə ittiham olunur. Amma hesab edilir ki, bu yalnız Sarksiyanı həbsə atmaq üçün əsasdır. Bununla Paşinyan “Qarabağ klanı”nı tam zərərsizləşdirmək istəyir. Klan isə, öz növbəsində, Paşinyan komandasında narazı fiqurlardan istifadə edib baş nazirə qarşı daha sərt həmlə etməyi düşünür.
Nahid SALAYEV
