Son vaxtlar Mətbuat Şurası ətrafında gərəksiz ziyanlı müzakirələr açılır. Bu müzakirələrlə çıxış edənlər iddia edirlər ki, guya sözügedən qurumun fəaliyyət göstərməsinə ehtiyac yoxdur. Sözügedən şuranın ləğvi ilə bağlı lüzumsuz ideya ətrafında müzakirələr açmağa çalışırlar. Yersiz formada bunu gündəmə gətirmək istəyirlər.
Hansı ki, MŞ-ni kənardan kimsə yaratmayıb. MŞ jurnalistlərin özləri tərəfindən yaradılıb. O zaman MŞ-nin yaranması üçün böyük zərurət var idi. Çünki media sahəsində bir sıra boşluqlar yaranmışdı. Həmin vaxt olduğu kimi, bu gün də MŞ-nin fəaliyyətinə, mövcudluğuna ehtiyac var. Nəzərə almaq lazımdır ki, MŞ yarandığı gündən mediada senzor rolunu oynamayıb. Əksinə, media azadlığının inkişafına xidmət edib. Vətəndaşlara ciddi mətbuatla reket mətbuatın fərqini göstərib. İllərlə reket mətbuat orqanları vətəndaşları ciddi şəkildə narahat edib, onlara bir sıra problemlər yaradıblar. MŞ yaradılandan sonra sözügedən problemlər əvvəlki illərlə müqayisədə xeyli azalıb. MŞ ötən illərdə mətbuatın, jurnalistlərin problemlərinin həlli ilə bağlı bir sıra təşəbbüslərlə çıxış edib. İndinin özündə də imkan daxilində bəzi məsələlər gündəmə gətirilir.
Təbii ki, kimlərinsə guya MŞ-nin gərəksiz bir qurum olması barədə deməsi ilə bu qurum ləğv olunmayacaq. Çünki bunların heç bir tutarlı əsası yoxdur. O zaman olduğu kimi, gələcəkdə də MŞ-nin fəaliyyət göstərməsinə ehtiyac olacaq. Belə olan halda, maraqlıdır, MŞ-nin ləğvi kimi lüzumsuz ideya ətrafında müzakirələrin aparılması hansı dairələrin marağındadır?
“MŞ-ni qəbul etmək istəməyənlər belə müzakirələri ortalığa atırlar”
Sözügedən məsələyə aydınlıq gətirən Mətbuat Şurası sədrinin müavini Müşfiq Ələsgərli bununla bağlı bir sıra məqamlara toxundu: “Son vaxtlar həqiqətən də belə gərəksiz fikirlər səslənir. Hesab edirəm ki, bu, “mediada islahatlar olmalıdır” deyən şəxslərin bir balaca o islahatlar barədə təsəvvürsüzlüyündən irəli gələn məsələdir. Dünyada media üzərində iki formada tənzimləmə var. Bir medianın özünü tənzimləməsidir, bir də dövlət tənzimləməsidir. Demokratik dövlətlərdə media üzərində dövlət tənzimləməsi olmur. Azərbaycan da bir demokratik ölkə olaraq Avropa Şurasına daxil olduğu ərəfədə media üzərində dövlət tənzimləyici qurumlarını ləğv edib. Yəni Mətbuat və İnformasiya Nazirliyi ləğv edilib, əvəzində medianın özünə özünütənzimləmə statusu verib. Bu özünütənzimləmə statusunun verilməsi nəticəsində Mətbuat Şurası və Milli Teleradio Şurası formalaşdırılıb. İndi kimlərsə bu şuraların fəaliyyətinin effektivliyi barədə müzakirələr aça bilər. Biz azad cəmiyyətdə yaşayırıq və hər kəs öz fikirlərini ifadə edə, iradlarını bildirə bilər. Ancaq MŞ-yə ehtiyacın olmadığını demək gərəksiz bir fikirdir. MŞ-ni qəbul etmək istəməyənlər belə müzakirələri ortalığa atırlar. Bu da alternativi olmayan bir məsələdir. Bu fikri səsləndirənlər ortalığa konkret bir model qoymurlar. Azərbaycanda dövlət tənzimləyici qurum yoxdur, özünütənzimləmə qurumu var. Onda özünütənzimləmə qurumu da ləğv olunursa, onda nə yaradılır, biz hara gedirik və vəziyyət necə olacaq? Buna aydınlıq gətirən yoxdur. Ümumi şəkildə ayrı-ayrı şəxslərin dilindən özünütənzimləmə qurumlarının ləğvi səslənir. Bu təkliflə çıxış edənlər yaxşı olardı ki, alternativ model ortaya qoysunlar, sonra hansısa təkliflə çıxış etsinlər. Yıxmaq asandır, amma qurmaq çətindir. O baxımdan, belə yersiz müzakirələri məqbul hesab etmirəm”.
Vidadi ORDAHALLI
