Müsavat Partiyası İcra Aparatının rəhbəri Gülağa Aslanlı mühacirətdə olan jurnalist, Müsavat Partiyasının üzvü Yafəz Həsənovu (Əkrəmoğlu) məhkəməyə verib.
G.Aslanlı Yafəz Əkrəmoğlunun Cinayət Məcəlləsinin 147.1-ci (böhtan, yəni yalan olduğunu bilə-bilə hər hansı şəxsin şərəf və ləyaqətini ləkələyən və ya onu nüfuzdan salan məlumatları kütləvi çıxışlarda, kütləvi nümayiş etdirilən əsərdə və ya kütləvi informasiya vasitəsində yayma) maddəsi ilə cəzalanmasını istəyib.
G.Aslanlı bildirib ki, guya Y.Həsənovu Müsavat Partiyasına və ona atdığı şər və böhtanlara görə məhkəməyə verib: “Növbəti addımım Almaniya məhkəməsinə müraciət etmək olacaq”.
Məlumat üçün qeyd edək ki, Y.Həsənov Müsavat Partiyasını “mühacir alveri”ndə günahlandırır. O, iddialarında Müsavat başqanı Arif Hacılı və Gülağa Aslanlının bu alverdə fəal iştirak etdiyini bildirir. Nəzərə almaq lazımdır ki, bunun üçün yetərincə əsas da var. Çünki ötən ay Almaniyanın hüquq-mühafizə orqanları Azərbaycanın müxalifət partiyasının keçmiş üzvlərini saxlayıb. Cinayətkar şəbəkəyə daxil olan 7 nəfər həbs edilib. Cinayətkar dəstənin saxlanan üzvləri barəsində yerli federal məhkəmələr tərəfindən 6 ay müddətinə həbs-qətimkan tədbiri seçilib. Həbs olunanların əksəriyyəti Müsavat Partiyasının fəal üzvləri və Avropadakı təmsilçiləridir. Məlum olub ki, həbs edilənlər Almaniyada "miqrant alveri" ilə məşğul olmaqda, o cümlədən, 3-10 min avroarası ödəmə qarşılığında insanları qaçaq yollarla Almaniyaya aparmaqda şübhəli bilinirlər. Özü də bunu Almaniya polisi müəyyən edib. Sözügedən məsələni Azərbaycan polisi aşkarlasaydı, o zaman Müsavat Partiyası o dəqiqə bunu siyasi motivlə əlaqələndirərdi. Deyəcəkdilər ki, guya bu siyasi sifarişdir. Ancaq qeyd edildiyi kimi, Müsavatın mühacir alverini Almaniya polisi ifşa edib. Belə olan halda, Gülağa Aslanlı Müsavatın Avropa biznesini ifşa edənləri hansı niyyətlə məhkəməyə verir?
“Görünür, Gülağa Aslanlı kimlərisə qorumaqdan ötrü bu addımları atır”
Məsələyə münasibət bildirən Azərbaycanda Vətəndaş Cəmiyyətinin İnkişafına Yardım Assosiasiyasının (AVCİYA) Seçki Qərargahının rəhbəri Məhərrəm Zülfüqarlının fikrincə, G.Aslanlının Müsavatın Avropa biznesini ifşa edənləri məhkəməyə verməsi anlaşılan deyil: “Çünki ortada ciddi faktlar var. Faktlarla bağlı da mətbuatda geniş şərhlər verilib. Özü də bu faktlar danılmaz sübutlardır. Müsavat Partiyasının fəalları kimlərinsə xarici ölkələrə getməsi üçün bu cür arayışlar veriblər. Bu, qeyd edildiyi kimi, sübut olunub və bir neçə nəfər deportasiya edilib. Sadəcə olaraq müzakirə doğuran məqamlardan biri də partiyada bunu kimlərin etməsidir. Reallıq ondan ibarətdir ki, bütün sözügedən arayışlar partiya sədrinin imzası ilə gedib. Görünür, G.Aslanlı kimlərisə qorumaqdan ötrü bu addımları atır. Ancaq fakt ondan ibarətdir ki, belə saxta arayışlar var. Mitinqlərdə də dəfələrlə sübut olunub ki, bəzi insanlar polislə bilərəkdən əlbəyaxa olurdular, şəkillər çəkdirirdilər. Məqsəd o idi ki, sonradan onları miqrant kimi xarici ölkələrdə qəbul etsinlər. Saxta arayış da verənlər buna görə məsuliyyət daşımalıdırlar. İndi burada əsas məsuliyyətin kimin üzərinə düşməsini müvafiq qurumlar araşdırmalıdırlar”.
Vidadi ORDAHALLI
