Bütün demokratik sistemlərdə seçki dövlət və ictimai təşkilatlarda vacib vəzifələrin tutulması üçün keçirilən demokratik üsuldur və dünya təcrübəsində qanunda nəzərdə tutulan reqlamentə uyğun olaraq, əsasən gizli keçirilir.
Müasir demokratiyanın bərqərar olmasının təsirli mexanizmləri sırasında seçkilər həlledici rol oynayır. Xalq hakimiyyətinin həyata keçirilməsinin təmin edilməsi seçkilər nəticəsində meydana çıxır. Seçkilər hakimiyyətin xalq etimadını və müdafiəsini əldə etməsinin ən təsirli və sınanmış vasitəsidir. Bu mühüm vasitə cəmiyyəti sosial-hüquqi ədalətsizliklərdən və avtoritarizmin təzahürlərindən qoruyur.
Vətəndaşların seçmək və seçilmək hüququ Azərbaycan Respublikasında dövlət işlərinin və ictimai işlərin idarə olunmasında onların iştirakı haqqında Konstitusiya ilə verilmiş hüquqlarıın ən mühüm hüquqi təminatıdır. Respublikanın 18 yaşına çatmış vətəndaşları seçki qanunları ilə müəyyən edilmiş qaydada ümumi, bərabər, birbaşa seçki hüququ əsasında sərbəst, şəxsi və gizli səsvermə yolu ilə seçib-seçilirlər.
Azərbaycanda davam etdirilən genişmiqyaslı islahatlar bütün sahələr kimi, Milli Məclisi də əhatə etməli idi. Hazırda həyatımızın bütün sahələrində aparılan yenilənmə, idarəetmədəki struktur islahatları, gəncləşmə siyasətini xalq rəğbətlə qarşılayır. Sosial şəbəkələrdə gedən müzakirələrdən və seçki başlamadan vətəndaşların kütləvi şəkildə deputat olmaq iddialarını açıq şəkildə ortaya qoymasından məlum olur ki, prosesin daha demokratik olacağına əhalidə böyük əminlik var. Hətta müxalif mövqeli insanlar da budəfəki seçkidə mandat qazana biləcəkləri şanslarının çox olduğunu bəyan edirlər. Belə rəqabətdə keçəcək seçkidə sözsüz ki, seçici fəallığı da digər seçkilərdən güclü olacaq. Təbii ki, vətəndaşlarda belə bir inamın formalaşmasının ciddi əsasları var. Burada Prezidentin nümayiş etdirdiyi siyasi iradənin də rolu böyükdür. Çünki seçkilər ölkədə aparılan inqilabi dəyişikliklərin fonunda baş tutur. Təsadüfi deyil ki, ölkənin ən radikal mövqeli müxalif partiyaları sayılan: REAL, Müsavat, Ümid və digərləri də seçkilərdə iştirak edəcəklərini bəyan ediblər. Əli Kərimlinin nəzarətində olan Milli Şura belə ənənəvi taktikasını birmənalı elan edə bilmir. Prosesin cəzbediciliyi onları boykot taktikasına getməyə də tam imkan vermir. Bir sözlə, biz ölkəmizin tarixində son illərin ən maraqlı seçki prosesini izləməli olacağıq.
Məhəmmədəli QƏRİBLİ
.jpg)
.jpg)
.jpg)
