İndiyə kimi Azərbaycanda elə bir ciddi siyasi aktivliyi ilə seçilməyən Rusiyanın senatoru Fərhad Əhmədov birdən-birə olduqca geniş və əhatəli, siyasi cəhətdən kifayət qədər yetkin şəkildə hazırlanan bir yazı ilə çıxış edib.
Daha doğrusu, hakimiyyətə özünün hazırladığı “yol xəritəsini” təqdim edib. Onun genişhəcmli yazısında bütün sahələrə toxunulub. Həmin yazıda milyarder diaspor nümayəndələrinin seçkilərdə rahat iştirakını təmin etmək üçün bəzi qanunvericilik aktlarına dəyişikliklərin olunmasını təklif edir.
F.Əhmədov xaricdə yaşayan diaspor üzvlərinin lobbiçilik imkanlarından və təcrübələrindən yararlanmağın vacib olduğunu və bu şəxslərin prosesə qatılması üçün vətəndaşlıq haqqında qanuna və Seçki Məcəlləsinə dəyişikliklər edilməsinin vacibliyini önə çəkir. Belə qənaətə gəlmək olur ki, bütün bu “yol xəritəsinin” əsas qayəsi də məhz elə bu müddəanın üzərində formalaşır...
Milyarderin paylaşdığı “yol xəritəsinin” nəticə hissəsində isə bildirilir ki, növbədənkənar seçkilər şəffaf şəkildə keçirilməli və saxtakarlığa yol verilməməlidir: “Bu kontekstdə konstruktiv müxalifətin seçkiyə və qanunverici hakimiyyətin sonrakı fəaliyyətinə cəlb edilməsi onun strateji islahatların mexanizminə inteqrasiyasını təmin edə bilər”.
Rusiya vətəndaşı olan diaspor nümayəndələrinin Azərbaycandakı seçkilərdə iştirakına bir zərurət varmı?
- İsmayıl Ağayev: “Yaxşı olar ki, Fərhad Əhmədov Rusiyada olan erməni iş adamlarının nələr etdiklərinə diqqət etsin”
Beynəlxalq Diaspor Mərkəzinin sədri İsmayıl Ağayev “Bakı-Xəbər”ə açıqlamasında bildirdi ki, Fərhad Əhmədovun məqaləsini daha yaxşı başa düşmək üçün bir neçə dəfə oxuyub: “Sözün açığı, mən illərdir onunla maraqlanırdım. Adi bir azərbaycanlının gedib Rusiyada milyarder olması məni çox sevindirirdi. Onu da diasporumuzun fəxri üzvlərindən sayırdım. Mən, həmçinin, maraqlanırdım ki, görəsən o, neçə azərbaycanlıya dəstək olub, onların təhsil almalarına, mövqe tutmalarına köməklik göstərib? Təəssüflər olsun ki, mən belə bir adama rast gələ bilmədim. Buradan belə bir nəticə əldə etmək olur ki, həmin milyarderlərin başlıca davaları özlərinin mövqelərinin gücləndirilməsi ilə bağlıdır. Çox maraqlıdır, biz belə imkanda olan adamdan Rusiyada mövqe tutmalarını gözləyirik, onların isə gözləri Azərbaycanda deputat olmaqdadır. Bu nə yanaşmadır? Biz istəyirik ki, soydaşlarımız təmsil olunduqları ölkələrdə yer tutsunlar, üstün mövqeyə sahiblənsinlər, bunlar da burada deputat olmağa can atırlar. Yaxşı olar ki, Fərhad Əhmədov Rusiyada olan erməni iş adamlarının nələr etdiklərinə diqqət etsin. Onlar, əksinə, erməniləri ölkədən dartıb aparıb Rusiyada irəli çəkirlər, yeri gələndə Qarabağa yardım edirlər. Fərhad bəyin bu mövqeyini bəyənmədim və onun diaspor quruculuğumuza mənfi təsir edəcəyini düşünürəm. Hesab edirəm ki, bu cür adamlar qanunda dəyişikliyi yalnız deputat seçilməyə görə etmirlər. Onlar həm də gələcəkdə prezident seçkilərində iştiraklarının mümkünlüyü üçün bu tələbi irəli sürürlər. Onun müraciətindəki detalın başlıca məğzi məhz budur. Onda elə təşkil eləsin biz də gedək Rusiyada deputat seçilək. Bunu edə bilmirsə, niyə öz ölkəsinə xarici təsirlərin artmasında maraqlıdır? F.Əhmədovun məhz indiki məqamda fəallaşması da təsadüfi deyil. Zaman-zaman biz Rusiyadan analoji “küləklərin” əsməsinin şahidi olmuşuq. Yaxşı olardı ki, o, elə yaşadığı ölkədəki diasporumuzun inkişafına dəstək versin. Onun Azərbaycana ən böyük xidməti elə bu olar”.
Məhəmmədəli QƏRİBLİ
.jpg)
.jpg)
