Məlum olduğu kimi, Azərbaycanda növbədənkənar parlament seçkilərinə 2 ay vaxt qalıb. İki aydan sonra ölkədə yeni parlament formalaşacaq. Sözügedən seçkilər son illər ölkədə aparılan köklü, sistemli və kardinal xarakterli islahatların tərkib hissəsidir. Aparılan struktur islahatları fonunda, əvvəlki parlament müvafiq tələblərə cavab vermirdi. O üzdən, ölkədə həyata keçirilən yeniliklər növbəti parlament seçkilərinin keçirilməsi zərurətini ortaya qoydu.
Məlumdur ki, Azərbaycanda həyata keçirilən islahatların müsbət nəticələri bir sıra beynəlxalq reytinq agentliklərinin hesabatlarında öz əksini tapıb. Çox qəribədir ki, parlament seçkiləri yaxınlaşdıqca son günlər bəzi siyasi yönümlü beynəlxalq təşkilatlar eyni vaxtda Azərbaycana qarşı fəallaşıblar. Ard-arda tənqidi açıqlamalarla çıxış edirlər. Məsələn, insan hüquqları sahəsində qırx iki beynəlxalq QHT birgə bəyanat yayaraq, Azərbaycanda müstəqil vəkillərə təzyiqin dayandırılmasını tələb edib.
“Biz, İnsan Hüquqları Evi təşkilatının 42 üzvü və tərəfdaşı insan hüquqları sahəsində vəkillərə, o cümlədən, Şəhla Hümbətova və Elçin Sadıqova qarşı prosedurlara dərhal son qoyulmasını tələb edirik", - deyə Azərbaycan Vəkillər Kollegiyasının rəhbəri Anar Bağırovun adına ünvanlanmış müraciətdə bildirilir. Müraciətdə o da qeyd edilir ki, guya Azərbaycanda bəzi vəkillər fikri ifadə azadlığını müdafiə etməyə, müştərilərinə qarşı işgəncələr haqqında məlumat verməyə və siyasi məhbusları müdafiə etməyə hazır olduqlarına görə təzyiqə məruz qalıblar.
Bundan başqa, Nyu-Yorkda yerləşən Jurnalistləri Müdafiə Komitəsi (JMK) dekabrın 11-də dünyada jurnalistlərin vəziyyəti haqqında hesabat yayıb. Sənəddə deyilir ki, Azərbaycanda hələ də 6 jurnalist: “Meydan TV” ilə əməkdaşlıq edən Əfqan Muxtarlı, "Xəbər 44" saytının redaktoru Araz Quliyev, "Kend.info" saytının təsisçisi Elçin İsmayıllı, "Realliq.info" saytının rəhbəri İkram Rəhimov, "Xeberman" saytının rəhbəri Polad Aslanov və "Azadlıq" qəzetinin regional müxbiri Ziya Əsədli həbsdədir. Hansı ki, sözügedən jurnalistlər ifadə azadlığına görə yox, konkret cinayət və digər bu kimi əməllərə görə həbs olunublar. Onlardan bəziləri reketçilik fəaliyyəti ilə məşğul olaraq insanları şantaj ediblər. Bununla bağlı çoxsaylı dəlil və sübutlar var.
Bundan bir gün əvvəl AŞPA-nın Hüquqi Məsələlər və İnsan Haqları Komitəsi bildirib ki, Azərbaycanda guya "sistemli" siyasi məhbus problemi var və hakimiyyəti qeydiyyata alınmış hallara yenidən baxmağa çağırır. AŞPA Komitəsi Avropa İnsan Hüquqları Məhkəməsinin gəldiyi nəticələr əsasında və AŞPA-nın təqdimatına əsasən, bir sıra şəxslərin "siyasi məhbus" olduğunu müəyyən edib. Komitə, həmçinin, Azərbaycan parlamentini Assambleyanın qətnaməsinin yerinə yetirilməsi üçün siyasi məhbuslar üzrə məruzəçi ilə əməkdaşlıq etməyə, Azərbaycan hökumətini isə Avropa Şurası Nazirlər Komitəsi ilə tam həcmdə əməkdaşlığa çağırıb. Halbuki, Azərbaycanda siyasi məhbus problemi çoxdan öz həllini tapıb. Azərbaycan 2001-ci ildə Avropa Şurasına üzv qəbul olunandan sonra bütün siyasi məhbuslar azad edilib. Qanunvericilik daha da təkmilləşdirilib. Söz və ifadə azadlığı məsələsində yeni-yeni imkanlar yaranıb. İstənilən ölkə vətəndaşı internetə çıxış imkanına və orada öz fikirlərini azad şəkildə ifadə etmək hüququna malikdir. Bu onu göstərir ki, Azərbaycanda söz və ifadə azadlığı ilə bağlı vəziyyət pisləşməyib, əksinə, daha da yaxşılaşıb. Belə olan halda, parlament seçkilərinə 2 ay vaxtın qaldığı bir vaxtda bəzi beynəlxalq təşkilatların Azərbaycanla bağlı tənqidi xarakterli hesabatlar yaymasında məqsədi nədir? Məqsəd bu minvalla ölkə hakimiyyətinə təzyiq göstərməkdir. Çünki Azərbaycanın müstəqil siyasət yeritməsi, geosiyasi balansı çox uğurla qoruya bilməsi xaricdəki bəzi mərkəzləri narahat edir. Ona görə də müxtəlif təzyiq vasitələrini işə salırlar. Zatən, belə hallar yeni deyil. Azərbaycanda hər seçki ilində bənzər ənənəvi təzyiqlərin şahidi oluruq. Bu da olardan biridir. Ancaq nəzərə alsaq ki, Azərbaycan müstəqillik illərində kifayət qədər inkişaf edib, o zaman belə təzyiqlərin heç bir təsiri olmayacaq və bəlli mərkəzlər öz niyyətlərini bu dəfə də reallaşdıra bilməyəcəklər.
Vidadi ORDAHALLI
