12/07/2020 12:30
728 x 90

Rusiyalı azərbaycanlı senatordan Azərbaycan deputatlarına – “cib deputatları, boz kardinalların idarə etdiyi kuklalar"...

img

Azərbaycan əsilli rusiyalı keçmiş senator Fərhad Əhmədov özünün “Facebook” səhifəsində Milli Məclisin buraxılması və növbədənkənar parlament seçkilərinin təyin olunması ilə bağlı geniş təhlilli məqalə paylaşıb.

Ölkənin gündəm mövzusu olduğundan, bu mövzuda hər kəs tərəfindən sosial şəbəkələrdə müzakirələrin açılması və paylaşımların edilməsi təbiidir. Lakin Fərhad Əhmədovun paylaşımı onun bu məsələyə bir qədər fərqli baxış bucağı ortaya qoyduğunu göstərir. Belə ki, rusiyalı senator həmin məqaləsində “boz kardinalların idarə etdiyi cib deputatları” kimi kəskin ifadələr işlədib: “Boz kardinallar və hakimiyyətə yaxın dairələrin orada özlərinin “cib deputatları” vardı. Ona görə də başa düşürəm ki, bu ekipajla uzağa və hündürdən uçmaq təhlükəlidir. Deputat korpusunun keyfiyyət baxımından yenilənməsi lazımdır. İndi “kuklaoynadanlardan” qurtulmuşuq…”.

Maraqlıdır, bu sözlərin birbaşa ünvanı olan şəxslər – sabiq deputatların sözügedən ittihamlara münasibəti necədir?

  • Fazil Mustafa: “Deputatlara yönəlik o cür fikirlərini qəbul etmirəm”

Məsələyə münasibət bildirən millət vəkili Fazil Mustafanın sözlərinə görə, sözügedən ifadələr reallıqdan uzaq fikirlərdir: “Guya təhlil xarakterli yazı ilə çıxış edib, amma sözügedən yazı səviyyəli deyil. Orada səslənən mühakimələr və mülahizələr çox bəsiddir. Eyni zamanda, çoxsaylı natamamlıq var. Görünən odur ki, parlamentin fəaliyyəti barədə yetərincə məlumata malik deyillər. Yəni kənardan bu cür məsələlərə yanaşanda daha dolğun təhliletmə qabiliyyəti ortaya qoyulmalıdır. Ümumi sözlərlə hansısa bir məsələni bu cür qabartmaq olmaz. Təbii ki, parlamentin də fəaliyyətində nöqsanlar olub. Ancaq bu nöqsanlar başqa və daha dərin analizlə təhlil oluna bilərdi. O baxımdan deputatlara yönəlik o cür fikirlərini qəbul etmirəm. Onun yazısı daha çox hansısa bir analitik qrupun hazırladığı və bir nəfərin adından elan olunan yazıdır. Bununla yanaşı, hesab edirəm ki, Azərbaycan reallığını doğru anlamadan yazılan bir yazıdır”.

  • Elman Nəsirov: “...Fərhad Əhmədovun yaşına uyğun olmayan ifadələrdir”

Digər millət vəkili Elman Nəsirov da Fərhad Əhmədovun səsləndirdiyi fikirləri qəbul etmədiyini bildirdi: “Deputatlarla bağlı fikir söyləyərkən ifadələrin seçimində olduqca diqqətli və həssas olmaq lazımdır. Yaxşı olardı ki, F.Əhmədov bunu konkret misallar əsasında söyləsin. Ümumiyyətlə, sonuncu parlamentdə fəaliyyətindən narazı olduğu deputatlar haqqında tənqidi fikirlərini arqumentlərlə səsləndirsin. Ancaq kül halında bütün deputatları “cib deputatı”, “kuklaoynadan” adlandırmaq, ən azından, F.Əhmədovun yaşına uyğun olmayan ifadələrdir. Parlamentdə kifayət qədər dövlətçilik mövqeyindən çıxış edən fəal deputat var. Ona görə də bütün deputatlara eyni prizmadan yanaşmaq düzgün deyil. F.Əhmədov biznes adamıdır. Dünyadakı biznes adamları içində yaxşıları da var, pisi də. Xalqına faydası dəyənlər də var, dəyməyənlər də. Ona görə də bu cür yanaşma F.Əhmədova başucalığı gətirmir”.

Digər deputatların fikirlərini öyrənmək mümkün olmadı.

Vidadi ORDAHALLI

Son xəbərlər