28/01/2020 10:39
728 x 90

"EuroHome" yanğını barədə radikalların fantaziyalı arqumenti - dövlət onsuz da yardım və kompensasiya ayırır, yandırmaq nəyə lazım idi...

Rasim Quliyev: “Bu iddianı ortaya ancaq dövləti sevməyən adamlar ata bilər”

img

Xəbər verdiyimiz kimi, Bakı şəhəri, Binəqədi rayonu ərazisində yerləşən "EuroHome" tikinti materialları bazarında dəhşətli yanğın baş verib. Yanğın nəticəsində bazarın böyük hissəsi yanıb, sahibkarlara külli miqdarda ziyan dəyib. Belə yanğınların baş verməsində sahibkarların məsuliyyətsizliyi danılmazdır. Ancaq əksər hallarda bu cür yanğınların törənmə səbəbləri ilə bağlı yanlış məlumatlar dövriyyəyə buraxılır.

Xüsusən də xaricdə olan bəzi internet kanalları və daxildəki radikal qüvvələr sosial şəbəkələr üzərindən əhalini çaşdıran təbliğat aparmaqla məşğul olurlar. Biz son yanğın hadisəsi zamanı da analoji davranışların şahidi olduq. Əsasən də belə bir fantaziyalı arqument səsləndirirlər ki, sözügedən bazar yolun kənarında olduğu üçün, Bakı-Sumqayıt magistral yolunun genişləndirilməsi məqsədilə yandırılıb. Təbii ki, bu, inandırıcı versiya deyil və daha çox təxribat xarakteri daşıyır. Çünki Azərbaycan hakimiyyəti indiyə qədər icra etdiyi bütün böyük layihələrdə əhalini tam razı salıb, onlara lazım olan miqdarda vəsaitləri tam ödəyib. Belə olan təqdirdə, hansısa layihənin icrası üçün bazarı yandırmağa ehtiyac varmı? Bundan əlavə, müşahidələr göstərir ki, oranı sökmədən də genişləndirmək mümkündür. Çünki ana yoldan "EuroHome" arasında ən azı 20 metr məsafə var.

  • “Hətta yansa belə, həmin obyektə görə kompensasiya ödənilməlidir”

 “Resurs” Analitik İnformasiya Mərkəzinin rəhbəri Rasim Quliyev “Bakı-Xəbər”ə açıqlamasında bildirdi ki, dövlət layihələrinin həyata keçirilməsi üçün işlər əvvəlcədən planlaşdırılır: “Orada ticarət obyektləri və əhaliyə məxsus evlərin də köçürülməsi nəzərə alınır. Onların köçürülməsi üçün büdcədən vəsait ayrılır və həmin məbləğ layihənin smetasına daxil edilir. Təcrübədə belə nümunələri çox göstərmək olar. Azərbaycan hakimiyyətinin həyata keçirdiyi bütün xırda və meqalayihələr zamanı vətəndaşların mülkiyyət hüququ birmənalı sürətdə qorunub. Hətta ortaya çıxan müəyyən mübahisəli məsələlər də ədalətli şəkildə həll edilir. Vətəndaşın faktiki istifadəsində olan, hüquqi cəhətdən ona aid olmayan əmlaka da kompensasiya ödənilir. Şəxsən mən bunun dəfələrlə şahidi olmuşam. Buna görə də son yanğın hadisəsi ilə bağlı səslənən iddiaları tamamilə absurd sayıram. Gülməli məsələdir, dövlət adından kim gedib od vurub başqasının obyektini yandıra bilər? Burada konkret maraqlı olan bir qurum da yoxdur ki, əlinə odu alıb yanğın törətsin. Çünki həmin işlərin görülməsində bir neçə qurum iştirak edir. Yanğın hadisələrinin araşdırılması da həyata keçirilir. Mütəxəssislər araşdırdıqdan sonra son hadisəyə də ətraflı qiymət verəcəklər. Bu məsələlər hüquqi müstəvidə həllini tapacaq. Bunu dövlətin hər hansı bir layhəsinin adı ilə hallandırmaq təxribatdan başqa nəsə deyil. Bu iddianı ortaya ancaq dövləti sevməyən adamlar ata bilər. İri layihələr hər hansı ərazidən keçirsə, orada olan özəl obyektin ödənişi mütləq olmalıdır. Hətta yansa belə, həmin obyektə görə kompensasiya ödənilməlidir”.

Məhəmmədəli QƏRİBLİ

Son xəbərlər