Sabiq prezident Serj Sarkisyan “Qarabağ klanı”na xəyanət etdi...
Məlum olduğu kimi, bir neçə gün öncə Ermənistanın sabiq prezidenti Serj Sarkisyana 1 milyon dollar pulu mənimsəmə işini təşkil etməklə bağlı ittiham irəli sürülüb. O, dizel yanacağı tenderini öz yaxını Barseq Bəyləryana məxsus “Fleş”ə verib. Ermənistan Respublika Partiyası artıq bu ittihamı “siyasi təqibin qalmaqallı təzahürü” kimi qiymətləndirib.
Partiya üzvlərinin sözlərinə görə, Sarkisyanın son müsahibələri fəaliyyətdə olan hakimiyyəti narahat edib, buna görə də ittiham irəli sürülməsinin məqsədi siyasi əleyhdarları susdurma cəhdi hesab olunur.
Ermənistan parlamentinin deputatı Kristine Poqosyanın sözlərinə görə, Sarkisyanı bununla yanaşı, həm də qarşıda “1 mart” işi gözləyir:“Sarkisyanın qarşıda “1 mart” işi var və Aprel döyüşlərini araşdıran istintaq komissiyasına gəlməlidir. Onu maraqlı günlər gözləyir”.
Bütün bunlar sabiq prezidentin həbsə atılmasını qaçılmaz edir. O da aydındır ki, Sarkisyan həbsə atıldığı halda “Qarabağ klanı”nın Ermənistanda mövqeyi xeyli sarsılacaq. Artıq o da məlum olub ki, hakimiyyət Sarkisyanın Avropaya, həmçinin Rusiyaya gözlənilən səfərlərinin də qarşısını alıb. Məsələ burasındadır ki, ilkin istintaq orqanı ittiham olunan, barəsində ehtiyat tədbiri seçilən şəxslərdən pasportu götürür və onlar ölkədən çıxa bilməzlər. Məlumata görə, Sarkisyanın da pasportu əlindən alınıb. Lakin bütün bunların həm də bir şou olduğuna dair də məlumatlar səslənir.
Ermənistanın “1in.am” portalı yazır ki, ümumiyyətlə, Sarkisyan ətrafında proseslər çox maraqlı müstəvidə cərəyan edir:“Serj Sarkisyan hakimiyyətinin oğru, korrupsioner xarakterli olması aşkardır və aydındır ki, kriminal oliqarxiyanın 20 illik hakimiyyəti konkret adamların, respublikanın ikinci və üçüncü prezidentlərinin və onların ətrafının acgözcəsinə varlanmasına xidmət edib. Bu mənada, Serj Sarkisyana qarşı irəli sürülmüş ittiham nəinki obyektivdir, eyni zamanda gözlənilən və öncədən görüləndir.
Lakin bütün problem ondadır ki, cəmiyyət Serj Sarkisyana qarşı daha ciddi ittiham gözləyirdi. Amma ona qarşı yalnız 1 milyon dollarlıq mənimsəmə faktı ilə bağlı cinayət işi qaldırılıb. Heç bir halda Sarkisyana qarşı irəli sürülmüş ittihamın obyektivliyini, qanunauyğunluğunu şübhə altına almaq lazım deyil, lakin bu ittiham zəifdir və belə təəssürat yaranır ki, cəmiyyətdə inqilab komandası və onun, guya gizli danışıqlarının olması haqqında gedən söz-söhbət kəsilsin deyə üçüncü prezident müttəhim statusu alıb. Digər tərəfdən, Serj Sarkisyan həbs olunmayıb. Bu da təlqin edir ki, mövcud hakimiyyət Ermənistan Respublika Partiyasına və onun liderinə manevr etmək və siyasi möhtəkirliklə məşğul olmaq imkanı yaradaraq, “məxməri” münasibət göstərməyə davam edir. Sarkisyana qarşı irəli sürülən ittiham tamdəyərli deyil, yarımçıqdır. Bu da onun Zaqrebdəki çıxışının və ya son dövrlərdəki aktivliyinin hakimiyyətdə “narahatlıq” yaratması haqqında illüziya yaradaraq, siyasi manipulyasiyalar, möhtəkirliklər üçün pəncərə açır.
Serj Sarkisyan əvvəlki sistemin cinayət simvollarından biridir və 1 mart hadisələrinə görə Robert Köçəryanla birlikdə eyni dərəcədə məsuliyyət daşıyır. Hakimiyyət Sarkisyanı manevr etmək imkanlarından, təqib olunan siyasi xadim obrazı əldə etməkdən məhrum etmək üçün onun cinayətkar obrazını tamamlamağa məcburdur. Maraqlıdır ki, belə bir vaxtda “Çiçəklənən Ermənistan” Partiyasından olan deputat Gevorq Petrosyan “məxməri inqilab”ətrafında yeni hakimiyyətlə Serj Sarkisyan arasında əldə edilən razılaşmalardan danışaraq bəyan edib ki, bu iqtidarın hakimiyyətə gəlməsi üçün Serj Sarkisyana nə qədər borclu olduğunu dəqiq bilmir. Yəni Gevorq Petrosyan iddia edir ki, Nikol Paşinyan məhz Sarkisyanla hansısa razılaşma əsasında hakimiyyətə gəlib və bu səbəbdən sabiq prezidentə qarşı sərt ittihamlar, çoxsaylı cinayət işlərində iştirakla bağlı məsuliyyət məsələsi qaldırılmır.
Petrosyan kifayət qədər maraqlı alt mətnlərdən danışır. Lakin istənilən halda, Gevorq Petrosyanın bəyanatı onun şəxsi fikirlərini deyil, ən azı, başda Haqik Tsarukyan olmaqla, “Çiçəklənən Ermənistan” Partiyasının müəyyən dairəsinin onun ağzı ilə ifadə olunan fikirlərini əks etdirir. Bundan bir neçə gün öncə Tsarukyan başqa mövzu haqqında danışarkən “Gevorq hər şeyi düz edir” deyərək, özü bunu təsdiqləyib. Deməli, Gevorq Petrosyanın ağzı ilə, praktiki olaraq, Tsarukyan yeni hakimiyyətlə Serj Sarkisyan arasında razılaşmalardan danışır. Ən azı, heç nə bilməməsi kontekstində… Bu halda, ən əhəmiyyətli olan eyhamdır. Özü də Serj Sarkisyanın həbsi fonunda. Hər şeydən göründüyü kimi, eyhamın bir tərəfi ondan ibarətdir ki, tərəflərdən hansı birisə razılaşmanı pozub.
Lakin eyhamın digər tərəfində daha diqqətəlayiq cəhət ola bilər. Belə ki, Serj Sarkisyana qarşı ittiham irəli sürülməsinə baxmayaraq, “Çiçəklənən Ermənistan” Partiyası və ən azı, köhnə sistemin müəyyən hissəsi “Çiçəklənən Ermənistan” Partiyasının ağzı ilə bəyan edir ki, bu ittihama “inanmır”. Fakt budur ki, köhnə sistemin Serj Sarkisyana qarşı başqa ittihamı var: o, hakimiyyəti təhvil verib və hamını fakt qarşısında qoyub. Mühüm deyil ki, təhvil verib və ya saxlaya bilməyib, uduzub və sair. Mühüm olan odur ki, bu ittiham və onunla birlikdə, hər halda, onun uduzmadığı, hakimiyyəti təhvil verdiyi haqqında bir şübhə mövcuddur. Bunu Gevorq Petrosyanın eyhamı da təsdiqləyir. İstənilən halda, maraqlıdır, görəsən, Tsarukyan bu dəfə də deyəcək ki, Petrosyan düz danışır? Bununla birlikdə, Petrosyanın eyhamı bu fonda, “Mənim addımım” blokunun və “Çiçəklənən Ermənistan” Partiyasının münasibətlərinin kəskinləşdiyi, Nikol Paşinyanın bu partiyaya qapını göstərdiyi bir vaxtda da maraqlıdır.
Deyəsən, “Çiçəklənən Ermənistan” Partiyası parlamentin işinin uzunmüddətli boykot edilməsi haqqında qərar qəbul etməyə cəsarət etməyib. Bu, əlbəttə, rasional addımdır, lakin “Çiçəklənən Ermənistan” Partiyasının həm parlamentdə, həm də parlament xaricində ata biləcəyi addımlar əhəmiyyətli dərəcədə məhdudlaşıb. Və görünür, bu durum Tsarukyanı belə düşünməyə məcbur edir ki, o, inqilaba su verməyinə baxmayaraq, onu sulamayıb, bəlkə də “Çiçəklənən Ermənistan” Partiyasının siyasi yolunu qurudub”. Bütün bu qeyd edilənlərdən aydın görünür ki, Ermənistanda maraqlı siyasi proseslər cərəyan edir. İndi bu fonda Sarkisyan həbsə atılmasa, bu onun Paşinyanla həqiqətən müəyyən razılaşması olduğunu təsdiqləyəcək. Eyni zamanda bu hal Sarkisyanın “Qarabağ klanı”na xəyanətini də üzə çıxaracaq.
Ramil QULİYEV
