Paşinyan “Qarabağ klanı”nın daha bir nəhəng fiqurunu məhv edir – keçmiş prezidentə rəsmi korrupsiya ittihamı…
Ermənistan daxilində baş verən son olaylar burada hakimiyyətlə “Qarabağ klanı” arasında çəkişmənin hələ tam bitmədyini göstərir. Belə bəlli olur ki, gələn il Azərbaycanın zəbt edilmiş ərazilərində yaradılan separatçı rejim rəhbərliyinə keçriləcək “seçkilərə” az müddət qaldığı bir vaxtda tərəflər arasında çəkişmənin daha da dərinləşməsi özünü qabarıq formada büruzə verir. Bu fonda baş nazir Nikol Paşinyan “Qarabağ klanı”nın əsas liderləri sayılan Robert Köçəryandan sonra Serj Sarksiyanı da tam şəkildə neytrallaşdırmağı düşünür. Onun barəsində yeni cinayət işinin açılması da elə buna xidmət edir.
Xatırladaq ki, Serj Sarkisyan 2013-cü il yanvarın 25-dən fevralın 7-dək bir qrup məmurdan 489 milyon dram, yəni 1 milyon dollardan çox pulu mənimsəmə, oğurlama və israf etməkdə ittiham olunur. Onun barəsində ölkədən çıxmağa qadağa qərarı qəbul edilib. Ona qarşı ilkin istintaq araşdırmaları çərçivəsində Ermənistan Cinayət Məcəlləsinin 38-179-cu maddələrinə (mənimsəmə və israfçılıq) əsasən ittiham irəli sürülüb. İttihama görə, 24 yanvar 2013-cü ildə hökumət torpaq istifadəçilərinə dövlət dəstəyi proqramını təsdiqləyib. Proqrama əsasən, təxminən 17 milyon litr dizel yanacağı satılıb. Məbləğ regional idarəetmə və Kənd Təsərrüfatı Nazirliyi sisteminin müraciətləri əsasında ayrılıb.
"Maksxur” və "Fleş” şirkətləri də daxil olmaqla, dizel yanacağının tədarükünə görə keçirilən tenderdə iştirak üçün bir neçə şirkət ərizə təqdim edib. "Maksxur” daha aşağı qiymət təklif edib. Nəticədə bu şirkətin müraciəti hökumət tərəfindən təsdiqlənmək üçün Kənd Təsərrüfatı Nazirliyi tərəfindən təqdim edilib. Serj Sarkisyan "Maksxur”un daha sərfəli təklifini bilə-bilə ona məhəl qoymayıb və rəsmi mövqeyindən istifadə edərək tabeliyindəki şəxslərə "Fleş” şirkətinin xeyrinə seçim etməyi tapşırıb. Nəticədə, hökumətin 7 fevral 2013-cü il tarixli qərarı ilə 17 milyon litr dizel yanacağı almaq üçün hökumətin ehtiyat fondundan Kənd Təsərrüfatı Nazirliyinə 1,7 milyard dramdan çox vəsait ayrılıb. Bu pul "Fleş” şirkətinin hesablarına köçürülüb. Sonradan hökumətin qərarı ilə tələb olunan yanacağın miqdarı 17 milyon min litrə qədər artıb, məbləğ isə 1,82 milyard drama çatıb. Lakin proses "Maksxur” şirkəti vasitəsilə həyata keçirilsəydi, həmin məbləğ daha az olardı. Nəticədə dövlət büdcəsindən 489 milyon 160 min dram oğurlanıb. Həmin pulun da məhz Sarkisyana çatdığı bildirilir. Artıq baş verənlər çərçivəsində Sarkisyan Ermənistan Xüsusi İstintaq Xidməti tərəfindən sorğu-sual edilib. Erməni mediası Sarksiyanın da tezliklə Köçəryanın yanına gedəcəyini yazır. Ermənistanın “Adekvat” partiyasının sədri Artur Danielyan məsələ tlə bağlı bildirir: “Ermənistanın üçüncü prezidenti Serj Sarkisyan keçmiş kənd təsərrüfatı naziri Serqo Karapetyandan alınmış ifadələr əsasında müttəhim kimi cəlb olunub. Sarkisyan hansısa xidməti dizel çeklərinin tullantılarında ittiham olunur. Amma reallıq budur ki, bu hal Paşinyanın qisasının davamıdır. O, Sarksiyanı mütləq qaydada həbs etmək istəyir”. Erməni politoloq Qrant Məlik-Şahnazaryan isə bildirir: “Serqo Karapetyanı xatırlayırsınız, elə deyil? Əvvəlcə kənd təsərrüfatı naziri işləyirdi. Deyim bilin, onun adı artıq hər zaman sizin dilinizdə olacaq. Sizin və nəsillərin. Çünki xainlər unudulmur, hər zaman xatırlanır”. O bildirib ki, Paşinyan Serj Sarkisyanı təcrid edərək “Qarabağ klanı”nın müqavimətini poza biləcəyini düşünürsə, çox pis yanılır: “Kim xəbərdar deyilsə, deyim, o elə bir sənədə imza atdı ki, bunun nəticəsində əvvəlcə Serj Sarkisyan həbs olunacaq, “Qarabağ klanı” sıradan çıxarılacaq, sonra da Qarabağ məsələsi, yumşaq dildə desək, qeyri-ermənipərəst həll mərhələsinə daxil olacaq. Qarabağ məsələsində istənilən antierməni proqramının, sözünün, hətta vergülün əks-təsiri çox güclü olacaq”.
Baş verənlərlə bağlı Serj Sarkisyan özü bildirir ki, Xüsusi İstintaq Xidməti tərəfindən verilən saxta və cəfəng ittihamlarla özünü günahkar hesab etmir, bunu siyasi təqib hesab edir. Sarksiyanın sədri olduğu Respublika Partiyasının ali orqanının bəyanatında isə bildirilir: “Təqdim olunan ittihamın yalan və absurd olduğunu nəzərə alaraq bəyan edirik: 1. Biz Serj Sarkisyana qarşı ittihamın siyasi təqiblərin ifrat təzahürü olduğunu düşünürük. 2. Bu prosesin məqsədi Ermənistan və Qarabağ üçün təhdidlər fonunda, o cümlədən danışıqlar prosesindəki son hadisələr kontekstində siyasi rəqibləri susdurmaqdır. 3. Hakimiyyət belə amansız addımları ilə erməni xalqının diqqətini ölkədə hər gün daha da gərginləşən bir çox problemlərdən yayındırmağı hədəfləyir. 4. Qondarma “antikorrupsiya mübarizəsi” çərçivəsində milli məsələlərə dair bu ibtidai tövsiyələr məhvə məhkumdur, çünki həm Respublikaçıların, həm də digər siyasi qüvvələrin və ictimaiyyətin sarsılmaz müqavimətinə rast gələcək.
5. Bu proses üçün bütün məsuliyyət Ermənistanda hakimiyyəti ələ keçirmiş populist və avtoritar rejimin üzərinə düşür. 6. Respublika Partiyası bu məsələni və onun ətrafında baş verən hadisələri müvafiq beynəlxalq platformalarda və formatlarda da qaldıracaq”.
Amma erməni mediası qeyd edir ki, Paşinyan Sarksiyanı istənilən halda həbsə atmaqda israrlıdır. Bununla o, “Qarabağ klanı”nı əhəmiyyətli dərəcədə zəiflədərək, ona qarşı ciddi müqavimət təşkil edə bilənləri tam sıradan çıxaracaq. Digər tərəfdən, bununla Paşinyan Qarabağ separatçılarının rəhbəri vəzifəsinə də istədiyi şəxsi gətirə biləcək. Robert Köçəryan olayı isə göstərdi ki, Sarkisyanın həbsinə görə də Paşinyan xaricdən hansısa ciddi təhdidlə üzləşməyəcək. Yəni indiki halda bu təhdidi yarada biləcək Rusiya Sarkisyana görə Paşinyanı küncə sıxışdırmayacaq. Elə bu da Ermənistanda “Qarabağ klanı”nın tam sıradan çıxarılmasını istisna etmir.
Nahid SALAYEV
