Azərbaycan Respublikasının Prezidenti İlham Əliyev dekabrın 5-də Şamaxıda “ASAN Həyat” kompleksinin açılışında ölkədə korrupsiya və rüşvətin qarşısının necə alınması ilə bağlı fikirlər səsləndirib: “Bilirsiniz, korrupsiya və rüşvətxorluq bizə qalan mirasdır. Ona görə bundan canımızı qurtarmaq üçün, əlbəttə ki, həm maarifləndirmə işləri aparılmalıdır, düzgün siyasət aparılmalıdır və nəsillər dəyişməlidir. Mənim ümidim gənclərədir. Çünki gənclər yeni mühitdə, müstəqillik dövründə formalaşır”.
Dövlət başçısı bildirib: “Əlbəttə, indi bizim dövrümüzdə də pozuntular, çatışmazlıqlar var. Amma məsələ ondadır ki, biz bunlarla necə mübarizə aparırıq. Mən bir daha demək istəyirəm ki, biz bu mübarizədə təkcə inzibati, yaxud da ki, cəza tədbirləri ilə məqsədə müvəffəq ola bilmərik. Bütün bu tədbirlərlə yanaşı, institusional, sistem xarakterli islahatlar aparılmalıdır. İslahatların yeni dövrü keçən il prezident seçkilərindən sonra başlamışdır. Mən andiçmə mərasimindəki çıxışımda bizim əsas strateji inkişaf parametrlərini xalqın diqqətinə çatdırdım və hazırda biz ardıcıllıqla bu yolla gedirik.
Baxın, Prezident Administrasiyası tamamilə yenidən formalaşıb, gənclər cəlb olunub. Nazirlər Kabineti yenidən formalaşıb, gənc nəsil cəlb olunur. İndi artıq növbədənkənar parlament seçkiləri elan olunub. Ümid edirəm ki, gənclər də bu seçkilərə çox fəal qoşulacaqlar. Çünki yeni simalar, yeni ideyalar, yeni yanaşma lazımdır. Eyni zamanda, mən onu da bildirməliyəm ki, biz nəsillər arasında ziddiyyətlərə yol verə bilmərik. Çünki bu, hər bir cəmiyyətdə var. Yaşlı nəsildən olan bir çoxları həmişə gənc nəsildən narazıdır. Ona görə biz bunu başa düşməliyik.
Nəsillər arasındakı anlaşılmazlıq hər bir cəmiyyətdə var. Amma bizim cəmiyyət mühafizəkar cəmiyyətdir, konservativ cəmiyyətdir və ənənəvi dəyərlər üzərində qurulmuş cəmiyyətdir. Biz, əlbəttə, imkan verə bilmərik ki, bu təbii ziddiyyətlər hansısa böyük bir problemə çevrilsin. Ona görə, mən demişəm və mən gəncləri işə fəal cəlb etməyə başlayanda gördüm ki, yaşlı nəslə qarşı elə bil hansısa bir kampaniya aparılır. Onu da mən dayandırdım. Çünki yaşlıların təcrübəsi, gənclərin müasirliyi və bunun vəhdəti bizə xeyir gətirəcək. Siz və “ASAN xidmət”də çalışanların mütləq əksəriyyəti cavanlardır. Amma yaslı nəslə xidmət edirsiniz. Çünki bu xidməti almaq üçün daha çox yaşlı nəslin nümayəndələri gəlirlər. Bax, bu nəzakətli davranış, bu mehribanlıq, xoş sözlər bizim cəmiyyətimizi də saflaşdırır və irəliyə aparır”.
Göründüyü kimi, ölkə başçısı bütün istiqamətlər üzrə gənclərin roluna böyük dəstək verdiyini açıqlayıb. Hətta korrupsiya və rüşvətxorluqla mübarizədə effektiv nəticə əldə etmək üçün, nəsillərin dəyişməsinə böyük ehtiyacın olduğunu vurğulayıb. Ölkəni deyilən bəladan tam qurtarmaq üçün Prezidentin təklif etdiyi nəsillərin dəyişməsi ilə bağlı model nə dərəcədə effekli rol oynaya bilər?
Rauf Zeyni: “Həmin komaların, dar küçələrin yerində cənnəti yaradan ölkə başçısı, inanıram ki, korrupsiyanı da beyinlərdən silməyə nail olacaq”
Milli Qeyri-Hökumət Təşkilatları Forumunun prezidenti Rauf Zeyni “Bakı-Xəbər”ə açıqlamasında bildirdi ki, cənab Prezidentin hər çıxışı konkret nəticələrə hesablanır: “Ölkə başçısı hazırda həyata keçirilən islahatların anonsunu da əvvəlcədən vermişdi. Xüsusilə də son inaqurasiya çıxışında bu barədə ətraflı danışıb. Ölkənin inkişafını ləngidən bütün amillərlə mübarizəyə start verilib. Biz bunun işartılarını həm kadr islahatları, həm də struktur islahatlarda görürük. Bu iki amilin təsiri ilə bağlı çox danışılıb. İnkişafın qarşısını alan mühüm amillərdən biri də korrupsiya və rüşvətdir. Bu bəla bütün ölkələrdə var. Ancaq o demək deyil ki, seyrçi qalmalıyıq. Ölkədə korrupsiya ilə ciddi mübarizə aparılır. Ancaq ölkə başçısının da dediyi kimi, bunu yalnız inzibati amillərlə yox, həm də maarifləndirmə ilə həyata keçirməliyik. Ən başlıcası isə düzgün kadrların seçimi ilə. Təbii ki, burada nəsillərin dəyişməsinin böyük əhəmiyyəti ola bilər. Çünki indiki gənclər müstəqil Azərbaycanda böyüyüblər, tam fərqli baxışları var. Prezidentin təklif etdiyi model çox unikaldır. Biz hamımız bu məsələdə ona dəstək olmalıyıq. Xüsusilə də vətəndaş cəmiyyətinin təmsilçilərini öz ətrafında birləşdirən qurum kimi biz həm maarifləndirmə, həm də lazımi kadrların idarəetməyə təqdimatı ilə islahatlara öz töhfəmizi verə bilərik. Görün, Prezident ölkəmizə nələr bəxş edib. Köhnə “Sovetski” məhəlləsi yadınızdadır. İndi gedin ora baxın. Həmin komaların, dar küçələrin yerində cənnəti yaradan ölkə başçısı, inanıram ki, korrupsiyanı da beyinlərdən silməyə nail olacaq. Bəli, bu bəlaya münasibət dəyişməlidir və onu beyinlərdən silmək gərəkdir”.
Məhəmmədəli QƏRİBLİ
