Ermənistanın Baş naziri Nikol Paşinyan və onun həyat yoldaşı Anna Akopyanın məsuliyyətsiz davranışları və çıxışları Ermənistanın daxilində də böyük narazılığa səbəb olub. Hətta vəziyyət o yerə çatıb ki, erməni müxalifətinin bir qismi bu cütlüyün psixi durumunun yoxlanılması ilə bağlı təşəbbüsə başlayıb.
"Sağlam Cəmiyyət" ictimai təşkilatının sədri, İrəvan Ağsaqqallar Şurasının keçmiş üzvü Marina Xaçatryan jurnalistlərlə görüşündə bu məlumatı təsdiqləyib. O əlavə edib ki, indiki hökumət və parlament qovulmalı, yeni hakimiyyət formalaşdırılmalı, habelə vəzifəli şəxslərə əlavə tələblər qoyulmalıdır.
M.Xaçatryan vurğulayıb ki, mütləq təhsil senzi tətbiq edilməli, habelə psixi xəstəliklər də daxil olmaqla, bir sağlamlıq arayışı tələb etmək lazımdır ki, indiki hakimiyyətdə olanlar kimi psixi xəstələr bir də hakimiyyətə gələ bilməsinlər. O əlavə edib ki, onların təşəbbüsü ilə maliyyə vəsaiti toplanıb və Paşinyanın və həyat yoldaşının psixi vəziyyətinin müayinəsinin keçirilməsi məqsədi daşıyır. Həmçinin onu da qeyd edib ki, N.Paşinyanın həyat yoldaşı A.Akopyanın Qarabağa getməsinə qadağa qoyulmalıdır və fikrini onunla əsaslandırıb ki, Akopyanın Azərbaycan Respublikasının Birinci vitse-prezidentini Qarabağa dəvət etməsi böyük səhvdir.
Erməni müxalifətinin bu təşəbbüsü hansı reallıqları özündə əks etdirir?
Ruslan İzzətli: “Sifət cizgilərində, nitqində gərginliyin əlaməti sezilir”
D18 Hərəkatının rəhbəri Ruslan İzzətli “Bakı-Xəbər”ə açıqlamasında bildirdi ki, Paşinyan barəsində belə mövqenin meydana çıxmasında əsaslı səbəblər var: “Ermənistanı uzun müddət Köçəryan-Sarkisyan cütlüyü idarə edib. Onlar “Qarabağ klanı”nın nümayəndəsi sayılırdı. Qarabağ müharibəsində əldə etdikləri “uğurları” daxili auditoriyada öz reklamları üçün istifadə edirdilər. Bunun fonunda isə ölkədə heç bir demokratik addım atılmadı. Baş verən inqilabdan sonra Paşinyandan gözləntilər çox idi. Təəssüf ki, Paşinyan da başqa addımlar atmaq əvəzinə, Qarabağ kartından daxili auditoriyanı ələ almaq üçün istifadə etdi. Bunun fonunda da bəzi məsuliyyətsiz bəyanatlar səsləndirdi. Mən beynəlxalq tədbirlərdə erməni nümayəndələrlə söhbətlər zamanı onlara bildirmişəm ki, ölkələri Cənubi Qafqazda sülhün və təhlükəsizliyin təminatında mühüm rol oynaya bilər. Təəssüf ki, həmin ölkə bunu anlamır və daha çox Rusiyanın diqtəsi ilə hərəkət edir. Bunun üçün irqçi və bölücü siyasətdən əl çəkilməlidir. Mən Paşinyanın bir çox çıxışını izləmişəm. Siyasətdə diletantlığı özünü tam göstərir. Sifət cizgilərində, nitqində gərginliyin əlaməti sezilir. Hiss olunur ki, nəyin bahasına olursa-olsun, duruş gətirməyə çalışır. Təbii ki, bu cür hal da onun hərəkətlərində, atdığı addımlarda özünü göstərir. Erməni müxalifəti bunları əsas tutaraq belə qənaətə gəlir. Yəqin ki, bizim müşahidə etdiyimiz amilləri onlar da görə bilirlər. Ölkəyə rəhbərlik edən şəxslər siyasətlə peşəkarcasına davranmayanda belə mülahizələrin ortaya çıxması tam normaldır”.
Məhəmmədəli QƏRİBLİ
