30/01/2020 00:37
728 x 90

Prezident ASAN modelini xaricdə müəyyən gözdənsalma təxribatlarından qorumağın mühüm şərtini açıqladı…

Əliməmməd Nuriyev: “…rəqabətə qalib gəlmək üçün…”

img

İnnovativ texnologiyalardan istifadə imkanları ilə fərqlənən Azərbaycanda ən qabaqcıl texnologiyaların tətbiq edilməsi, əhaliyə yüksək keyfiyyətli xidmətlərin göstərilməsi, cəmiyyətdə informasiya texnologiyalarından istifadəyə əlverişli şəraitin yaradılması üçün məqsədyönlü işlər davamlı olaraq həyata keçirilir.

Dövlət proqramları, aparılan islahatlar, həyata keçirilən layihələrin məntiqi olaraq, artıq ölkəmizdə elektron hökumətin yaradılması, informasiya təhlükəsizliyi və digər məsələlərin həlli istiqamətində mühüm addımlar atılıb. Təbii ki, elektron xidmətlər, eyni zamanda, korrupsiya hallarının qarşısının alınması və şəffaflığın təmin edilməsinin effektiv vasitələrindən biri kimi qiymətləndirilir.

Müasir dövrümüzdə “ASAN xidmət” dünyaya nümunə olan modeldir. Azərbaycan texnologiyaları əsasında, sırf Azərbaycanın intellektual məhsulu olan “ASAN xidmət”ə xarici ölkələr tərəfindən böyük maraq var. Bir sıra qonşu ölkələr özlərində Azərbaycanın brendi olan “ASAN xidmət”i tətbiq etmək istəyirlər.

Bunu Prezident İlham Əliyev Şamaxıda "Asan Həyat" kompleksinin açılışında çıxışı zamanı bildirib ki, ASAN bizim intellektual məhsulumuzdur: “Mən çox şadam ki, Azərbaycan intellektual məhsul icad edir və bunu ixrac edir. İntellektual məhsulun, xidmətlərin ixracı hesab edirəm ki, bizim gələcək fəaliyyətimizdə çox böyük diqqətə layiq olmalıdır. “Bakutel” sərgisində də mənə edilən təqdimatlar göstərir ki, biz artıq xidmətləri, o cümlədən, peyk xidmətlərini, innovasiyalarla bağlı olan xidmətləri ixrac edirik. “ASAN xidmət” mərkəzi artıq Əfqanıstanda fəaliyyət göstərir və bir neçə ölkə ilə bizim artıq anlaşma memorandumlarımız və sazişlər imzalanıb. ASAN dünyada öz fəaliyyətini genişləndirir və bizim gələcəkdə də bir çox ölkələrlə əməkdaşlığımız mümkündür. Əsas şərtimiz ondan ibarətdir ki, Azərbaycanda göstərilən xidmət orada da göstərilsin, çünki bu, bizim brendimizdir və mərkəzin adı da bütün ölkələrdə ASAN olmalıdır. Təsadüfi deyil ki, ASAN artıq beynəlxalq mükafatlara da layiq görülüb və Azərbaycanın həm intellektual brendidir, həm də bizim siyasətimizi, niyyətimizi əks etdirir. Çünki bizim siyasətimiz ondan ibarətdir ki, hər bir sahədə şəffaflıq, dürüstlük, mədəni xidmət olsun, pozuntulara yol verilməsin. Hesab edirəm ki, “ASAN xidmət” korrupsiyaya, rüşvətxorluğa qarşı ən səmərəli mexanizmlərdən biridir. Bu məsələlərlə bağlı köklü tədbirlər görülür. Azərbaycanda korrupsiyanı, rüşvətxorluğu aradan qaldırmaq, yaxud da ki, əhəmiyyətli dərəcədə azaltmaq üçün əməli tədbirlər görülür. Bu tədbirlər həm nəticə verir, həm də verəcək. Ona görə inzibati tədbirlərlə, cəza tədbirləri ilə yanaşı, institusional tədbirlər də görülməlidir ki, biz korrupsiyanın və rüşvətxorluğun əhatə dairəsini daraldaq və beləliklə, Azərbaycanı müasir, çox sürətli inkişaf yoluna gətirək. Biz buna nail oluruq”.

Qeyd etdiyimiz kimi, əksər xarici ölkə “ASAN xidmət” modelindən yararlanmaq istəyir. Hətta bir sıra ölkələr bu modelin ixrac olunması üçün danışıqlar aparmaq niyyətindədirlər.

Ancaq nəzərə almaq lazımdır ki, “ASAN xidmət” sırf Azərbaycana məxsus modeldir. Bu model ixrac olunarkən necə etmək lazımdır ki, onun nüfuzuna xələl gətirilməsin? “ASAN xidmət”in imici Azərbaycanda necə qorunub saxlanılırsa, ixrac olunduğu ölkələrdə eyni vəziyyətdə qalsın.

  • “Hansı ölkədə “ASAN xidmət” fəaliyyət göstərəcəksə, onun Azərbaycan məhsulu olması və bu imicin qorunmasına aidiyyəti qurumlar nəzarət etməlidirlər”

 “Konstitusiya” Araşdırmalar Mərkəzinin rəhbəri, hüquqşünas Əliməmməd Nuriyev “Bakı-Xəbər”ə açıqlamasında bildirdi ki, “ASAN xidmət” intellektual brenddir: “Dövlət orqanları tərəfindən göstərilən xidmətlərin dairəsi genişlənir. Bu səbəbdən də “ASAN xidmət” həm özünü inkişaf etdirməli, həm də təkmilləşdirməlidir. Bu elə bir sahədir ki, daim yenilənməli və məkrli qüvvələrə qarşı daim hazırlıqlı olmalıdır. Bunun üçün “ASAN xidmət” daim yeniliklərə hazır olmalıdır”.

Həmsöhbətimiz onu da əlavə etdi ki, hazırda xidmətlərin göstərilməsi üzrə dünyada böyük rəqabət gedir: “Rəqabətə qalib gəlmək üçün xidmətlərin inkişaf etdirilməsi ilə yanaşı, onun yanında tədqiqat mərkəzinin yaradılması vacibdir.

Azərbaycanın intellektual məhsulu olan “ASAN xidmət”in ixrac olunması müsbət haldır. Azərbaycan məhsulunun dünyada tanıdılması baxımından onun ixrac olunması əhəmiyyətlidir. Ancaq bəzi məqamlar var ki, ona xüsusi diqqət edilməlidir. Xüsusilə də hansı ölkədə “ASAN xidmət” fəaliyyət göstərəcəksə, onun Azərbaycan məhsulu olması və bu imicin qorunmasına aidiyyəti qurumlar nəzarət etməlidirlər”.

Günel CƏLİLOVA

Son xəbərlər