Azərbaycan gənclərinin intellektual, mənəvi və fiziki inkişafı dövlət üçün əsas hədəflərdən biridir. Azərbaycan Respublikasının Prezidenti İlham Əliyev dəfələrlə bəyan edib ki, dövlətimizin gələcəyi gənclərlə bağlıdır və gənclərimiz xalqımızın əsrlər boyu yaratdığı dəyərləri gələcəkdə qorumalıdırlar.
Ölkə başçısı, demək olar ki, əksər çıxışında bildirir ki, milli-mənəvi dəyərlərimizin, adət-ənənələrimizin, mədəniyyətimizin gələcəyə daşınmasında gənclərin böyük rolu var və onlar bu məsuliyyətli işi yerinə yetirməlidirlər.
Prezident İlham Əliyev Şamaxıda "ASAN Həyat" kompleksinin açılışında kompleksin əməkdaşları ilə görüşərkən gənclərin üzərinə düşən vəzifələrdən bir daha bəhs edib: “...Xalqımıza xas olan, əsrlər boyu yaşatdığımız milli-mənəvi dəyərlər də bu prinsiplər üzərində qurulub. Mən bu barədə dəfələrlə demişəm ki, bizim gənclərimiz xalqımızın əsrlər boyu yaratdığı dəyərləri gələcəkdə qorumalıdırlar, necə ki, biz qoruyuruq. Məhz o təqdirdə biz öz milli mənliyimizi, ləyaqətimizi saxlaya bilərik, qoruya bilərik. Hansısa başqa bir mühitdə əriməyəcəyik...”.
Azər Həsrət: “Gənclər Prezidentin bu mühüm çağırışından bəhrələnərək milli-mənəvi, əxlaqi dəyərlərimizin qorunmasında, onun gələcəyə daşınmasında, bununla da nəsillərarası əlaqələrin saxlanmasında mühüm rol oynamalıdırlar”
Prezidentin bu mesajının gənclər üçün mühüm istiqamət olduğunu deyən siyasi şərhçi Azər Həsrət hesab edir ki, gənclərin milli dəyərləri qoruması, onu gələcəyə aparması çox mühümdür. “Cənab Prezidentin tez-tez milli-mənəvi dəyərlərlə bağlı fikirlər səsləndirməsi təsadüfi deyil. Azərbaycan qloballaşan dünyanın bir parçasıdır və təbii ki, xüsusən də internet əsrində bizim milli-mənəvi dəyərlərimizə zidd, yad, zərərli təzahürlər rahat şəkildə ölkəmizə ayaq aça bilir. Bu zərərli təsirlərin də hədəfi ən çox gənclər olur. Cənab Prezident milli-mənəvi dəyərlərin, ümumiyyətlə, xalqımıza xas müsbət xüsusiyyətlərin qorunmasının vacibliyini tez-tez vurğulayır, bununla bağlı həyəcan təbili çalır. Biz nə etməliyik, ümumiyyətlə, gənclərimiz nə etməlidirlər? Əlbəttə, Azərbaycanda bir çox ölkədən fərqli olaraq böyük-kiçik, ağsaqqal-ağbirçək, ədəb-ərkan, əxlaq məsələləri tamamilə fərqlidir. Azərbaycanda insanlarımızın öz böyüklərinə sayğısı, əlbəttə ki, Qərb ölkələrində insanların heç təsəvvür etmədiyi bir dərəcədədir. Bu baxımdan, cənab Prezident bunun qayğısına qalmağın tərəfdarıdır”.
A.Həsrətin sözlərə görə, ölkə başçısının gənclərin milli-mənəvi dəyərlərə bağlılığının möhkəmlənməsinə yönəlik fikirlərinin ictimai qurumlar tərəfindən genişləndirilməsinə, gənclər arasında təbliğatına çalışılmalı olduğunu deyən A.Həsrət hesab edir ki, ölkə başçısı gənclərin milli-mənəvi dəyərlərə bağlı şəkildə inkişafını istəyir. “Ölkə başçısı bununla bizlərin də üzərinə bir məsuliyyət qoyur ki, gəncləri milli-mənəvi dəyərlərə sadiq şəkildə inkişaf etdirək, onlar arasında milli dəyərlərimizi təbliğ edək. Gənclər Prezidentin bu mühüm çağırışından bəhrələnərək milli-mənəvi, əxlaqi dəyərlərimizin qorunmasında, onun gələcəyə daşınmasında, bununla da nəsillərarası əlaqələrin saxlanmasında mühüm rol oynamalıdırlar. Cənab Prezident deyir ki, gənclərimiz o şəkildə tərbiyə edilməli, maarifləndirilməlidirlər ki, onlar Azərbaycan xalqına yad olan zərərli ənənələrə meyl göstərməsinlər və milli-mənəvi dəyərlərimizin sabaha daşınmasına çalışsınlar. Bu, gənclər üzərinə düşən böyük bir məsuliyyətdir ki, onlar xalqımıza xas milli-mənəvi dəyərləri gələcək əsrlərə də daşısınlar və yaşatsınlar” - deyə A.Həsrət vurğuladı.
İradə SARIYEVA
