22/09/2020 06:00
728 x 90

Minsk Qrupu həmsədrlərinin son bəyanatında maraqlı element – həmsədrlər - nümayəndə heyətləri...

Fikrət Sadıqov: “Bəyanatın həmsədr ölkələrin nümayəndə heyətlərinin rəhbərləri tərəfindən verilməsi elə bir xüsusi anlam kəsb etmir”

img

ATƏT-in Minsk Qrupuna daxil olan həmsədr ölkələrin nümayəndə heyətlərinin rəhbərləri ATƏT Nazirlər Şurasının 26-cı iclası ərəfəsində Azərbaycan və Ermənistan Xarici İşlər nazirlərinin Bratislavada keçirilən görüşü ilə bağlı birgə bəyanat yayıblar.

Nümayəndə heyətlərinin rəhbərləri təmas xətti və beynəlxalq sərhədlərdə güc tətbiqinin nisbətən azalmasını müsbət məqam kimi qəbul edərək, tərəflərin gərginlik risqinin qarşısını almaq üçün birbaşa kommunikasiya imkanından istifadə etmələrini yüksək qiymətləndiriblər. Onlar gərginliyin azaldılması və əhalinin sülhə hazırlanması üçün ötən il atılan konkret addımları alqışlayıblar.

Həmsədr ölkələrin təmsilçiləri münaqişə tərəflərinin Xarici İşlər nazirlərinin Minsk Qrupunun himayəsi altında gələn ilin əvvəlində yenidən görüşə dair razılığa gəlmələrini yüksək qiymətləndiriblər. Bəyanatda vurğulanıb ki, hazırkı status-kvo qəbuledilməzdir. Onlar tərəfləri şərtlər yaratmadan substantiv danışıqlar aparmağa çağırıblar.

Yekunda o da qeyd edilib ki, ATƏT-in Minsk Qrupu formatı münaqişənin davamlı həlli üçün səylərlə bağlı imtinaedilməz format olaraq qalır.

Son bəyanatda bəzi diqqətçəkən məqamlar var. Başlıca məqam ondan ibarətdir ki, ATƏT-in Minsk Qrupuna daxil olan həmsədr ölkələrin nümayəndə heyətlərinin rəhbərləri Bratislava görüşü ilə bağlı birgə bəyanat yayıblar. Əvvəlki bəyanatlarda bu məqam özünü göstərməmişdi O baxımdan maraqlıdır, həmsədr ölkələrin nümayəndə heyətlərinin rəhbərləri tərəfindən birgə bəyanatın verilməsi nə deməkdir? Format dəyişir, yoxsa ortada başqa məsələ var?

  • “Təəssüflər olsun ki, həmsədrlərin timsalında biz Ermənistana hansısa təzyiqlərin edilməsini görmürük”

Məsələyə münasibət bildirən keçmiş diplomat, politoloq Fikrət Sadıqovun sözlərinə görə, bəyanatın həmsədr ölkələrin nümayəndə heyətlərinin rəhbərləri tərəfindən verilməsi elə bir xüsusi anlam kəsb etmir: “Düşünmürəm ki, bu, hansısa format dəyişikliyini özündə ehtiva edir. Tutaq ki, Minsk Qrupunun formatı dəyişdirilirsə, qoy dəyişdirilsin. Bizim üçün format o qədər də əhəmiyyət kəsb etmir. Onsuz da separatçı qurumun danışıqlarda tərəf olmasına Azərbaycan imkan verməyəcək. Bəyanatın nümayəndə heyətlərinin rəhbərləri və yaxud da həmsədrlərin özü tərəfindən verilməsi nəyisə dəyişmir. Söhbət ortada olan nticədən gedir. Nəticə isə təəssüf ki, ortada yoxdur. ATƏT-in Minsk Qrupu həmsədrlərinin son bəyanatında müəyyən qədər dişsiz yanaşma var. Məsələ ondadır ki, budəfəki bəyanatda da bizi sülhə, hansısa kompromisə çağırırlar. Ancaq məsələ ondadır ki, Dağlıq Qarabağ münaqişəsinin tənzimlənməsi ilə bağlı BMT-nin, digər beynəlxalq təşkilatların qətnamələri var. Azərbaycanın ərazi bütövlüyünün tanınması ilə bağlı bir sıra sənədlər var. O da bir reallıqdır ki, ilk növbədə, Azərbaycanın işğal olunmuş əraziləri azad olunmalıdır. Biz hər zaman demişik ki, Dağlıq Qarabağa azərbaycanlı icma ilə bir yerdə müəyyən status verməyə hazırıq. Ancaq biz Ermənistandan təxribatçı xarakterli açıqlamalar eşidirik. Onlar şərt qoyurlar ki, separatçı qurum müstəqil olmalıdır və s. Bunlar isə qəbuledilən deyil. Çünki biz heç vaxt buna gedə bilmərik. Bunu həmsədr ölkələrin nümayəndə heyətlərinin rəhbərləri yaxşı dərk etməlidirlər. Onlar burada sülh və əminamanlıq istəyirlərsə, o zaman gərək beynəlxalq hüquq normalarına uyğun hərəkət etsinlər. Bu da o deməkdir ki, Ermənistana müəyyən təzyiqlər göstərilməlidir. Təəssüflər olsun ki, həmsədrlərin timsalında biz Ermənistana hansısa təzyiqlərin edilməsini görmürük”.

Vidadi ORDAHALLI

Son xəbərlər