“Vətəndaşlarla sizin ünsiyyətiniz formal xarakter yox, işgüzar xarakter daşımalıdır. Bu sizin iş qrafikinizdə əsas prioritet məsələ kimi olmalıdır”. Bunu Prezident İlham Əliyev Rüstəm Xəlilovu Hacıqabul Rayon İcra Hakimiyyətinin başçısı, Vüqar Novruzovu isə Naftalan Şəhər İcra Hakimiyyətinin başçısı vəzifələrinə təyin olunması ilə əlaqədar qəbul edərkən deyib.
Dövlət başçısının sözlərinə görə, şəhər və rayonlarda iqtisadi inkişaf icra başçılarının əsas vəzifəsi olmalıdır: “Sizin əsas vəzifəniz ondan ibarət olmalıdır ki, rəhbərlik edəcəyiniz şəhər və rayonda iqtisadi inkişaf təmin edilsin. İşsizliklə bağlı olan problemlər öz həllini tapsın. Vətəndaşlarla siz daim təmasda olmalısınız. Bütün mövcud olan problemləri ilk növbədə çox dərindən təhlil etməlisiniz və problemlərin həlli üçün iş planı tutulmalıdır”.
Prezident onu da qeyd edib ki, problemlərin bir hissəsi mərkəzi icra orqanlarının səlahiyyətindədir: “Belə olan halda, mərkəzi icra orqanları qarşısında məsələ qaldırmalısınız və eyni zamanda, Prezident Administrasiyasına məlumat verməlisiniz. O məsələlər ki, sizin fəaliyyətinizdən asılıdır, onları siz özünüz həll etməlisiniz və daim vətəndaşlardan onları narahat edən məsələləri eşitməlisiniz. Ona görə də vətəndaşlarla sizin ünsiyyətiniz formal xarakter yox, işgüzar xarakter daşımalıdır. Bu sizin iş qrafikinizdə əsas prioritet məsələ kimi olmalıdır”.
Zaman-zaman bəzi icra başçılarının vətəndaşlarla ünsiyyəti formal xarakter daşıdığı üçün, rayonlarda mövcud olan problemlər ya vaxtında həll olunmayıb, ya da, ümumiyyətlə, həllini tapmayıb. Ona görə də Prezident İlham Əliyev haqlı olaraq bildirdi ki, icra başçılarının vətəndaşlarla ünsiyyəti formal xarakter yox, işgüzar xarakter daşımalıdır.
“Bu cür yanaşma rayonlarda mövcud problemlərin həllini sürətləndirə bilər”
Sözügedən məsələni dəyərləndirən ekspert Rəsul Cahangirlinin sözlərinə görə, rayonlarda mövcud olan sosial problemlərin həlli icra başçılarının əhali ilə işgüzar xarakterli ünsiyyətindən keçir: “Həqiqətən də işgüzar ünsiyyət problemlərin həllini sürətləndirə bilər. Əfsuslar olsun ki, bir sıra icra başçıları əhali ilə işgüzar ünsiyyətə meylli deyil, xüsusən də köhnə təfəkkürə malik icra başçıları. Bir sıra hallarda belələri insanlarla ünsiyyət yaratmaqda, onların problemlərini dinləməkdə maraqlı olmurlar. Hətta insanlara yuxarıdan aşağı baxırlar. Hansı ki, problemləri dərindən öyrənsələr, onların həllinə əməli səy göstərsələr, o zaman vəziyyət tamamilə fərqli olacaq. Ona görə də Prezident İlham Əliyev icra başçıları qarşısında bu məsələni qaldırmaqla son dərəcə vacib bir məqama toxundu. Sadə insanlarla ünsiyyətin ən məqbul variantını icra başçılarına göstərdi. Hesab edirəm ki, icra başçılarının insanlarla təmasının işşgüzar xarakterli olmasına ciddi ehtiyac var. İcra başçıları bundan sonra sözügedən məqama xüsusi önəm verməlidirlər”.
Vidadi ORDAHALLI
