Paşinyanın arvadı Akopyan Mehriban xanımın bəyanatından qorxuya düşdüyünü gizlədə bilmədi
Ermənistanın Baş naziri Nikol Paşinyanın həyat yoldaşı Anna Akopyan Azərbaycan Prezidentinin xanımı, Azərbaycanın Birinci vitse-prezidenti Mehriban Əliyevanı Dağlıq Qarabağda muğam dinləməyə dəvət edib. A.Akopyanın sözlərinə görə, buna səbəb bir neçə gün bundan əvvəl Mehriban Əliyevanın “Telegram” şəbəkəsində “Bizim vahid arzumuz “Qarabağ şikəstəsi”ni Qarabağ torpağında birlikdə eşitməkdir!” məzmunlu status yazması olub:
“Mən bilirəm, o (Mehriban xanım) bunu təxminən hansı mənada yazıb. Mən indi Mehriban Əliyevanı Qarabağa dəvət etmək istəyirəm və o bizim qonağımız ola bilər. Erməni xalqı və “artsaxlılar” (qarabağlılar) qonağı necə qarşılamaq və hörmət göstərməyi yaxşı bilirlər”.
Baş nazirin həyat yoldaşı münaqişənin sülh yolu ilə həll olunmasına da toxunub: “Əgər muğam adı altında onlar müharibə istəyirlərsə, onda bu arzu elə arzu olaraq da qalacaq. Əgər müharibə başlasa, onda muğama qulaq asmaq istədikləri yerlərin sayı da artacaq…”.
Əslində, bununla Paşinyanın arvadı həyat yoldaşı kimi siyasi diletant olduğunu sübut edib. Bununla, həmçinin, Ermənistan hakim dairələrinin beynəlxalq vasitəçilərə məhəl qoymadan, sülh prosesinə sadiq olmadıqlarını nümayiş etdirib. Beləliklə, bir daha bəlli olub ki, A.Akopyanın Mehriban xanımın səviyyəsinə çatmasına çox var. Çünki Mehriban xanım Azərbaycanın öz ərazisinə aid olan bir bölgəsində muğama qulaq asmaq istəyini bəyan edib. Bu, normal və qanunidir. Paşinyanın arvadı isə işğalçı olduqlarını və bir xanım kimi işğala haqq qazandırdığını bəyan etmiş olub. Başqa bir ölkənin başçısının həyat yoldaşının nə səlahiyyəti var ki, işğal altında saxlanan əraziyə Azərbaycanın rəsmi şəxsini dəvət etsin? Aydındır ki, Akopyanın bu cür fikirlər səsləndirməsi həm də həyasızlığın son həddidir.
- Akif Nağı: “Biz bundan ciddi nəticələr çıxarmalıyıq ki, belə adamların rəhbərlik etdiyi ölkə ilə danışıq aparmaq yersizdir”
Qarabağ Azadlıq Təşkilatının sədri Akif Nağı “Bakı-Xəbər”ə açıqlamasında bildirdi ki, bununla Ermənistan rəhbərliyi nə dərəcədə həyasız olduğunu bir daha ortaya qoydu: “Bilirsiniz ki, Mehriban xanım normal olan bir arzunu ifadə edib. Deyib ki, Qarabağda muğam dinləmək istəyir. Paşinyanın həyat yoldaşı isə Azərbaycan hakimiyyətini yeni işğalla hədələyib. Hətta deyib ki, əgər qonaq kimi yox, başqa üsulla gəlmək istəyərlərsə, peşman olarlar. Özü də ən maraqlısı budur ki, A.Akopyan bu fikirləri BMT-nin keçirdiyi bir beynəlxalq tədbirdə, Bratislavada mühüm danışıqların getdiyi bir zamanda səsləndirib. A.Akopyan kimdir ki, Azərbaycanın hakimiyyətində təmsil olunan mühüm vəzifəli şəxslə bu tonda danışır? Bu, Azərbaycanın xoş niyyətlərinə qarşı bu cür bəd niyyətlərlə cavab verməkdir. Bunlar artıq özlərini tam etikadan kənar aparırlar. Biz bundan ciddi nəticələr çıxarmalıyıq ki, belə adamların rəhbərlik etdiyi ölkə ilə danışıq aparmaq yersizdir. Görürsünüzmü, bunlarla həyata keçirilən qarşılıqlı səfərlərin, xalq diplomatiyasının heç bir əhəmiyyəti yoxdur. Jurnalistləri də gəlib burada oldular, gedəndən sonra hədyanlar yazdılar. Bundan sonra qərar verilməlidir ki, onlarla xoş danışmağın heç bir faydası yoxdur. Mən Azərbaycanın Bratislava danışıqlarında ortaya qoyduğu mövqeni çox bəyəndim. Bu konkret mövqedən sonra ermənilər öz paylarını götürməlidirlər”.
Məhəmmədəli QƏRİBLİ
