Elçin Mirzəbəyli: “Aparılan islahatlar dövlət idarəçiliyinin çevikliyini daha da artırır”
“Bizim apardığımız kadr və struktur islahatları, eyni zamanda, ölkəmizin beynəlxalq imicini daha da yüksəklərə qaldırır və vətəndaşlar tərəfindən yüksək qiymətləndirilir. Keçirilmiş son rəy sorğusunun nəticələrinə görə, xalqımızın mütləq əksəriyyəti bizim siyasətimizi dəstəkləyir və bəyənir”.
Məlum olduğu kimi, bunu Prezident İlham Əliyev Rüstəm Xəlilovu Hacıqabul Rayon İcra Hakimiyyətinin başçısı, Vüqar Novruzovu isə Naftalan Şəhər İcra Hakimiyyətinin başçısı vəzifələrinə təyin olunması ilə əlaqədar qəbul edərkən deyib.
Dövlət başçısı bildirib ki, son vaxtlar aparılan islahatlar artıq öz nəticəsini verməkdədir: “Cəmiyyətdə bu islahatlarla bağlı çox müsbət rəy formalaşıb və gözləntilər də var. Ona görə təyin edilmiş bütün yeni kadrlar qarşısında konkret vəzifələr qoyulur və bu kadrlar o vəzifələri icra etməlidirlər. Dövlət məmurları vəzifəyə gəlir mənbəyi kimi baxmamalıdırlar. Dövlət məmurları xalqa xidmət etməlidirlər. Onların başlıca missiyası bundan ibarətdir və siz də belə işləməlisiniz”.
O da məlumdur ki, Azərbaycanda aparılan islahatlar dünyada böyük maraqla izlənir. Bir sıra beynəlxalq qurumların hazırladıqları hesabatlarda Azərbaycanın mövqeyinin daha da öncül yerdə olması bunu bir daha sübut edir. Ona görə də ölkədə kadr və struktur islahatlarının aparılması Azərbaycanın beynəlxalq nüfuzunu möhkəmləndirir.
- “Bu, beynəlxalq əlaqələrdə, ikitərəfli və çoxtərəfli dövlətlərarası münasibətlərdə mövqelərimizi möhkəmləndirir”
Sözügedən məsələ ilə bağlı fikirlərini “Bakı-Xəbər”lə bölüşən politoloq Elçin Mirzəbəylinin sözlərinə görə, aparılan islahatların Azərbaycanın beynəlxalq imicini möhkəmləndirməsi danılmaz reallıqdır: “Aparılan islahatlar dövlət idarəçiliyinin çevikliyini daha da artırır. Dünyada və regionda baş verən proseslərə daha çevik reaksiya vermək imkanları yaradır. Digər tərəfdən, Azərbaycan beynəlxalq reytinq cədvəllərində son illər kifayət qədər irəliləyib. Bu irəliləyişin də əsas səbəblərindən biri ölkədə aparılan islahatlardır. Bunun nəticəsidir ki, Azərbaycan dünyada 20 ən islahatçı ölkə arasında yer alıb. Bu faktorun özü də ölkənin beynəlxalq imicinin daha da yüksəlməsinə xidmət edir. Gələcəkdə yeni investisiyaların cəlb edilməsinə bu çox müsbət təkan verə bilər. Bunun üçün əlverişli zəmin yaradır. Bu gün dünyada, bütövlükdə, ayrı-ayrılıqda daxili və xarici siyasət anlayışları yoxdur. Bunlar bir-birilə kompleks şəkildə qarşılıqlı zəncirvari formada bağlı olan amillərdir. Daxili siyasət xarici siyasətə, xarici siyasət də daxili siyasətin elementlərinə təsir göstərir. Bu aspektdən ölkə daxilində həyata keçirilən islahatlar Azərbaycanın xarici siyasətində də özünü büruzə verir. Bu, beynəlxalq əlaqələrdə, ikitərəfli və çoxtərəfli dövlətlərarası münasibətlərdə mövqelərimizi möhkəmləndirir”.
Vidadi ORDAHALLI
