Aydın Hüseynov: “Sözügedən islahatların daha da effektli və səmərəli olmasını şərtləndirən faktor kadrların yenilənməsidir”
Kadr islahatları davam etdiriləcək. Bunu Prezident İlham Əliyev Rüstəm Xəlilovu Hacıqabul Rayon İcra Hakimiyyətinin başçısı, Vüqar Novruzovu isə Naftalan Şəhər İcra Hakimiyyətinin başçısı vəzifələrinə təyin olunması ilə əlaqədar qəbul edərkən deyib.
Ölkə başçısının sözlərinə görə, son vaxtlar aparılan islahatlar artıq öz nəticəsini verməkdədir: “Cəmiyyətdə bu islahatlarla bağlı çox müsbət rəy formalaşıb və gözləntilər də vardır. Ona görə təyin edilmiş bütün yeni kadrlar qarşısında konkret vəzifələr qoyulur və bu kadrlar o vəzifələri icra etməlidirlər. Dövlət məmurları vəzifəyə gəlir mənbəyi kimi baxmamalıdırlar. Dövlət məmurları xalqa xidmət etməlidirlər. Onların başlıca missiyası bundan ibarətdir və siz də belə işləməlisiniz. Təcrübəli kadrların bilikləri, hazırlığı, eyni zamanda, gənclərin novatorluğu, dinamizmi, yeniliklərə meylliliyi - bu prinsiplərin vəhdəti uğurlu inkişafımızı bundan sonra da şərtləndirəcək”.
Prezident qeyd edib ki, rayonlarda mövcud olan bütün problemləri icra başçıları dərindən təhlil etməlidirlər: “Problemlərin həlli üçün iş planı tutulmalıdır. Təbii ki, problemlərin bir hissəsinin həlli mərkəzi icra orqanlarının səlahiyyətindədir. Belə olan halda, mərkəzi icra orqanları qarşısında məsələ qaldırmalısınız, eyni zamanda, Prezident Administrasiyasına məlumat verməlisiniz”.
Görünən odur ki, kadr islahatları davamlı xarakterli olacaq. Vəzifəsinin öhdəsindən gələ bilməyənlər işdən xaric olunacaq və yerinə digər kadrlar təyin ediləcək. Belə məlum olur ki, kadr islahatları davam etməklə yanaşı, bütün sahələri əhatə edəcək.
- “Aparılan kadr islahatları, ümumilikdə, ölkədə həyata keçirilən islahatları tamamlayır”
Məsələyə münasibət bildirən millət vəkili Aydın Hüseynovun sözlərinə görə, kadr islahatlarının davamlı olması ölkənin dayanıqlı inkişafını təmin edəcək: “Nəzərə almaq lazımdır ki, aparılan islahatlar sistemli xarakterlidir. Çox böyük və geniş fundamental islahatlar həyata keçirilirsə, bu islahatların effekti onda daha böyük olur ki, bununla paralel kadr islahatları da həyata keçirilsin. Çünki müəyyən dönəmdə yeni kadrlara çox böyük ehtiyac yaranır. Biz də görürük ki, ölkə iqtisadiyyatı və bütövlükdə, Azərbaycan çox böyük nailiyyətlər əldə edir. Bunun effektini, müsbət nəticələrini görürük. Sözügedən islahatların daha da effektli və səmərəli olmasını şərtləndirən faktor kadrların yenilənməsidir. Aparılan kadr islahatları, ümumilikdə, ölkədə həyata keçirilən islahatları tamamlayır. Hesab edirəm ki, cənab Prezidentin apardığı islahatlar artıq öz müsbət nəticəsini verir. Bütün bu deyilənlərin fonunda, görünən odur ki, aparılan kadr islahatları davamlı olacaq. Bu da vəzifəyə təyin edilən şəxslərin məsuliyyətini bir az da artıracaq”.
Vidadi ORDAHALLI
