Azərbaycanda bəzi müxalif siyasi partiya və bir qrup ictimai-siyasi fəal növbədənkənar keçirilməsi gözlənən parlament seçkisinə qatılmaq və onu boykot etmək dilemması qarşısında qalıb. Müsavat Partiyasının qərargahında keçirilən “dəyirmi masa”da müxalifət təmsilçiləri bu suala cavab axtarıblar və belə məlum olub ki, onların əksəriyyəti ənənəvi mövqeləri olan boykotun üzərində dayanır.
Əksər radikallar seçkidə iştirakdan imtinanın səbəbini guya ədalətli seçki mühitinin olmaması ilə izah edir. Müsavat başqanı Arif Hacılı deyib ki, hazırkı şərtlərdə seçkilərdə iştirak çox çətindir, amma seçki ilə bağlı qərarı Müsavat Partiyası şənbə günü verəcək: "Seçki komissiyaları tam şəkildə hakimiyyətin nəzarəti altındadır. Təbii ki, belə bir şəraitdə, hər hansı bir dəyişiklik baş verməsə, seçkilərin taleyi, onun nəticələrinin necə olacağı əvvəlcədən məlumdur".
Keçmiş səhiyyə naziri Əli İnsanov seçkilərdə iştirakla bağlı deyib ki, seçkilərə az bir müddət qalsa da, ifadə azadlığı təmin olunmayıb.
Azərbaycan Xalq Cəbhəsi Partiyasının sədr müavini Seymur Həzi deyib ki, heç olmasa Azərbaycan xalqının inamını cücərdən seçki mühiti olsun ki, biz orada iştirak edək.
Azərbaycan Xalq Partiyasının sədri Pənah Hüseyn bildirib ki, o, əvvəlki illərdə parlament seçkilərində iştirak edib və parlamentdə təmsil olunub, amma bu, heç nəyi dəyişməyib. Göründüyü kimi, radikal dairələr seçkidə iştirakla bağlı bəhanə sayıla biləcək şərtlər irəli sürürlər. Əsasən də seçkini boykot edəcəklərini bəyan edirlər.
Göründüyü kimi, radikal müxalifət illərin ən uğursuz boykot taktikasından bu dəfə də yaxa qurtara bilmədi. Bunun səbəbi nə ilə bağlıdır?
“Fikrimiz var ki, seçkiyə sol təmayüllü partiyaların bloku şəklində qatılaq”
Azərbaycan Sosialist Partiyasının sədri Elşən Həsənov “Bakı-Xəbər”ə bildirdi ki, bu taktikanın bir bəhanə olduğu qənaətindədir: “Əvvəl Milli Şura bəyanat verdi. Həmin bəyanatda açıq boykota gedəcəklərinə işarə vardı. İş burasındadır ki, radikal dairələr seçkidə iştirakını əvvəlcədən bəyan edən siyasi partiyaları da az qala satqınlıqda ittiham edirlər. Özləri isə seçkidə iştirak etməyəcəklərini konkret bəyan etmirlər. Sanki bir bazarlığa çıxıblar. Belə siyasət olmur. Onlara sual vermək lazımdır, seçki mühiti sizi qane etmirdisə, niyə məhz MSK-ya həmin Məzahir Pənahovun rəhbərlik etdiyi dönəmdə seçkilərdə iştirak edibsiniz? Başqa bir sual da verə bilərəm: başqa seçkiləri boykot etməyinizlə hansı nəticəni əldə etdiniz? Bunların boykot etdiyi seçkilərdən sonra legitim parlament formalaşıb və fəaliyyət göstərib. Mən qəbul edirəm ki, boykot bir taktikadır və siyasətdə mövcuddur. Ancaq bu, şantaj vasitəsi deyil. Boykota o qüvvələr gedir ki, seçki prosesini poza bilsin. Yəni onu edən qüvvə tərəfdarlarına seçkidə iştirak etməməklə bağlı çağırış edir. Onların da sayı o qədər olur ki, sandıq başına gedən tapılmır. Gəlin düzünü danışaq: bizdə bu gücdə olan bir siyasi qüvvə varmı? Boykotla bağlı başqa taktika budur ki, seçkinin nəticələri tanınsa belə, insanları meydana səsləyib, bunu xalq gücü ilə əngəlləyirlər. Uzun illərin boykot taktikasından bunun edilə bilmədiyini görmüşük. Onda isə radikal dairələr niyə boykotu seçirlər? Səbəb məlumdur, seçki biabırçılığından yaxa qurtarmaq üçün bu vasitəyə əl atırlar. Bununla da özlərini gündəmdə saxlamaqla, xalqın iradəsinə zidd gedirlər. Çünki onların tərəfdarları həmin təsisatlardan nəticə gözləyirlər. Bunlar isə baş girələyirlər. Biz seçkidə iştirak edəcəyik. Hətta fikrimiz var ki, seçkiyə sol təmayüllü partiyaların bloku şəklində qatılaq”.
Məhəmmədəli QƏRİBLİ
