Ölkəmizdə başlanan islahatlar bütün istiqamətlərdə uğurlu nəticələr verməkdədir. Xüsusən də kadr islahatlarının həyata keçirilməsi cəmiyyət tərəfindən müsbət qarşılanır. Prezidentin etimad göstərərək müxtəlif vəzifələrə təyin etdiyi şəxslərin, icra başçılarının yeni dövrün bütün çağırışlarına uyğun fəaliyyət göstərməsi əsas tələblərdən biridir. Ölkə başçısı da rayonlara icra hakimiyyəti başçıları təyin edərkən onların qarşısına qoyduğu ən başlıca tələb xalqa vicdanla xidmət etmələri ilə bağlıdır.
Dekabrın 4-də Azərbaycan Respublikasının Prezidenti İlham Əliyev Rüstəm Xəlilovu Hacıqabul Rayon İcra Hakimiyyətinin başçısı, Vüqar Novruzovu Naftalan Şəhər İcra Hakimiyyətinin başçısı vəzifələrinə təyin olunması ilə əlaqədar qəbul edərkən onların qarşısına çox mühüm vəzifələr qoyub. “...Dövlət məmurları vəzifəyə gəlir mənbəyi kimi baxmamalıdırlar. Dövlət məmurları xalqa xidmət etməlidirlər. Onların başlıca missiyası bundan ibarətdir və siz də belə işləməlisiniz” - deyə ölkə başçısı qeyd edib.
“Təəssüf ki, indiyə qədər bəzi dövlət məmurlarının mənfi hərəkətlərinin şahidi olmuşuq”
Tanınmış sosioloq-alim, professor Əhməd Qəşəmoğlu “Bakı-Xəbər”ə bildirdi ki, Prezidentin icra başçılarını qəbul edərkən etdiyi çıxışa çox diqqətlə qulaq asıb. Ölkə başçısının dövlət məmurları qarşısında yeni tələblər qoyduğunu bildirən Ə.Qəşəmoğlu hesab edir ki, Prezidentin bu tələblərinə hər bir yeni təyin edilən, eləcə də illərdir icra başçısı vəzifəsində çalışanlar böyük əhəmiyyət verməlidirlər. “Prezidentin çıxışını, icra başçıları ilə dialoqunu çox ciddi izlədim. Prezidentin “dövlət məmurları vəzifəyə gəlir mənbəyi kimi baxmamalıdırlar” fikrini çox bəyəndim. Hesab edirəm ki, Prezident bu fikri söyləməklə bir daha dövlət məmurlarına onların işinin, vəzifə və missiyasının nədən ibarət olduğunu xatırlatdı. Ölkə başçısı yeni vəzifəyə təyin etdiyi məmurları, icra başçılarını qəbul edərkən hər dəfə onların qarşısına vəzifələr qoyur, onlara görməli olduqları işləri xatırladır. Respublikamızda yeni islahatlar başlayıb və ümid edirəm ki, bu islahatlar müsbət nəticələrlə başa çatacaq. Bizim cəmiyyətdə uzun illər dövlət məmurunun obrazı tamam mənfi çalarlala formalaşmışdı. Məlumdur ki, bir çoxu dövlət məmuru vəzifəsinə təyin edildikdən sonra özü üçün var-dövlət yığmağa, evlər, villalar inşa etməyə, böyük varidata sahiblənməyə can atıb və buna da nail olub. Bu da sonda dövlət büdcəsinin talanmasına səbəb olub. Bu gün vəzifədən çıxan adamların bir çoxunun dövlət büdcəsindən çox böyük məbləğdə vəsait mənimsəməsi üzə çıxır, biri 3, o biri 2 milyard, bir başqası isə daha böyük məbləğdə vəsaiti mənimsəyib. Belə hallarla çox rastlaşmışıq. Bu amillər əvvəla ölkə iqtisadiyyatına çox güclü zərər vurub, digər tərəfdən də əhalinin mənəvi sarsıntı keçirməsinə səbəb olub. Bu insanlar xalqın mənafeyini deyil, öz varidatlarını artırmağı düşünüblər. Çox təəssüf ki, Prezidentin vaxtilə etimad göstərib vəzifələrə təyin etdiyi dövlət məmurlarının çoxu xalqın cibini talamaqla məşğul olub”.
Ə.Qəşəmoğlu hesab edir ki, Prezidentin yeni vəzifəyə təyin etdiyi məmurlarıb əvvəlki məmurlardan fərqli olaraq xalqa, dövlətə xidmət edəcəyini, öz şəxsi maraqlarını arxa plana atacağını arzu edən Ə.Qəşəmoğlunun sözlərinə görə, yeni məmurlar Prezidentin mesajından öz məsuliyyətini anlamalıdırlar. “Təəssüf ki, indiyə qədər bəzi dövlət məmurlarının mənfi hərəkətlərinin şahidi olmuşuq. Amma hesab edirəm ki, yeni təyin olunan məmurlar, icra başçıları Prezidentin onlara verdiyi mesajın mahiyyətini, məsuliyyətini dərk etməlidirlər. Çünki xalqın müsbət ovqatda olmasında, yaxşı yaşamasında, problemsiz həyat sürməsində, süründürməçiliyə, bürokratiyaya məruz qalmamasında məmurların göstərdiyi fəaliyyətin rolu var. Azərbaycan müstəqil dövlətdir və bu da onu təlqin edir ki, əhalinin potensialı üzə çıxsın, güzəranı daha yaxşı olsun. Amma indiyə qədər məmurların sərgilədiyi davranışlar buna imkan vermirdi. Rayonların icra başçıları vəzifəyə qazanc yeri kimi baxmasalar, rüşvət almasalar, xalqın xidmətində dursalar, həmin rayonlarda işləyən digər vəzifə sahibləri də bu yolu tutarlar. Amma icra başçısı rüşvət alarsa, vəzifədən pul qazanmaq məqsədilə istifadə edərsə, o birilər də onun kimi edər. Fikrimcə, həyata keçirilən kadr islahatları da buna xidmət edir ki, rüşvətxorluq, özbaşınalıq, vəzifədən sui-istifadə kimi halların kökü kəsilsin. İnanıram ki, buna nail olmaq mümkün olacaq” - deyə Ə.Qəşəmoğlu bildirdi.
İradə SARIYEVA
