03/08/2020 23:58
728 x 90

Azərbaycanda icra başçılarının ünvanına ilk xəbərdarlıq – “...sizi cəzalandıracam”...

Fikrət Yusifov: “İcra başçıları sərmayələrin cəlb edilməsi ilə bağlı tez-tez iş adamları ilə görüşlər keçirməli, onları dinləməli və sahibkarları narahat edən məsələləri yoluna qoymalıdırlar”

img

“İcra başçıları həm yerli, həm də xarici biznes dairələri ilə sıx təmaslar qurmalıdırlar, şəhər və rayonlara investisiyalar cəlb etməlidirlər”. Bunu Prezident İlham Əliyev Rüstəm Xəlilovu Hacıqabul Rayon İcra Hakimiyyətinin başçısı, Vüqar Novruzovu isə Naftalan Şəhər İcra Hakimiyyətinin başçısı vəzifələrinə təyin olunması ilə əlaqədar qəbul edərkən deyib.

Ölkə başçısının sözlərinə görə, işsizliklə bağlı olan problemlər, bütövlükdə, Azərbaycanda öz həllini tapır və beynəlxalq qurumlar da bu sahədəki uğurlarımızı qeyd edirlər: “Ancaq mən bunu dəfələrlə demişəm. Bəzi qonşu ölkələrdən fərqli olaraq, bizim əhalimiz artır. Cənubi Qafqazda Azərbaycan yeganə ölkədir ki, əhalisi artır və Sovet dövründən sonra müstəqillik illərində, demək olar ki, 30 faiz artıb, 7 milyondan 10 milyona çatıb. Bütün bunlar, əlbəttə, tələb edir ki, yeni iş yerləri yaradılsın və iş yerlərinin yaradılması üçün investisiya layihələri icra edilməlidir. Ona görə də icra başçıları da həm yerli, həm də xarici biznes dairələri ilə sıx təmaslar qurmalıdırlar, şəhər və rayonlara investisiyalar cəlb etməlidirlər ki, yerli istehsal artsın, işsizlik daim aşağı səviyyədə olsun”.

Yerli və xarici sərmayənin rayonlara cəlb edilməsi regionların inkişafına əlavə təkan verəcək. Nəticədə iş tapmaqdan ötrü rayonlardan paytaxta axın azalacaq. Artıq bir neçə ildir dövlət başçısı icra başçıları qarşısında belə bir tələb qoyub. Bütövlükdə, sözügedən iş necə qurulmalıdır, ekspertlər bunu necə dəyərləndirirlər?

  • “Rayonda elə bir mühit yaratmalıdırlar ki, ora yerli və xarici kapital gəlsin”

Məsələyə münasibət bildirən iqtisad elmləri doktoru Fikrət Yusifovun sözlərinə görə, bununla bağlı bir sıra işlər görülməlidir: “Cənab Prezidentin bölgələrə təyin etdiyi icra başçılarının qarşısında qoyduğu tələblərdən biri də yerli və xarici investisiyaların cəlb edilməsi ilə bağlıdır. Bu istiqamətdə məqsədyönlü işlərin aparılması və nəticənin ortaya qoyulması başlıca vəzifədir. Artıq bu kriteriya yerli icra başçılarının fəaliyyətində əsas meyara çevrilir. Yəni etimadı doğrultmaq istəyən icra başçısı bu yöndə fəaliyyət göstərməli və nəticə ortaya qoymalıdır. Çünki investisiyaların cəlb edilməsi kriteriyası ön sırada dayanıb. Onların fəaliyyətinə qiymət əsasən bu parametrə görə veriləcək. Bunun necə qurulmasına gəldikdə isə, bir sıra məqamlara toxunmaq istəyirəm. İcra başçıları sərmayələrin cəlb edilməsi ilə bağlı tez-tez iş adamları ilə görüşlər keçirməli, onları dinləməli və sahibkarları narahat edən məsələləri yoluna qoymalıdırlar. O zaman həm yerli, həm də xarici sərmayədarlar rayonlara investisiya qoymaqda maraqlı olacaqlar. Nəticədə rayonlarda istehsal və xidmət sektorunun sferası genişlənəcək. Ona görə də icra başçıları rayonlarda iş adamları ilə və ümumən insanlarla işləməlidirlər. Rəhbərlik etdikləri rayonların iqtisadi potensialını, imkanlarını düzgün təhlil etməlidirlər. Daha sonra buna görə işi qurmalıdırlar. Bununla yanaşı, rayonun iqtisadi durumunun yaxşılaşdırılması nöqteyi-nəzərdən sistemli işlər görülməlidir. Bir sözlə, icra başçıları yaradıcı olmalıdırlar. Rayonda elə bir mühit yaratmalıdırlar ki, ora yerli və xarici kapital gəlsin. Özü də məqsədyönlü fəaliyyət göstərməli, mənbələr tapmalıdırlar. Bu gün həm daxildə, həm də xaricdə kifayət qədər sərbəst vəsaitin olması hər kəsə bəllidir”.

Vidadi ORDAHALLI

Son xəbərlər