“Bu təşəbbüslər, o cümlədən, bizim hökumətlərarası iqtisadi əməkdaşlığımıza yeni bir mövzu – innovasiyalar və yüksək texnologiyalar mövzusu əlavə edilməsinə aiddir, xüsusi yol xəritəsi yaradılacaq. Artıq bir neçə gündən sonra Hökumətlərarası Komissiya bu sahədə işlərin vəziyyətini nəzərdən keçirəcək”. Bunu Rusiyanın Xarici İşlər naziri Sergey Lavrov Azərbaycan Prezidenti İlham Əliyevlə görüşü zamanı deyib.
Onun sözlərinə görə, Mehriban Əliyevanın bu günlərdə Rusiyaya səfər etməsini yüksək qiymətləndiriblər: “Biz Mehriban Əliyevanın Rusiya Federasiyasına səfərini, onun Prezident Putinlə, Baş nazir Medvedyevlə, Federasiya Şurasının sədri Matvienko ilə görüşlərini, Xalq Təsərrüfatı Nailiyyətləri Sərgisində “Azərbaycan” pavilyonunun çox mühüm açılış mərasimində, Regionlararası Forumda iştirakını yüksək qiymətləndirmişik və bu səfərin gedişində müzakirə edilən təşəbbüsləri biz hökmən həyata keçirəcəyik”.
S.Lavrov onu da qeyd edib ki, iki ölkə arasında əmtəə dövriyyəsi sürətlə artır. Rusiya Federasiyasının Azərbaycan iqtisadiyyatına birbaşa investisiyalarının həcmi 1,5 milyard dollar olub. Ölkənin 70-dən çox subyekti Azərbaycanla əməkdaşlıq edir.
Görünən odur ki, bundan sonra iki ölkə arasında innovasiyalar və yüksək texnologiyalar sahəsində də əlaqələr genişlənəcək. Birinci vitse-prezident Mehriban Əliyevanın Moskva səfəri zamanı bununla bağlı önəmli razılıq əldə olunub.
Ümumilikdə, ekspertlər sözügedən sahədə iki ölkə arasında əlaqələrin qurulmasına necə yanaşırlar?
“Bizim hazırda nanoparklarımız var, innovativ layihələr kifayət qədərdir”
Məsələyə münasibət bildirən iqtisadçı-ekspert Fuad İbrahimovun sözlərinə görə, iki ölkə arasında bu sahədə əməkdaşlığın qurulması müəyyən perspektivlər vəd edir: “Məsələ ondadır ki, dünya ölkələrində innovasiyalar, nanotexnologiyalarla bağlı tədqiqatlarda Rusiyadan olan alimlərə xüsusi önəm verilir. Rusiyanın bu sahə üzrə mütəxəssislərinin dünyada xüsusi çəkisi var. Yəni bu nöqteyi-nəzərdən Azərbaycanla Rusiya arasında innovasiyalar və yüksək texnologiyalar sahəsində əməkdaşlığın qurulması müsbət perspektiv vəd edir. Hazırda Rusiyada nano və informasiya texnologiyaları ilə bağlı perspektivli tədqiqatlar gedir. Çünki həqiqətən də Rusiya ərazisində bu qəbildən görüləcək işlər kifayət qədərdir. Nəzərə almaq lazımdır ki, dünyada iqtisadiyyatın bütün sahələrində modernləşdirmə və yeniliklər gedir. O cümlədən, Rusiyada bu proses gedir. Bu nöqteyi-nəzərdən Rusiya ilə Azərbaycan arasında bununla bağlı əməkdaşlığın qurulması faydalı olacaq. Buna həm də ona görə müsbət baxıram ki, Azərbaycan da qeyri-neft sektorunun inkişafına xüsusi önəm verir. Bizim hazırda nanoparklarımız var, innovativ layihələr kifayət qədərdir. İstər İKT, istərsə də digər sahələrdə innovativ layihələrə üstünlük verilir. Bu baxımdan Rusiya ilə ba sahədə əməkdaşlıq vacibdir”.
Vidadi ORDAHALLI
