Son dövrlər bir sıra ərəb ölkələrinin Ermənistana göstərdikləri xüsusi yaxınlıq anlaşılan deyil. Məsələ ondadır ki, bəzi ərəb ölkələrinin Ermənistana marağı artıb. Qarşılıqlı rəsmi və işgüzar səfərlər çoxalıb.
Bundan əvvəl Livan və Suriya Ermənistanla xüsusi isti münasibətlər qurmuşdular və indi də tərəflər arasında münasibətlər yüksək səviyyədədir. İndi isə Birləşmiş Ərəb Əmirliyi və İordaniya bu yöndə xüsusi fəallıq göstərir. Belə ki, İordaniya kralının yaxın zamanda Ermənistana səfər edəcəyi gözlənir. Erməni mətbuatının yazdığına görə, bunu Ermənistanın parlament sədri Ararat Mirzoyan ilə görüş zamanı bu ölkəyə rəsmi səfərə gələn İordaniya Haşimilər Krallığının xarici işlər və miqrasiya naziri Ayman Səfadi bildirib.
O da məlumdur ki, Azərbaycan dəfələrlə bəyan edib ki, Ermənistandan müsəlman ölkələrə dost olmaz. Bu günlərdə Prezident İlham Əliyev Bakı Dövlət Universitetinin 100 illiyinə həsr edilmiş mərasimdəki çıxışı zamanı Ermənistanla qucaqlaşan müsəlman ölkələrini qınayıb. Prezident belə ölkələrin hərəkətlərini riyakarlıq adlandırıb: “Mən müsəlman ölkələrinə dəfələrlə müraciət etmişəm. Açıq müraciət etmişəm ki, siz Ermənistanla necə qucaqlaşırsınız? Siz bunların liderlərini necə dəvət edirsiniz? Görmürsünüzmü ki, bunlar bizim məscidlərimizi yerlə bir etdilər? Görmürsünüz ki, bizim məscidləri təhqir etdilər? Gedin, baxın, o şəkillər var, onlar Ağdam məscidini, Şuşa məscidlərini, işğal edilmiş digər torpaqlardakı məscidləri nə günə qoydular? Bu, axı təkcə bizim məscidlərimiz deyil, bütün müsəlman aləminin məscidləridir. Buna necə göz yummaq olar? Necə belə riyakarlıq etmək olar?”.
Görünən odur ki, bəzi müsəlman ölkələri Ermənistanla yaxınlıq edərək özlərini ifşa edirlər. İordaniya kralının Ermənistana səfərə hazırlaşması buna növbəti əyani sübutdur.
“Bu zəif monarxlar da, göründüyü kimi, islam dəyərlərinin ziddinə gedərək Qarabağda islam abidələrini yerlə yeksan edən bir ölkə ilə əməkdaşlıq qururlar”
Sözügedən məsələ ilə bağlı fikirlərini “Bakı-Xəbər”lə bölüşən politoloq Məhəmməd Əsədullazadənin sözlərinə görə, son illər Ermənistanla ərəb ölkələri arasında sıx siyasi təmaslar sözügedən müsəlman ölkələrinin İslam Əməkdaşlıq Təşkilatında tutduqları mövqe ilə ziddiyyət təşkil edir: “Ermənistanın Qətərlə siyasi-iqtisadi əlaqələri inkişaf etdirməsi, ardınca İordaniya ilə bu əlaqələrə başlaması həqiqətən müəyyən suallar doğurur. Azərbaycan kifayət qədər çalışır ki, müsəlman ölkələri ətrafında birləşdirsin və Ermənistana qarşı cəbhə formalaşdırsın. İslam Əməkdaşlıq Təşkilatında buna nail olub. Ancaq bəzi ərəb ölkələrinin diversant şəklində Ermənistanla əlaqələrə önəm verməsi öz siyasi dəyərlərinə qarşı çıxmaq deməkdir. Demək, Ermənistan Azərbaycanın bu istiqamətdə siyasətini neytrallaşdırmağa çalışır. Müsəlman ölkələri ilə əlaqələri inkişaf etdirir. Məhz Paşinyan İordaniya kralı ilə görüşdə Qarabağ münaqişəsinin dini bir münaqişə olmadığını qeyd etdi. Ermənistan çalışır ki, iradəcə zəif ərəb monarxlarını öz tərəfinə çəksin. Bu zəif monarxlar da, göründüyü kimi, islam dəyərlərinin ziddinə gedərək Qarabağda islam abidələrini yerlə yeksan edən bir ölkə ilə əməkdaşlıq qururlar. Hesab edirəm ki, Qafqaz Müsəlmanları İdarəsi ərəb ölkələri ilə əlaqələri sıxlaşdırıb bu istiqamətdə fəaliyyət göstərməlidir. Azərbaycan da İordaniya və Qətərlə diplomatik əlaqələri gücləndirib bu əməkdaşlığın qarşısını almalıdır. Onlara Ermənistanın islam ocaqlarında vandalizm siyasəti apardığını çatdırmalıdır. Hərçənd, Prezident İlham Əliyev çıxışlarında bunu dəfələrlə bəyan edib. Ancaq çox təəssüflər olsun ki, bəzi ərəb ölkələri bunu görməzdən gəlir”.
Vidadi ORDAHALLI
