Azərbaycanın və Rusiyanın Xarici İşlər nazirləri Elmar Məmmədyarov və Sergey Lavrovun görüşündə Dağlıq Qarabağ münaqişəsinin nizamlanması, iki ölkə arasında əməkdaşlıq, eləcə də beynəlxalq və regional məsələlər barədə müzakirələr aparılıb.
Elmar Məmmədyarov görüşdən sonra bildirib ki, Dağlıq Qarabağ münaqişəsinin həlli üzrə danışıqlar dalana dirənib: “Hazırda Dağlıq Qarabağ münaqişəsinin həllinə dair danışıqlarda durğunluq vəziyyəti yaranıb”.
Məmmədyarov qeyd edib ki, münaqişə mərhələli şəkildə həll olunmalıdır: “İlk növbədə, əlbəttə ki, ordu kazarmalara qayıtmalıdır, çöldə olmamalıdır. Daha sonra qaçqınların qaytarılması, iqtisadi imkanların və yolların təcrid olunmasının aradan qaldırılması barədə düşünmək olar”.
Elmar Məmmədyarov deyib ki, Azərbaycan və Ermənistan Xarici İşlər nazirlərinin dekabrın 4-də Bratislavada Dağlıq Qarabağla bağlı predmet danışıqlara başlayacağı gözlənir. Nazir qeyd edib ki, Ermənistanın XİN rəhbəri təhlükəsizlik barədə məsələni qaldırmaq niyyətindədir: “Bizim və Ermənistanın anlayışında təhlükəsizlik nədir? İlk növbədə silahlı qüvvələr kazarmalara qayıtmalıdır. Bəli, təhlükəsizlik vacibdir. Amma həm də Azərbaycan və onun Qarabağdakı əhalisi üçün. Biz həmsədrlərə vəziyyətin dəyərləndirilməsi və təhlükəsizlik məsələsinin həll olunması üçün məruzənin hazırlanması ilə bağlı müraciət etmişik. Bunun üçün ciddi predmet danışıqlar lazımdır. Erməni həmkarımla Bratislavada görüşdən gözləntilər ondan ibarətdir ki, biz irəli getməliyik”.
Göründüyü kimi, Elmar Məmmədyarov Bratislavada Ermənistanla predmetli danışıqlar aparılacağını qeyd edir. Bundan belə nəticəyə gəlmək olarmı ki, Ermənistan işğal altında olan ərazilərin boşaldılması ilə bağlı konkret addım atmağı düşünür?
Qabil Hüseynli: “Bratislavadakı predmetli danışıq deyəndə müzakirələrin 5 rayon üzərində aparılacağını təxmin etmək olar”
Politoloq Qabil Hüseynli “Bakı-Xəbər”ə açıqlamasında bildirdi ki, müxtəlif terminləri icad edib danışmağa elə bir ehtiyac görmür: “Bunu xalqa bir qədər sadə dildə başa salmaq lazımdır. Bir vaxtlar substantiv danışıqlar deyirdilər. İndi də predmetlidən danışırlar. Adını nə qoyurlarsa qoysunlar, amma ortada nəticə olmalıdır. Lavrov Bakıya elə-belə gəlməyib. Rusiya Dağlıq Qarabağ probleminin həllində inhisarçı mövqeyini vermək istəmir. Ona görə də Lavrov qarşılıqlı kompromislərdən danışdı. Kompromis deyəndə Ermənistan heç də bütün rayonları yox, 5-ni qaytarmaq istəyir. Azərbaycandan bu kompromis tələb oluna bilər. Bizə 350 milyard dollarlıq ziyan dəyib. Biz nəyi güzəştə gedə bilərik? Rusiyanın dəstəyilə Ermənistan Dağlıq Qarabağı, Kəlbəcəri və Laçını qaytarmaq istəmir. Bratislavadakı predmetli danışıq deyəndə müzakirələrin 5 rayon üzərində aparılacağını təxmin etmək olar. Azərbaycan tərəfi ilkin variantda buna razı olsa da, rusların da şərti olacaq ki, Dağlıq Qarabağda rus qoşunları yerləşsin. Kifayət qədər inandırıcı olmayan bəyanatlar verilir. İstəyimiz budur ki, onun dedikləri çin çıxsın və Bratislavada predmetli danışıqlar fonunda torpaqlarımızın işğaldan azad edilməsi prosesinə start verilsin. Son vaxtlar bu istiqamətdə Rusiyanın fəallığı nəzərə çarpır. Özü də Rusiya bu məsələdə beynəlxalq vasitəçiləri nəzərə almadan, öz istəyinə uyğun şəkildə hərəkət edir”.
Məhəmmədəli QƏRİBLİ
