Nasizmin qəhrəmanlaşdırılmasına qarşı mübarizə ilə bağlı qətnamənin qəbul olunması xüsusi aktuallıq qazanır. “Trend”in məlumatına görə, bunu Rusiya Xarici İşlər Nazirliyinin rəsmi nümayəndəsi Mariya Zaxarova brifinq zamanı BMT Baş Assambleyası tərəfindən qəbul edilmiş qətnaməni şərh edərkən deyib.
M.Zaxarovanın sözlərinə görə, həmin qətnamə ilə bağlı səsvermənin nəticələri onu göstərir ki, Rusiyanın təqdim etdiyi təşəbbüslərin beynəlxalq ictimaiyyət tərəfindən dəstəklənməsi ənənəyə çevrilir: “Qətnamənin qəbul olunması 2020-ci ildə İkinci Dünya Müharibəsində qələbənin 75-ci ildönümü ərəfəsində daha da aktuallıq qazanır. Bu vacib qətnamənin dəstəklənməsi aydın şəkildə təsdiqləyir ki, 1945-ci ildə əldə olunan qələbə BMT üzv dövlətlərinin birgə irsidir”.
M.Zaxarova qeyd edib ki, qətnamədə müxtəlif ölkələrdə faşizmlə mübarizə aparanlara qarşı davam edən müharibə və bunun son zamanlarda daha geniş vüsət almasından narahatlıq ifadə olunur:
“Bu sırada həm də nasistlərin tərəfində olanlara abidələrin açılması, adlarının küçələrə və məktəblərə verilməsi kimi addımlar da yer alır. Eyni zamanda İkinci Dünya Müharibəsi zamanı nasistlərlə əməkdaşlıq edən, hərbi və bəşəriyyətə qarşı cinayətlər törətmiş şəxslərin qəhrəman səviyyəsinə yüksəldilməsi ilə bağlı narahatlıq ifadə edilir”.
“Azərbaycanla Rusiya arasında münasibətlər nəhəng perspektivlərə malikdir” – deyən Mariya Zaxarova bildirib ki, ölkələr arasında münasibətlər dinamik inkişaf edir: “Bizi ümumi tarix, bu gün və gələcək birləşdirir. Ona görə də bu münasibətlər gələcəyə yönəlib və nəhəng perspektivlərə malikdir”.
M.Zaxarova daha sonra bildirib ki, Rusiya-Azərbaycan regionlararası yubiley forumu Moskvada keçiriləcək: “Forum noyabrın 22-23-də planlaşdırılıb. Bu, onuncu regionlararası forum olacaq. Tədbirin təşkilatçıları Rusiyanın İqtisadi İnkişaf Nazirliyi və Azərbaycanın İqtisadiyyat Nazirliyidir”.
O əlavə edib ki, regionlararası əlaqələr Rusiya və Azərbaycanın çoxplanlı ikitərəfli münasibətlərində böyük əhəmiyyət daşıyır və genişlənməkdə davam edir: “Buraya Rusiyanın 70-dən çox subyekti cəlb olunub. Rusiyanın 17 subyekti Azərbaycanla ticari-iqtisadi, elmi-texniki və mədəni əməkdaşlıq üzrə sazişlərə malikdir. Azərbaycanla ticarət həcminin üçdə bir hissəsindən çoxu Moskva və Moskva vilayətinin payına düşür. Ticarət tərəfdaşları arasında ilk onluğa Stavropol diyarı, Krasnodar diyarı, Çelyabinsk, Sverdlovsk, Saratov, Orenburq vilayətləri, eləcə də Sankt-Peterburq şəhəri və Tatarıstan respublikası daxildir”.
