Dünyada güclü olan erməni diasporu daim ümumtürk maraqlarına zərbə vurmağa çalışıb. Bu kontekstdə Azərbaycanla Türkiyənin adını xüsusi vurğulamaq olar. Onların əllərində alət kimi istifadə etdiyi vasitələrdən biri də saxta “soyqırım” iddialarıdır. Təbii ki, ermənilər bu saxta iddianı dünyanın müxtəlif ölkələrində həyata keçirmək istəyirlər. Ancaq dünyanın əsas ölkələri də belə addım atmazdan əvvəl Türkiyə ilə Azərbaycan arasındakı münasibətlərin vəziyyətini nəzərdən keçirir. Məhz bu amilə görə bir çox ölkə ermənilərin məkrli niyyətlərini ürəyində qoymalı olub.
Ancaq fürsət düşən kimi, erməni diasporu yenə öz istəklərini reallaşdırmağa can atır. Suriyada ABŞ-la Türkiyə arasında gərginlik yaşanan kimi, erməni diasporunun səyi nəticəsində ABŞ Konqresi saxta “soyqırım”la bağlı qərar qəbul etdi. Analoji cəhdlər hazırda Böyük Britaniyada olunur. Britaniya parlamentinin erməni əsilli üzvü lord Ara Darzi nüfuzlu “The Guardian” qəzetində dərc etdiyi məktubunda ABŞ Konqresinin qərarını əsas gətirərək, Britaniya parlamentindən də analoji qərarın qəbul edilməsini xahiş edir.
Erməni parlamentari öz məktubunda Britaniyanın indiyə qədər belə bir qərarı qəbul etməməsini ciddi nöqsan kimi dəyərləndirib. Britaniya parlamentinin ilk erməni üzvü kimi müraciət edən Darzi saxta “soyqırım”la bağlı əsaslandırılmamış faktları təqdim etməklə, təmsil olunduğu ölkənin ictimai fikrini yanlış istiqamətə yönəltməyə çalışıb.
Real situasiyada Britaniya parlamentinin də belə bir qərarı qəbul etməyəcəyinə zəmanət yoxdur. ABŞ-ın ardınca onun da belə saxta sənədə imza atacağı istisna edilmir. Məlumdur ki, Britaniya ilə Azərbaycanın da ciddi əlaqələri var. Həmin ölkənin Azərbaycanda kifayət qədər investisiyası mövcuddur. Belə bir qərarın qəbulu münasibətlərə ciddi xələl gətirə bilər. Bu məsələdə Böyük Britaniya Azərbaycandakı maraqlarını da nəzərə alıb hansı qərarı qəbul edə bilər?
“Onları istər Azərbaycan, istərsə də Türkiyə ilə bağlayan daha ümdə maraqlar var”
Politoloq Zamin Axundov qəzetimizə bildirdi ki, tarixi həqiqətləri saxtalaşdırmaq və təhrif etmək yolu tutan erməni ideoloqları yarım əsrdən çox müddətdə dünya ictimaiyyətini mif üzərində qurulmuş qondarma “soyqırımı” iddiaları ilə çaşdırmağa, təkcə qardaş Türkiyənin deyil, ümumən Türk dünyasının, o cümlədən, Azərbaycanın beynəlxalq nüfuzuna xələl gətirməyə çalışırlar: “Uzun illərin müşahidələri göstərir ki, real əsası olmayan bu saxta iddianın davamlı şəkildə gündəmdə saxlanmasına yönəlmiş səylər ermənilərin başqa dövlətlər hesabına daha geniş coğrafi əraziyə yiyələnmək üçün həyata keçirdikləri soyqırım, terror və deportasiya siyasətini pərdələmək, diqqəti özlərinin işğalçılıq faktından yayındırmaq məqsədi güdür.
Ermənilər uzun illərdir tarixdə heç zaman olmayan uydurma “soyqırımı” dünyanın gündəliyinə gətirirək ondan siyasi məqsədlər üçün istifadə edirlər. İndi ayrı-ayrı ölkələrin parlamentlərində deputatlar əl qaldırıb, endirməklə sözdə “soyqırımı”nın guya 1915-ci ildə olduğu barədə sənədlər qəbul edirlər. Bir səhifə tarix kitabını oxumayan, uğursuz tarixçi rolunda çıxış edən ayrı-ayrı əcnəbi deputatların bu hərəkəti təkcə məsuliyyətsizlik deyil, tarixi faktlar, materiallara hörmətsizlikdir, tarixi inkar etməkdir.
Təəssüf ki, erməni lobbisi və diasporunun məkrli siyasətinə uyan bir çox ölkənin parlamentləri qondarma “erməni soyqırımı” ilə bağı müxtəlif sənədlər qəbul edib, bu əsassız iddiaları tanıyıblar. Ermənilər uzun illərdir tarixdə heç zaman olmayan uydurma “soyqırımı” dünyanın gündəliyinə gətirirək ondan siyasi məqsədlər üçün istifadə edirlər. Əslində, bu nə Türkiyə, nə də bizim üçün yenilik deyil. Bu amildən hər zaman Türkiyəyə qarşı təzyiq metodu kimi istifadə ediblər. ABŞ-ın ştatlarının böyük əksəriyyəti ayrı-ayrılıqda saxta “soyqırımı” tanıyıblar. Dünyanın bəzi ölkələrinin parlamentləri də bu addımı atıb. Türkiyəyə bunun heç bir təsiri olmayıb, bundan sonra da olmayacaq. Ancaq biz hər zaman bu saxta erməni iddialarına qarşı Türkiyə ilə birlikdə mübarizə aparmışıq. Təbii ki, ölkələr belə addımları atarkən Azərbaycanın da reaksiyasını nəzrə almalıdırlar. Mən Böyük Britaniyanın ABŞ-ın səhvini təkrar edəcəyinə inanmıram. Çünki onları istər Azərbaycan, istərsə də Türkiyə ilə bağlayan daha ümdə maraqlar var”.
Məhəmmədəli QƏRİBLİ
