Türkiyə ərazisində yerləşən Ağrı dağının tarixən ermənilərlə heç bir əlaqəsi olmayıb. Bir tərəfi Qərbi Azərbaycan ərazisinə düşən Ağrı dağının ermənilər tərəfindən “Ararat” adlandırıldığı məlumdur.
Ermənilər idda edirlər ki, tarixən bu dağın adı “Ararat” olub və o “ermənilərə aiddir”. Əslində isə tarixdən bu dağın adı bir neçə formada, şəkildə keçir, onlardan biri də erməni dilinə uyğun gəlmir. Səlcuqlar dövründə Egri dağ, farslar ona Kuh-e-Nüh adları verib, Strabonun coğrafiyasında isə adı Abos kimi qeyd edilib.
Məlumat üçün bildirək ki, 5137 metr hündürlüyə malik olan Böyük Ağrı dağı Anadolu yarımadasının və Kiçik Qafqaz dağ sisteminin ən yüksək zirvəsidir. Dağ 4000 metrədək Kaynozoy tipli bazalt, daha sonra andezit süxurlarından təşkil olunub. 4250 metrdən başlayaraq zirvəsi sayı 30-dan çox daimi buzlaqlarla örtülüb. Ən iri buzlağın uzunluğu 2 km-ə çatır. Böyük Ağrı dağının yamaclarında Sərdarbulaq yaylası və 3896 m yüksəkliyə malik Kiçik Ağrı dağı yerləşir. Hər iki dağın ətəyinin birlikdə çevrəsi təqribən 128 km. təşkil edir. Dini ədəbiyyatda Nuhun gəmisinin saya oturduğu ilk torpaq bu dağın zirvəsi olub.
Ermənilərin “Ararat” adlandırdığı dağın Bibliya dağı olduğunu qeyd edirlər. Onlar iddia edirlər ki, guya ki, bu dağ haqqında “Ararat” adı ilə Bibliyada söhbət açılır.
Qasım Hacıyev: “Ermənilər Ağrı dağını “Ararat” kimi təqdim etməklə, “Ararat”ın adının Bibliyada çəkildiyi iddiasını ortaya atmaqla yeni yalan və saxtakarlıq əməllərini ortaya qoyurlar”
Azərbaycan Milli Elmlər Akademiyasının (AMEA) Qafqazşünaslıq İnstitutunun ermənişünaslıq şöbəsinin müdiri, professor Qasım Hacıyev “Bakı-Xəbər”ə bildirdi ki, müqəddəs kitablarda, eləcə də Bibliyada bu dağın adı “Ararat” kimi çəkilməyib. Onun sözlərinə görə, ermənilərin Ağrı dağını “Ararat” adlandıraraq onunla bağlı müxtəlif rəvayətlər uydurması faktdır. Amma bu dağın əsl adı Ağrı dağdır. “Bilirsiniz ki, Ağrı dağı biz türklərin hər zaman qürur duyduğu bir ucalıqdır. Ermənilər Qərbi Azərbaycan ərazilərinə köçürüldükdən sonra oradakı bütün dağ, yer-yurd adlarını dəyişdirmək yolunu seçdilər. Beləliklə, ermənilər onlara heç bir aidiyyəti olmayan Ağrı dağının da adını dəyişdirib “Ararat” etdilər. Ağrı dağı haqqında müxtəlif kitablarda, o cümlədən, Bibliyada söhbət açılır. Amma Bibliyada bu dağın adı “Ararat” kimi qeyd edilmir. Bilirsiniz ki, bu da Nuh Peyğəmbərlə bağlıdır. Müqqəddəs kitablarda qeyd edilir ki, Nuhun gəmisi gəlib Ağrı dağda dayanır və onlar burada məskən salırlar, insanlar bu dağdan yayılır. Amma Bibliyada Ağrı dağın adı “Ararat” olaraq çəkilmir. Ermənilər Ağrı dağını “Ararat” kimi təqdim etməklə, “Ararat”ın adının Bibliyada çəkildiyi iddiasını ortaya atmaqla yeni yalan və saxtakarlıq əməllərini ortaya qoyurlar. Ağrı dağının da, Bibliyada adı keçən dağın da ermənilərə heç bir aidiyyəti yoxdur. Bibliyada Ağrı dağının və Əshabi-Kəhfin adı çəkilir, “Ararat”ın yox. Yəni bu kitabda onlarla bağlı məlumat var” - deyə Q.Hacıyev vurğuladı.
O, həmçinin, qeyd etdi ki, bir neçə həftə əvvəl Türkiyənin İqdır şəhərində olarkən Ağrı dağını müşahidə edib və onun qarlı zirvəsini fotolentə köçürüb. Q.Hacıyevin sözlərinə görə, Ağrı dağ qədim türk dağıdır və bu bizim əbədi ucalıq rəmzlərimizdən biridir. “Ermənilər “Ararat”ın adının Bibliyada keçdiyini iddia etməklə, əslində, bir məqsəd güdürlər. Onların məqsədi odur ki, Bibliyanın adını çəkməklə xristian dövlətlərinin köməyilə uzun illərdir iddia etdikləri Türkiyə və Naxçıvan ərazisini ələ keçirsinlər. Amma onların bu iddiası cəfəngiyyatdan başqa bir şey deyil” - deyə Q.Hacıyev bildirdi.
İradə SARIYEVA
