Noyabrın 3-də Müsavat Partiyası Məclisinin sessiyası keçirilib. İclasda ictimai-siyasi vəziyyət müzakirə olunub və təşkilati məsələlərə baxılıb.
Partiya başqanı Arif Hacılı məruzə ilə çıxış edərək bir sıra məsələlərə toxunub. Məruzədə partiyanın qarşıdan gələn bələdiyyə seçkilərinə münasibəti, müxalifət təmsilçilərinin iştirakı ilə təklif olunan Dəyirmi masa, Müsavatın təyin etdiyi mitinq və digər məsələlərə toxunulub.
O da məlum olub ki, Məclisdə çıxışçıların əksəriyyəti Azərbaycanda bələdiyyələrin səlahiyyətli olmadığını, cəmiyyətin bələdiyyə seçkilərinə marağının olmadığını və seçkilərin şəffaf keçirilmədiyini qeyd edərək, Müsavat Partiyasının seçkidə iştirakını vacib saymayıblar. Daha sonra məsələ səsə qoyulub və Məclis dekabrın 23-də keçiriləcək bələdiyyə seçkilərində Müsavat Partiyasının iştirak etməməsi barədə qərar qəbul edib.
Göründüyü kimi, radikal müxalifət düşərgəsi ənənəvi bəhanələrdən çıxış edərək bələdiyyə seçkilərinə qatılmır. Bu təkcə sadalanan səbəblərlə bağlı deyil. Bu həm də onunla əlaqədardır ki, Müsavat Partiyası bələdiyyə seçkiləri ilə bağlı cəmiyyətlə işləmək istəmir. Onlar görürlər ki, cəmiyyətdə sosial dayaqları olmadığından, seçkidə yetərincə səs toplaya bilməyəcəklər. Bunu ört-basdır etməkdən ötrü boykota gedirlər. Hansı ki, hakimiyyətə iddialı olan istənilən partiyanın yolu seçkilərdən keçir.
Maraqlıdır, bəs ekspertlər Müsavat Partiyasının bələdiyyə seçkilərini boykot etməsinin səbəbini nədə görür?
“Onlar yaxşı təşkilatlana bilsəydilər, güclü elektorata malik olsaydılar, seçkidə iştirak edərdilər”
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, hər bir partiyanın vəzifəsi seçkilərdə iştirak etməkdir: “Demokratiya prinsiplərini əsas götürən siyasi partiyanın əsas məqsədi seçkilərdə iştirak etmək və nəticə ortaya qoymaq olmalıdır. Bununla özünü siyasi arenada təsdiqləməlidir. Hansı partiya seçkidə boykota gedirsə, bu, həmin siyasi təşkilatın problemli olduğunu göstərir. Deməli, partiya olaraq bu işlərin öhdəsindən gələ bilmir. Çünki hakimiyyətə gəlməyin demokratik üsulu seçkilərdir. Lap zəif də olsa, seçkilədə müəyyən uğurlar qazanmaqla, gələcəkdə bu uğuru inkişaf etdirmək olar. Ancaq boykot taktikasını seçmək həmin təşkilatın zəifliyini və demokratik prinsiplərə söykənmədiyini sübut edir. Necə ki, Müsavat Partiyası bu yolu seçib. Bu onu göstərir ki, Müsavat Partiyası xalqla işləyə bilmir. Onlar yaxşı təşkilatlana bilsəydilər, güclü elektorata malik olsaydılar, seçkidə iştirak edərdilər. Onlar bələdiyyələrə üzv olandan sonra səlahiyyətlərin artırılmasını tələb edə bilərdilər. Yoxsa boykot edib evdə oturmaqla bələdiyyələrə əlavə səlahiyyət əldə etmək olmaz. Ona görə də boykot taktikası Müsavat Partiyasının zəiflik əlamətidir”.
Vidadi ORDAHALLI
