Sabiq nazir Əli Nağıyev verdiyi son müsahibədə Prezidentin köməkçisi Əli Həsənov barədə bəzi fikirlər səsləndirib. Həmin fikirlərin mahiyyəti və konkret dəlillərə söykənməməsi Nağıyevin Əli Həsənovla şəxsi intriqası olduğuna şübhə yeri qoymur.
Ancaq maraqlıdır ki, Əli Nağıyev səsləndirdiyi sərsəm fikirləri mərhum prezident Heydər Əliyevin adı ilə arqumentləşdirmək istəyir. Azərbaycan xalqının mənəvi keyfiyyətlərinə aid olan məsələlərdən biri də budur ki, hansısa dedi-qodu ilə dünyasını dəyişən adamın ruhunu narahat etmək olmaz. Bu qayda hətta sadə adamlara münasibətdə belə qorunub saxlanılır. Ancaq, görünür, Əli Nağıyev üçün belə məsələlər elə də böyük əhəmiyyət kəsb etmir. Belə olmasaydı, o, xalqın sevimlisi olan bir liderin adını öz şəxsi intriqasına qatıb, onunla manipulyasiya etməzdi. Əli Nağıyevin fikirlərindən sitat: “Mən hələ nazir idim, Heydər Əliyev məni çağırıb, Əli Həsənovun arxamca danışdığını söylədi. Heydər Əliyev mənə bildirdi ki, Əli Həsənov Əli Nağıyevin YAP-ı Əmək və Əhalinin Sosial Müdafiəsi Nazirliyinə çevirdiyini deyir. Mən də Heydər Əliyevə bildirdim ki, Əli Nağıyev partiyanı deyil, nazirliyi YAP edir. Əsaslandırdım ki, məndən əvvəl Rəfael Allahverdiyevi və Əli İnsanovu daha böyük qurumlara vəzifəyə qoymusunuz, ancaq onlar partiyadan, demək olar ki, heç kimi irəli çəkməyiblər. Axı məni bu nazirliyə partiyadakı fəaliyyətimə görə nazir təyin etmisiniz. Bəs onda mən lazım olan kadrları haradan seçməliyəm? Sözsüz ki, partiyadan! Bu cavabımdan sonra Heydər Əliyev mənə bir kəlmə də artıq söz demədi”.
Əli Nağıyev daha sonra yenə adi bir məişət söhbətinə də Heydər Əliyevin adını qatır: “O vaxtı Əli Həsənovu bağıma aparmışdım, evimdə çörək yemişdi, amma sonra gedib Heydər Əliyevin yanında deyib ki, Əli Nağıyevin evində bir “lüsturası” var ki, düşsə, Prezident Aparatı uçar”.
Əli Nağıyev iddia edir ki, bütün bu söhbətləri ona Heydər Əliyev deyib. Faktiki olaraq, Heydər Əliyevin adını öz komanda üzvləri arasında gedən intriqalarda vacib element kimi qeyd etməyə can atır. Təbii ki, hamı bilir ki, Heydər Əliyev belə məişət məsələləri səviyyəsinə enən şəxsiyyət olmayıb. Əli Nağıyevin Heydər Əliyev barədə sələndirdiyi fikirləri nə dərəcədə əsaslı saymaq olar?
“Heydər Əliyev qlobal problemlərin yoluna qoyulması ilə məşğul olurdu”
Vaxtilə Heydər Əliyevlə yaxın münasibətdə olmuş, onun idarəetmə prinsiplərinə yaxından bələd olan sabiq dövlət müşaviri Qabil Hüseynli “Bakı-Xəbər”ə açıqlamasında bildirdi ki, Əli Nağıyevin Heydər Əliyevə xitabən söylədiyi fikirləri inandırıcı saymır: “O dahi şəxsiyyətin dedi-qodu, məişət məsələləri, kimin evində nəyin olub-olmamsı ilə işi olmazdı. Və yaxud da kiminsə belə mövzuları onun yanında açmağa cəsarəti çatmazdı. Həmin dövrlərdə müharibə gedirdi, beynəlxalq münasibətlərdə gərginlik vardı. Heydər Əliyev belə qlobal problemlərin yoluna qoyulması ilə məşğul olurdu. Şəxsən mən dəfələrlə onunla şəxsi kontaktda olmuşam. Böyük dövlət adamı bütün görüşlərdə ancaq Azərbaycanı narahat edən məsələlər, xalqın taleyi ilə bağlı söhbətlər edirdi. Mən Əli Həsənova Heydər Əliyevin deyilən səviyyədə münasibət bəslədiyinə inanmıram. Beləydisə, niyə Heydər Əliyev gətirib Əli Həsənovu ən mühüm posta təyin edirdi? Əli Həsənov hələ Moskvada oxuyarkən Heydər Əliyevlə yaxın olub. Ondan sonrakı dönəmdə, Naxçıvan və Bakıda hər zaman Heydər Əliyevlə əlaqədə olub. Onların arasında güclü, qarşılıqlı etimad mühiti formalaşdırılmışdı. Belə dedi-qodular tarixdə olan gercəklərə kölgə sala bilmir. Mən rəhmətə gedən bir şəxsin adından belə fikirlərin söylənməsini etik saymıram. Bu cür taktikadan istifadə etikadan kənar olmaqla yanaşı, həm də dövlətimiz üçün ziyanlıdır. Belə bir dönəmdə bu cür söhbətlər İlham Əliyevin yekdil komandasına ziyandan başqa nəsə vəd etmir. Əli Nağıyev nahaq yerə gücünü belə lazımsız fəaliyyətə xərcləyir. Bununla o, hakimiyyət daxilində hər hansı narazılığın yaradılmasına nail ola bilməyəcək”.
Məhəmmədəli QƏRİBLİ
