Avropa Parlamentinin sosial demokratlardan ibarət olan ən böyük siyasi alyansı Azərbaycanla danışıqların dayandırılmasını tələb edir. Bunu da 19 oktyabrda Bakıda keçirilən icazəsiz aksiyanın qarşısının alınması ilə izah etməyə çalışır. Məlumatı erməni KİV-i alyansın saytına istinadən yayıb. Maraqlıdır ki, alyans icazəsiz mitinq cəhdindən sonra baş verən qadın aksiyasını da narazılıqları siyahısına əlavə edib. Qeyd edilir ki, guya hər iki aksiyanın dağıdılmasında zorakılığa yol verilib, çoxlu sayda adam həbs edilib.
Müraciətdə qeyd edilir ki, bütün bu hallara görə Avropa Parlamenti Azərbaycan hakimiyyəti ilə danışıqları və gələcək münasibətləri kəsməlidir. Göründüyü kimi, Avropa Parlamentindəki bəzi qüvvələr yenə Azərbaycana qarşı ikili standartlarla yanaşırlar. Bu günlərdə Brüsseldə etiraz aksiyasının yatırılmasında istifadə olunan kobud metodlardan danışmaq əvəzinə, Bakıdakı hadisələri yanlış təsvir edirlər. Avropa İttifaqında səslənən bu mövqeni necə izah etmək olar?
“Fikir verdinizsə, birinci icazəsiz aksiyanı Əli Kərimli etdi, ikincidə İlqar Məmmədov göründü”
Politoloq Yeganə Hacıyeva “Bakı-Xəbər”ə bildirdi ki, bunu Avropa İttifaqının rəsmi mövqeyi saymaq olmaz: “Hər hansı bir alyansın belə müraciət etməsi mümkündür. Ancaq maraqlı olan məsələ bu hadisələrin zəncirvari şəkildə bir-birilə əlaqəli olmasıdır. Həmin alyansın bəyanatını həmin dəqiqə erməni KİV-nin tirajlaması da təsadüfi deyil. Onlar daim ermənipərəst mövqeləri ilə seçiliblər. Hər zaman Avropa Parlamentində Azərbaycana qarşı lobbiçilik ediblər. Bakıda iki aksiyanın dalbadal keçirilməsi və hər ikisinin icazəsizliyi bir daha sübut edir ki, proseslər vahid mərkəzdən idarə olunub. Fikir verdinizsə, birinci icazəsiz aksiyanı Əli Kərimli etdi, ikincidə İlqar Məmmədov göründü. İlqar Məmmədov nə vaxtdan qadın hüquqlarının qoruyucusu olub? Deməli, proseslər sırf Azərbaycana təzyiq aləti qazanmaq üçün idarə olunub. Hər iki aksiya zamanı iştirakçıların polisi necə provokasiyaya çəkdikləri açıq görünür. Aksiyalardan dərhal sonra Qərbdən verilən sərt bəyanatların da ard-arda olması çox detaldan xəbər verir. Belə bir müraciətlə Azərbaycanla Avropa İttifaqı arasındakı danışıqları dayandırmaq mümkün deyil. Cünki Azərbaycan Avropa İttifaqı ilə bərabər partnyor kimi çıxış edir. Sizi əmin edirəm ki, biz Avropaya daha çox lazımıq. Belə müraciətlər yalnız könül bulandıra bilər, əməli nəticəyə səbəb ola bilməz. Ancaq Avropa qurumlarının da qərəzli münasibətini xüsusi qeyd etməliyik. Avropanın lap göbəyi sayılan Strasburqdakı aksiyada polislərin davranışları ilə Bakıdakını obyektiv müqayisə etsələr, hansı dərəcədə qərəzə yuvarlandıqlarının şahidi olarlar. Bütün dünyada icazəsiz aksiyalarla mübarizə aparılır. Azərbaycan polisi və dövləti də bu məsələdə qanun çərçivəsində davranıb”.
Məhəmmədəli QƏRİBLİ
