Prezident İlham Əliyev oktyabrın 15-də keçirdiyi iqtisadi müşavirədə bir sıra mühüm məqamlara toxundu. Ölkə başçısının çıxışı, faktiki olaraq, yeni islahatlar dalğasının anonsu idi. Görünən budur ki, Prezident cavan, müasir təhsil və dünyagörüşlü, həmçinin, daha çevik kadrlarla işləməyə üstünlük verəcək.
Dövlət başçısı çıxışında açıq bəyan etdi ki, islahatlar davam edəcək və islahatlara mane olanlara yerlərini göstərəcək: “Kim buna qarşı çıxsa və altdan-altdan bizim işimizə mane olmaq istəsə, əlbəttə ki, belə adamlarla biz bir yolun yolçusu ola bilmərik”.
İlham Əliyevin çıxışında toxunduğu əsas məsələlərdən biri də islahatlara mane olmaq üçün medianın daxili mübarizə alətinə çevrilməsinin yolverilməzliyi ilə bağlı idi: “Mətbuat, bir növ, daxili mübarizə növünə çevrilib. Bu, dözülməzdir. Mən indi dərinə getmək istəmirəm, amma bildirməliyəm ki, bir hökumət üzvü digər hökumət üzvləri tərəfindən şantaj edilir. Onlar ləkələnir. Onların apardığı islahatlar, hansılar ki, Prezidentin tapşırığıdır, onlara kölgə salınır”.
Prezident bununla islahatlar; sabotaj edən məmurların bir kateqoriyasını göstərdi. Söhbət “reket” media rıçaqlarından istifadə edərək ölkə başçısının tapşırıqlarını həyata keçirən məmurları şantaj elətdirənlərdən gedir.
Prezident iqtidarda olan neqativ məmurların ikinci kateqroyasını isə Baş nazirin yeni təyin olunan müavini Şahin Mustafayevi qəbul edərkən göstərib. Ölkə başçısı bildirib ki, kölgə iqtisadiyyatına qarşı mübarizə güclənməlidir: “Əfsuslar olsun ki, hələ kölgə iqtisadiyyatı bizim iqtisadiyyatımızın bir hissəsini ehtiva edir. Düzdür, bütün postsovet ölkələrində bu problem var və ölkələr çalışırlar ki, bu problemlə mübarizə aparsınlar. Azərbaycanda kölgə iqtisadiyyatına qarşı mübarizə daha mütəşəkkil formada aparılır. Hesab edirəm ki, kölgədən çıxarılacaq biznes, əlbəttə, bizim iqtisadi göstəricilərimizi də düzəldəcək. Yəni göstəricilər reallığı əks etdirəcək. Eyni zamanda, biznes dairələri bilməlidirlər ki, ölkədə vahid qanunlar, vahid qaydalar mövcuddur. İnhisarçılığa qarşı çox ciddi mübarizə aparılmalıdır. Bəzi hallarda dövlət məmurları, hansılar ki, eyni zamanda, müxtəlif biznes dairələrinə də kömək göstərirlər, onlar haqsız rəqabət aparırlar. Azərbaycanda inhisarçılığa qarşı mübarizə mütəşəkkil xarakter daşımalıdır. Əgər biz buna nail olsaq, əlbəttə, biznes dairələri üçün daha yaxşı şərait yaradılacaq”.
Göründüyü kimi, Prezident neqativ fəaliyyətlə məşğul olan məmurları haqsız rəqabət aprmaqda və müxtəlif biznes dairələrinə kömək göstərməkdə ittiham edib. Bu iki kateqoriya məmurlarla mübarizə hansı səviyyədə aparılmalıdır?
“Hər iki məmur tipi zərərlidir, inkişafın qarşısını alır”
Sosial məsələlər üzrə ekspert İlqar Hüseynli “Bakı-Xəbər”ə açıqlamasında bildirdi ki, ölkə başçısının göstərdiyi ünvanlar dəqiqdir: “Azərbaycanda prioritet olan məsələ orta sahibkarlığın və qeyri-neft sektorunun inkişafıdır. Ölkəni, birmənalı şəkildə, neft asılılığından çıxarmaq lazımdır. Bizdə əsas problemli məqam ondan ibarətdir ki, bəzi məmurlar və deputatlar belə islahatın aparılmasını istəmirlər. Çünki bu və ya digər biznes sahələri ya məmurların, ya da bəzi deputatların monopoliyasındadır. İstəsəniz konkret siyahı da təqdim edə bilərəm. Fikir verin, uzun illərdir bizdə Rəqabət Məcəlləsi qəbul olunmayıb. Çünki bir çox məmur və deputatın ürəyincə deyil. Məmurların kompromat savaşı aparması da faktdır. Bunun üçün bəzi media quruluşlarını məmurların nəzarətindən çıxarmaq lazımdır. Məhz bunun nəticəsidir ki, onlar bəzi KİV üzərində şərtlərini diqtə edə bilirlər. Bununla da mübarizə aparan qurumlar olmalıdır. Ortada Prezident səviyyəsində siyasi iradə varsa, heç nədən çəkinmədən bunun üstünə getmək olar. Ancaq bir faktı da deyim ki, belə fəaliyyətlərə meylli olan məmurlar vəzifələri ilə vidalaşsalar, kiminsə kopromat savaşı aparmağa həvəsi də olmaycaq. Çünki qara işlərlə korrupsiyaya bulaşmış adamlar daha çox məşğul olurlar. Hər iki məmur tipi zərərlidir, inkişafın qarşısını alır”.
Məhəmmədəli QƏRİBLİ
