20/11/2019 23:08
728 x 90

Yeni Baş nazir və müavini qarşısında qoyulan vəzifələr - “Prezident hökumətə fəaliyyət proqramı verdi” demək olarmı…

img

Azərbaycan Respublikasının Prezidenti İlham Əliyev oktyabrın 22-də Şahin Mustafayevi yeni vəzifəyə - Baş nazirin müavini təyin olunması ilə əlaqədar qəbul edib.

Qəbul zamanı Prezident Şahin Mustafayevin indiyə qədər iqtisadi sahədə göstərdiyi xidmətdən razı qaldığını bildirib: “Siz uzun illər İqtisadiyyat naziri vəzifəsində işləyirsiniz. Bütövlükdə, sizin işinizdən mən razıyam. Ona görə qərara gəldim ki, sizi Baş nazirin müavini vəzifəsinə təyin edim. Bu, çox böyük vəzifədir, böyük etimaddır. Ümid edirəm ki, siz bu etimadı doğruldacaqsınız və yeni vəzifədə ölkəmizin iqtisadi inkişafının dayanıqlı olmasına öz töhfənizi verəcəksiniz”.

Ölkə başçısı Azərbaycan iqtisadiyyatının inkişaf etdiyini də bildirib: “Azərbaycan iqtisadiyyatı son 15 il ərzində üç dəfədən çox artıb. Ancaq biz onu da bilməliyik ki, bu artım daha çox neftin hasilatının artırılması hesabına mümkün olub. Əlbəttə, biz neft gəlirlərinin qeyri-neft sektoruna yönəldilməsi istiqamətində çox böyük uğurlar əldə etdik və Azərbaycan iqtisadiyyatın şaxələndirilməsi işində dünya miqyasında təbii resurslarla zəngin olan ölkələr sırasında qabaqcıl yerlərdədir. Təsadüfi deyil ki, biznes mühitinin yaxşılaşdırılmasını Dünya Bankı kimi ən aparıcı beynəlxalq maliyyə qurumu qiymətləndirir və biznes mühitinin səviyyəsinə görə biz dünyada 25-ci yerdəyik, 20 ən islahatçı ölkə arasındayıq. Eyni zamanda, Davos Ümumdünya İqtisadi Forumu illik hesabatında Azərbaycanı bir çox meyarlar üzrə qabaqcıl yerlərə layiq görüb. Bütün bunlar aparılan islahatların nəticəsidir”.

Prezident Şahin Mustafayevin nəzərinə görülməsi vacib olan işləri də çatdırıb: “Ancaq hesab edirəm ki, biz əldə edilmiş uğurlarla kifayətlənməməliyik. İqtisadi sahədə hələ də bir çox problemlər mövcuddur, o cümlədən, biznes mühitinin yaxşılaşdırılması istiqamətində əlavə addımlar atılmalıdır. Xüsusilə, ölkə iqtisadiyyatının qeyri-neft sektoruna xarici sərmayənin cəlb edilməsi sahəsində hələ ki, bir çox işlər görülməlidir. Düzdür, ölkə iqtisadiyyatına 270 milyard dollardan çox sərmayə qoyulub. Bunun yarısı xarici sərmayədir. Ancaq bu sərmayənin də böyük əksəriyyəti neft-qaz sektoruna qoyulan sərmayədir. Bizim vəzifəmiz xarici investorları inandırmaqdır ki, ölkəmizin qeyri-neft sektoruna daha böyük həcmdə sərmayə qoysunlar. Eyni zamanda, yerli şirkətlər üçün elə gözəl biznes iqlimi yaradılmalıdır ki, Azərbaycan şirkətləri ölkə iqtisadiyyatına böyük həvəslə sərmayə qoysunlar”.

Qeyd edək ki, ölkə başçısı Əli Əsədovu Baş nazir təyin edərkən ona da lazımi göstərişlər verib. Prezident İlham Əliyev hökumətin qarşısına qoyulan tapşırıqlar barədə bunları deyib: “Hazırda gələn ilin büdcəsi hazırlanır və bilirsiniz ki, büdcə hər bir ölkənin əsas sənədlərindən biridir. Yeni hökumət qarşısında bir çox vəzifələr qoyulub. Mən Əli Əsədovu bu vəzifəyə təyin edərkən ona bir çox vəzifələr tapşırdım. Onun qarşısına vəzifə qoydum ki, islahatlar aparılmalıdır, o cümlədən, kadr islahatları”.

Prezident İlham Əliyev bildirib ki, müasir dünyagörüşlü, müasir iqtisadiyyatı bilən, savadlı gənc kadrlar işə cəlb edilməlidir: “Biz XXI əsrdə yaşayırıq, köhnə təfəkkürlə, köhnə biliklərlə gələcəyə necə gedə bilərik? Nə qədər biz təbii resurslara arxalanaraq, necə deyərlər, belə ətalət yolu ilə gedə bilərik? Düzdür, islahatlar aparılır, dediyim rəqəmlər bunun əyani sübutudur. Hər bir ölkə bu nəticələrlə öyünə bilər. Ancaq biz bilirik ki, ehtiyatlarımız çoxdur. Onu da bilirik ki, əgər hər hansı dövlət və ya özəl quruma təmiz, bilikli və Vətənə bağlı kadr gətirilirsə, biz orada dərhal dəyişiklikləri görürük. Hesab olunurdu ki, bizdə elə sahələr var ki, orada islahatlar aparıla bilməz. Onlardan biri də vergi sistemidir. Hesab olunurdu ki, necə deyərlər, o biabırçı vəziyyət əbədi qalmalıdır və burada heç bir irəliləyişə nail ola bilmərik. Amma hər kəs gördü ki, biz vəziyyəti islahatlar yolu ilə düzəldə bildik. Büdcəyə 100 milyonlarla manat vəsait daxil olub, digər sahələrdə də həmçinin”.

Prezidentin yeni Baş nazir və onun müavini qarşısında qoyduğu vəzifələr Nazirlər Kabineti üçün yeni fəaliyyət platforması sayıla bilərmi?

İqtisadçı Elşən Əliyev “Bakı-Xəbər”ə açıqlamasında bildirdi ki, həyta keçirilən bu islahatların bir qayəsi var, o da xalqın rifah halının daha da yaxşılaşdırılmasıdır: “Bir neçə ildir biz bu yöndə ciddi addımların atıldığını görürük. Aparılan islahatlar çərçivəsində həyata keçirilən sosial paketlər əhalinin böyük bir kateqoriyasını əhatə edib. Özü də bu, davamlı xarakter alıb. Görünür ki, Prezident tərəfindən həyata keçirilən islahatlar ölkəmizin dinamik inkişafı üçündür və  kompleks xarakter daşıyır. Bəziləri yanlış olaraq bunu kadr islahatı kimi qələmə verməyə çalışır. Kadr islahatları onun tərkib hissəsidir. Ölkə başçısı çıxışlarında deyir ki, yeniləşməyə, gənc kadrların işə cəlbinə zərurət var. Bu baxımdan da aparılan struktur kadr islahatlarının fonunda məmurların qarşısında kadr bankının yenilənməsi, cavanlaşması kimi tələblər qoyulur. Təbii ki, son dəyişikliklər kadr islahatlarında daha yuxarı idarəetmə strukturlarını əhatə etdiyi üçün, diqqəti cəlb edir. Qısa müddətdə Baş nazirin dəyişməsi, onun müavinlərinin işdən azad edilməsi və artıq Baş nazirin müavini vəzifəsinə yeni təyinatın olması kadr islahatlarının daha da dərinləşməsi kimi qiymətləndirilməlidir. Prezidentin yeni təyin olunan məmurlarla görüşündə verdiyi tövsiyələrdən aydın görünür ki, söhbət şəxslərin əvəzlənməsindən getmir. Qarşıya qoyulan hədəflərə yeni şəxslərin köməkliyi ilə çatılmasından gedir. Prezident həm Baş nazir, həm də Şahin Mustafayevin qarşısında konkret tələblər qoyub. Başlıca məqsəd iqtisadiyyatımızın daha da gücləndirilməsidir. Qeyri-neft sektorundan asılılğı azaltmaq, xarici investisiyanı həmin sahəyə cəlb etmək, daxildə sağlam rəqabət mühiti yaratmaq, məmurların iqtisadiyyatdakı monopoliya meyllərini və təsirlərini azaltmaq kimi tapşırıqlar verilib. Təbii ki, bütün bunların həyata keçməsi üçün Nazirlər Kabinetinin daha çevik işləməsi gərəkdir. Bu baxımdan da Prezidentin verdiyi tövsiyələri Nazirlər Kabineti üçün yeni fəaliyyət proqramı saymaq olar. Yəqin ki, kadr islahatlarının davamını görəcəyik. Nazirlər Kabinetinin özündən start götürən yeniləşmə işin də sürətlənməsinə gətirib çıxaracaq”.

Məhəmmədəli QƏRİBLİ

Son xəbərlər