Məlum olduğu kimi, Ermənistan hakimiyyəti və “Qarabağ klanı” arasında kəskin münaqişə mövcuddur. İşğal edilmiş ərazilərimizə rəhbərlik uğrunda mübarizə son vaxtlar klanlararası çəkişmələri daha da artırıb. Nəzərə almaq lazımdır ki, gələn il separatçı qurumda qondarma “prezident seçkiləri” keçiriləcək. Paşinyan çalışır ki, ona yaxın olan şəxsi separatçı qurumun başına gətirsin.
Bu arada işğal altındakı torpaqlarımızdakı separatçı-terrorçu ermənilər daha bir qanunsuz partiya yaradıblar. Erməni mətbuatının yaydığı məlumata görə, qondarma separatçı rejimin “xarici işləri” ilə bağlı qanunsuz quruma rəhbərlik edən Masis Mailyanın rəhbərliyi ilə “Artsaxın sabahı” partiyası təsis edilib. 500 erməni pasportları ilə gələrək partiyanın qeydiyyatdan keçməsi üçün səs veriblər.
Məlumat üçün qeyd edək ki, M.Mailyan 2020-ci ildə keçirilməsi planlaşdırılan qanunsuz “prezident seçkiləri” üçün namizədliyini irəli sürüb. Onun işğalçı ölkə Baş naziri N.Paşinyan tərəfindən dəstəkləndiyi bildirilir. “Qarabağ klanı”nın əsas namizədi isə separatçı rejimin keçmiş “dövlət naziri” sayılan Araik Arutyunyandır. Bundan başqa, belə məlumat var ki, Vitali Balasanyan da quruma rəhbərlik etmək istəyir. Qeyd edək ki, V.Balasanyan Paşinyan hakimiyyətinə qarşı kəskin mövqedən çıxış edən şəxsdir. Son vaxtlar V.Balasanyan siyasi fəallığını bir qədər də artıraraq müxtəlif açıqlamalarla çıxış edir. M.Mailyanın yeni partiya təsis etməsi fonunda Paşinyanla Qarabağ separatçılarının yeni mübarizəsi başlayır. O baxımdan bütün bunları ekspertlər necə dəyərləndirirlər?
“İstənilən halda, klanlararası narazılığın bir az da artacağı gözlənir”
Məsələyə münasibət bildirən Siyasi İnnovasiya və Texnologiyalar Mərkəzinin rəhbəri Mübariz Əhmədoğlunun sözlərinə görə, Qarabağ erməniləri gedən proseslərdən çox narahatdırlar: “Bu narahatlığın nəticəsidir ki, separatçı qurumda son dövrlər əlavə təxminən 20-yə yaxın partiya yaranıb. Dağlıq Qarabağ ermənilərinin xarakteri Ermənistan ermənilərindən fərqlidir. Ən başlıcası isə, İrəvan erməniləri ilə Qarabağ erməniləri arasında nifaq böyükdür. Son dövrlər separatçı qurumda çoxsaylı siyasi təşkilatın yaranması Ermənistandan narazılığın göstəricisidir. Görünən odur ki, Paşinyan hər vasitə ilə separatçı qurumu nəzarəti altına salmağa çalışır. O görür ki, Dağlıq Qarabağda əsas namizəd Araik Arutyunyandır. Çünki o, yerli qurumlara keçirilən “seçkiləri” uddu. Bu səbəbdən real güc onun əlindədir. Bu səbəbdən onun şansı daha böyükdür. Paşinyan isə çalışır ki, M.Mailyanı seçdirsin. M.Mailyanın isə Dağlıq Qarabağda elə də nüfuzu və dayağı yoxdur. Onun, sadəcə, müəyyən intellektual səviyyəsi və danışıq qabiliyyəti var. Baxmayaraq ki, o özü əslən Dağlıq Qarabağdandır, Paşinyan istəyir ki, onu seçdirsin və idarə etsin. Ancaq, istənilən halda, klanlararası narazılığın bir az da artacağı gözlənir. Paşinyan şərait yaranan kimi, A.Arutyunyana qarşı zor tətbiq edəcək. Ona görə də tərəflər arasında gərginliyin daha da artacağı gözlənir”.
Vidadi ORDAHALLI
