17/11/2019 04:37
728 x 90

Prezidentin ermənilər üzərində “Valday” və Aşqabad triumflarından sonra radikalların Bakıda arxadan zərbələri...

Məhərrəm Zülfüqarlı: “Azərbaycanın iqtisadi uğurları ilə yanaşı, bu kimi siyasi uğurları müəyyən beynəlxalq dairələri narahat edir”

img

Məlum olduğu kimi, Prezident İlham Əliyev “Valday” Diskussiya Klubunda möhtəşəm çıxış edərək Ermənistanın işğalçılıq siyasətini bir daha ifşa etdi. O, Qarabağın Azərbaycanın ayrılmaz tərkib hissəsi olduğunu bəyan etdi. Daha sonra oktyabrın 11-də Aşqabadda keçirilən MDB Dövlət Başçıları Şurasının Sammitində Prezident İlham Əliyev çıxış edərək Ermənistana növbəti zərbə endirdi.

İlham Əliyev öz çıxışında Ermənistanın faşistlərin adını əbədiləşdirməsinə qəti etirazını bildirdi. “Faşistlərin qəhrəman kimi qələmə verilməsinin əleyhinə dəfələrlə çıxış etmişik” deyən dövlət başçısının fikrincə, təəssüf ki, MDB məkanında, xüsusən Ermənistanda belə hallar baş verir: “Orada əvvəlki hakimiyyət İrəvanın mərkəzində faşist cəlladı və satqın, Qaregin Njde ləqəbi ilə alman faşistlərinə xidmət etmiş Qaregin Ter-Arutyunyana heykəl qoyub. MDB ölkələrindən olan müharibə veteranlarının böyük bir qrupu Ermənistanın əvvəlki rəhbərliyinin bu həyasız addımına qarşı dəfələrlə etirazını bildirib. 2019-cu ilin mayında Rusiya Xarici İşlər Nazirliyi “Nasizmin qəhrəmanlıq kimi qələmə verilməsi, neonasizmin yayılması və irqçiliyin, irqi ayrıseçkiliyin, ksenofobiyanın və onlarla bağlı dözümsüzlüyün müasir formalarının yayılmasına şərait yaradan praktikanın digər növləri ilə bağlı vəziyyət haqqında” məruzə təqdim edib”.

Prezident İlham Əliyevin “Valday” Diskussiya Klubunda verdiyi bəyanatlar, ardınca Aşqabadda Azərbaycanın mövqeyini tam əks etdirən fikirlər səsləndirməsi və sonra 9 aylıq hesabat toplantısının baş tutması fonunda “Milli Şura”nın 19 oktyabrda qanunsuz aksiya keçirməsi diqqətdən yayınmır. Məqsəd Azərbaycan Prezidentinin əldə etdiyi uğurlara kölgə salmaqdır. Bununla həm də Azərbaycan hakimiyyətinin siyasi uğurlarının effektini aşağı salmaq istəyirlər. Bu təxribat həm də Azərbaycana qarşı xaricdə fəaliyyət göstərən dairələrin maraqlarından irəli gəlir.

O baxımdan bütün bunları ekspertlər necə dəyərləndirirlər?

  • “Milli Şura”nın qanunsuz aksiya cəhdi də xarici dairələrin sifarişini özündə ehtiva edir”

Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, məhz məlum dalbadal uğurlu siyasi gedişlərdən sonra “Milli Şura”nın icazəsiz aksiya cəhdi təsadüfi deyil: “Əvvəla nəzərə almaq lazımdır ki, Türkiyə və Pakistandan başqa, digər böyük ölkələr Azərbaycanın uğurlarına sevinmir. Böyük dövlətlər Azərbaycanın inkişafında, Qarabağ probleminin həllində maraqlı deyil. Çünki Azərbaycan inkişaf edib gücləndikcə, aparıcı dövlətə çevrilir, regionla yanaşı, dünyada söz sahibi olur. Prezident İlham Əliyev “Valday” Diskussiya Klubunda və Aşqabadda MDB dövlətlərinin tədbirində çox möhtəşəm çıxışlar etdi. Ermənistanın işğalçılıq siyasətini ifşa etməklə yanaşı, ermənilərin faşistlərə bəslədiyi rəğbəti dünyaya göstərdi. Azərbaycanın iqtisadi uğurları ilə yanaşı, bu kimi siyasi uğurları müəyyən beynəlxalq dairələri narahat edir. Ona görə də həmin dairələr Azərbaycanda qarşıdurma yaradıb stabilliyi pozmaq istəyirlər. Milli Şuranın qanunsuz aksiya cəhdi də xarici dairələrin sifarişini özündə ehtiva edir. Çünki radikal müxalifət xaricdən idarə edilir. Qarşıdurma dərinləşsə, o zaman xarici dairələr öz istəyinə çatacaq. Nəticədə Azərbaycanın mənafeləri arxa plana keçəcək. Ona görə də bütün bunların arasında əlaqə var. Radikal müxalifət istəsə də, öz mövqeyini dəyişə bilməz. Çünki onlar xaricdən idarə edilir. Ona görə də Azərbaycan vətəndaşları ayıq olmalı və dövlətin güclənməsinə bilavasitə öz töhfələrini verməlidirlər”.

Vidadi ORDAHALLI

Son xəbərlər