Prezidentin ictimai-siyasi məsələlər üzrə köməkçisi-şöbə müdiri Əli Həsənov dövlət televiziyasının efirində 19 oktyabr mitinqindən danışarkən deyib ki, kimin hakimiyyətlə bağlı problemi varsa, Prezidentin köməkçisi kimi o və digər 6-7 köməkçisi, yəni hər biri, onların müvafiq problemlərini dinləməyə hazırdır.
O bildirib ki, 28 May meydanı ətrafında nəqliyyat vasitələrindən - avtobuslardan, metrodan gün ərzində 200 minə yaxın Bakı şəhər sakini istifadə edir: “O cümlədən, həmin meydanın ətrafı kifayət qədər sıx şəkildə sahibkarlıq obyektləri, dükanlar, ticarət mərkəzləri, məktəblər, xəstəxanalar, institutlar olan bir yerdir. Təsəvvür edin ki, Azərbaycan müxalifətinin bu antimilli, antivətəndaş aksiyası, sözün həqiqi mənasında, Bakının 200 mindən artıq insanının ritmik həyatını pozdu. Həmçinin, nəqliyyatın ritmik hərəkətini, şəhərin ictimai-siyasi asayişini pozdu. Polis oqranları asayişi qorumaq üçün məcbur oldu ki, vətəndaşların hərəkətini məhdudlaşdırsın. Ona görə də mən polis orqanlarının və Azərbaycan dövlətinin adından dinc vətəndaşlarımıza, həmin gün o aksiyaya heç bir aidiyyəti olmayan vətəndaşlarımıza yaratdığımız bu diskomforta görə üzr istəyirəm. Əslində, müxalifət üzr istəməlidir. Bu işin məsuliyyətini kimsə daşımalıdır, ya daşımamalıdır?! 200 min adamın ritmik həyatının pozulmasının məsuliyyətini müxalifət, təşkilatçılar, Azərbaycanın mərkəzini qarşıdurmaya, xaosa, anarxiyaya çevirmək istəyən siyasətçilər daşıyır. 25-26 ildir ki, mənim də təmsil olunduğum hakimiyyət Azərbaycan dövlətini idarə edir. Azərbaycanın iqtisadi-siyasi, sosial siyasətini formalaşdırır və həyata keçirir. Azərbaycan vətəndaşları ilə təmasa girir. Onun hakimiyyət mandatına sahib olur. Onların istək və arzularını həyata keçirmək üçün siyasət yürüdür. Azərbaycan vətəndaşları da, bütövlükdə, bu hakimiyyətdən razıdırlar. Bunu keçirilən sorğular göstərir. Yəni bir ölkənin hakimiyyətini, liderini hakimiyyətdən salmağın, devirməyin yolu Azərbaycan vətəndaşlarının iradəsindən, istəyindən keçir. Bu iradəni, istəyi qazana bilməyən istənilən qüvvə iflasa məhkumdur. Necə ki, Azərbaycan müxalifəti 25-26 ildir ki, iflasa uğrayıb, Azərbaycan xalqı tərəfindən boykot olunub. Bunu birmənalı şəkildə bizim vətəndaşlar anlamalıdır”.
Cənab Əli Həsənovun yazısından görünür ki, icazəsiz aksiya zamanı dinc vətəndaşların istirahət və digər konstutision haqları pozulub. Ancaq maraqlıdır ki, buna görə təşkilatçılar hələ də xalqdan üzr istəmək istəmirlər. Əli Həsənov isə Azərbaycan dövləti adından belə üzrxahlığı edir. Qanunsuz aksiya təşkilatçılarının nümayiş etdirdiyi bu siyasi davranışa hansı adı vermək olar?
“İstənilən siyasi mübarizədə bu əxlaq gözlənilməlidir”
AXCP adına iddialı olan siyasi partiyanın funksioneri Rəfail Becanov “Bakı-Xəbər”ə açıqlamasında bildirdi ki, bu məsələdə ən böyük məsuliyyət aksiyanı təşkil edənlərin üzərinə düşür: “Çünki bir insanın azadlığı başqa bir şəxsin hüquqları başlayan yerdə bitir. Ona görə də təşkilatçılar bunu mütləq nəzərə almalıydılar. Bilirsiniz ki, qanunvericiliyimizdə qanunsuz aksiyaların keçirilməsi qadağandır. Təşkilatçılar bilirdilər ki, orada qarşıdurma, asayişin pozulması olacaq. Belə də oldu. Siyasətə aidiyyəti olmayan bir çox sadə vətəndaşın hüquqları pozuldu. İstirahət, gediş-gəliş və hətta ticarət etmək kimi hüquqları pozuldu. İnsanlar öz evlərinə rahat gedə bilmədilər. Həmin ərazidə nəqliyyatın vəziyyəti, demək olar ki, iflic edildi. Buna görə hökumət öz üzrxahlığını etdi. Konkret ifadə etsək, hörmətli Əli Həsənov belə bir açıqlama verdi. Bu əsl siyasi əxlaq nümayişidir. Belə bir siyasi mədəniyyəti, əslində, təşkilatçılar ortaya qoymalıydı. Hətta hadisələrdən əvvəl də bunu edə bilərdilər. Deyərdilər ki, belə bir iş görəcəyik, yaratdığımız narahatlığa görə üzr istəyirik. Hansısa tikinti şirkəti bir iş görəndə belə məzmunlu plakat yazıb, xalqdan üzrxahlıq edirsə, bunlar niyə etməməlidirlər? Bu da onu göstərir ki, onlarda siyasi mədəniyyət deyilən keyfiyyət yoxdur. İstənilən siyasi mübarizədə bu əxlaq gözlənilməlidir. Çox təəssüflə qeyd etməliyik ki, onlar bu mədəniyyətsizliyi aksiyadan sonrakı davranışlarında da ortaya qoydular. Aksiyada şəkillər paylaşıb, yalnız söyüş söyə bildiklərini üzə çıxardılar”.
Məhəmmədəli QƏRİBLİ
