Suriyadan çəkilən ABŞ əsgərlərinə atılan yumurtalar – sadə kürdlər PKK terrorçuları ilə birlikdə olduğunu göstərir

Kürd qüvvələri Suriyanın şimalından çəkilməyə davam edir. Bu arada ABŞ hərbçiləri də Suriyanın şimalını tərk edirlər. Oktyabrın 21-də 100 zirehli avtomobildən ibarət ABŞ hərbi konvoyu Suriya ərazisindən İraqa keçib. Suriyanın İraqla sərhəddə yerləşən Simelka sərhəd-keçid məntəqəsindən İraqa keçən qüvvələr İraqın Duhok ərazisindən keçməklə Ənbar vilayətindəki Ayn əl-Əsəd hərbi bazasına yerləşiblər.

Ancaq Suriyanın şimal-şərqində yerləşən və kürdlərin işğalı altında olan Əl-Kamışlı şəhərinin sakinləri ABŞ hərbi maşınlarının ölkədən çıxan karvanına daş və tərəvəz atıblar. Qeyd olunur ki, belə reaksiya ABŞ Prezidenti Donald Trampın Suriyanın şimalından qoşunları çıxarmaq qərarına cavab olaraq göstərilib. Bununla bağlı yayılan videokadrlardan görünür ki, yerli əhali Amerika hərbi və yük maşınlarının yolunu kəsməyə çalışır, onlara daş, kartof və pomidorlar atırlar. Hərbi konvoyun qarşısını kəsən etirazçı qrup ABŞ əleyhinə şüarlar səsləndirərək Vaşinqtonu kürdlərə xəyanətdə ittiham edib.

Türkiyə hər zaman bəyan edib ki, bu ölkə kürdlərə qarşı yox, terrorçu təşkilat olan PKK-ya və onun qolu olan YPG-yə qarşı vuruşur. Məqsəd bölgəni terrorçulardan təmizləmək, orada yaşayan dinc insanların təhlükəsizliyini təmin etməkdir. Ancaq bölgədə yaşayan sakinlərin ABŞ-ın öz hərbçilərini oradan çıxarmasına bu cür etiraz etmələri müəyyən suallara yol açır. Belə məlum olur ki, Suriyanın şimalında yaşayan kürdlər PKK və YPG ilə bir yerdədirlər. Onların fəaliyyətini dəstəkləyirlər.  

Maraqlıdır, bəs ekspertlər bunu necə dəyərləndirirlər?  

• “Onlar terrorçuları dəstəkləməklə, bir növ, Türkiyəyə qarşı düşmənçilik siyasəti aparırlar”

Sözügedən məsələni “Bakı-Xəbər”ə şərh edən politoloq Məhəmməd Əsədullazadənin sözlərinə görə, bu onu göstərir ki, Suriya kürdlərinin böyük hissəsi PKK-ya rəğbət bəsləyir: “Türkiyənin Şimali Suriyada PKK terror təşkilatının Suriya qolu olan YPG terror təşkilatına qarşı hərbi əməliyyatı əsasən bu terror qruplaşmasının məhv edilməsinə yönəlib. Heç vaxt Türkiyə sadə kürdlərə qarşı hərbi əməliyyat keçirmir. Baxmayaraq ki, Suriyada kürdlərin böyük çoxluğu PKK terror təşkilatına simpatiya bəsləyir. Yaşananlar bunu göstərir. Biz bunu ABŞ hərbçilərinin Suriyanın kürdlərin yaşadığı ərazilərdən çıxarkən onlara qarşı etirazından görürük. Demək, burada kürdlər daim terrorçuları dəstəkləyiblər. ABŞ öz maraqları kontekstində Türkiyə ilə anlaşaraq bu regionu tərk edir. Hesab edirəm ki, burada kürdlər sözügedən terror qruplaşmasını dəstəkləməklə Suriyadan ayrılmağı planlayırlar. Ona görə də ABŞ-ı bu terror təşkilatını müdafiə etməməkdə günahlandırırlar. Türkiyənin “Barış Pınarı” hərbi əməliyyatı uğurla davam edir. Demək olar ki, Türkiyə öz hərbi və siyasi hədəflərinə yaxınlaşıb. 120 saat bitdikdən sonra terrorçular regiondan çıxmasa, Türkiyə yenidən hərbi əməliyyatları davam etdirəcək. Məhz burada Türkiyə elə bir incə əməliyyat həyata keçirir ki, mülki insanlara və infrastruktura ziyan dəymir. Bu, Türkiyənin dinc əhaliyə böyük önəm verməsinin göstəricisidir. Ancaq oradakı kürdlər PKK və YPG-ni dəstəkləməklə, bir növ, Türkiyəyə qarşı düşmənçilik siyasəti aparırlar. Ancaq buna baxmayaraq, Türkiyə yenə də kürdlərə qarşı qəti surətdə hərbi fəaliyyətə yol vermir”.

Vidadi ORDAHALLI