Prezidentin yaşı 70-dən yuxarı məmurlara mesajlarındakı əsas elementlər - hörmət, qətiyyətli çağırış, əməyə qiymət...
Azərbaycan Respublikasının Prezidenti İlham Əliyev oktyabrın 21-də Azərbaycan Respublikası Baş nazirinin müavini Hacıbala Abutalıbovu vəzifədən azad edilməsi ilə bağlı verdiyi ərizəsi ilə əlaqədar qəbul edib.
Prezident İlham Əliyev qəbulda Hacıbala Abutalıbovla səmimi söhbət edib. Ölkə başçısı yazılan ərizənin ona çatdığını deyib: “Hacıbala müəllim, siz bu gün mənə Baş nazirin müavini vəzifəsindən azad olunmağınızla bağlı ərizə göndərmisiniz. Mən istərdim ki, sizə gördüyünüz işlərə görə öz təşəkkürümü bildirim. Uzun illərdir ki, siz müxtəlif vəzifələrdə çalışırsınız, həm Baş nazirin müavini vəzifəsində, 17 il Bakı Şəhər İcra Hakimiyyətinin başçısı kimi və son ilyarımda yenə də Baş nazirin müavini işləyirsiniz. Bilirəm ki, siz həmişə ulu öndər Heydər Əliyevə sadiq olmusunuz. Heydər Əliyev üçün ən ağır dövrlərdə siz öz sözünüzü demisiniz. Bəzi gənclər əlbəttə ki, bunu bilmir və bəzi adamlar bunu yaddan çıxarır. Amma mən heç vaxt bunu unutmuram ki, o vaxt süni şəkildə ortalığa atılmış yaş senzi məsələsinə qarşı siz qəti etiraz bildirmisiniz. O vaxt ulu öndər Heydər Əliyevin xalq qarşısında nüfuzu çox yüksək idi və xalq ondan başqa heç kimi rəhbər vəzifəsində görmürdü. Onun gələcək fəaliyyətini əngəlləmək üçün o vaxt partokrat hakimiyyət yaş senzi kimi çox cəfəng bir qaydanı tətbiq etmişdi. Səhv etmirəmsə, 65 yaşdan yuxarı olan şəxs Prezident ola bilməzdi. Ulu öndərin də o vaxt 69 yaşı vardı və yadımdadır, siz parlamentin qarşısında kütləvi etiraz aksiyaları təşkil etmisiniz, öz sözünüzü demisiniz, heç kimdən qorxmamısınız. Çünki o vaxt repressiya təhlükəsi çox böyük idi və Heydər Əliyevin hakimiyyətə gəlməsini əngəlləmək istəyənlər müxtəlif çirkin əməllərə əl atmışlar. Heydər Əliyevin yaxın silahdaşı Əjdər Xanbabayevi vəhşicəsinə qətlə yetirdilər, özü də nə vaxt? Həmin gün ki, Heydər Əliyev Moskvadan Bakıya gəlməli idi. Mən ondan bir gün qabaq Bakıya gəlmişdim ki, onu qarşılayım. Onun gəlişini əngəlləmək, ona hədə-qorxu gəlmək üçün günahsız bir insanı, ziyalını – Əjdər Xanbabayevi həmin o dəstə qətlə yetirdi. Düzdür, sonra onu öldürənlər öz layiqli cəzalarını aldılar və Heydər Əliyevin Azərbaycana qayıtmasını heç kim əngəlləyə bilmədi. Bütün təhlükələrə baxmayaraq, o, Bakıya gəldi, öz sözünü dedi. İndiki bəzi dırnaqarası özünü lider adlandıran qorxaqlardan fərqli olaraq, o, hər bir təhlükəyə, hər bir məhrumiyyətə getməyə hazır idi. Onun böyüklüyü bundadır və siz Hacıbala müəllim, o vaxt öz sədaqətinizi göstərmisiniz, həm ulu öndərə, həm Vətənə, dövlətə, xalqımıza. Çünki Heydər Əliyevin hakimiyyətə gəlməsi bizi çox böyük fəlakətdən qorudu. Təsadüfi deyil ki, ulu öndər sizə böyük vəzifələr təklif etmişdir, Baş nazirin müavini vəzifəsinə təyin etdi, ondan sonra Bakı Şəhər İcra Hakimiyyətinin başçısı, ondan əvvəl isə siz Suraxanı rayonunda icra başçısı işləmisiniz. Yadımdadır, sizin o vaxt fəaliyyətiniz də bəziləri üçün bir növ təəccüblü idi, çünki bildiyimə görə, qapılarınız açıq idi, kim istəyirdi gəlirdi. Vətəndaşların problemləri ilə maraqlanırdınız və bu, bir novatorluq idi. İndi bəziləri bunu yaddan çıxarır, amma mən yaddan çıxarmıram və bu gün sizi dəvət etmişəm ki, bunu sizə deyim və Azərbaycan vətəndaşları da bunu bilsinlər. Ancaq həyat yerində durmur, qarşıya yeni vəzifələr qoyulur, yeni çağırışlar qarşımızda durur. Yaşınız da artıq 75-i keçibdir və əlbəttə ki, daha gənc nəslə yol vermək lazımdır. Ona görə sizin ərizə ilə mənə müraicətinizi yüksək qiymətləndirirəm. Hesab edirəm ki, pensiya yaşına çatmış, hər halda 70 yaşını keçən iqtidarda təmsil olunanlar da yəqin ki, sizin nümunənizi təkrar edəcəklər. Hər halda, mən buna ümid edirəm. Siz Yeni Azərbaycan Partiyasında da fəal iş görürsünüz. Hesab edirəm ki, bundan sonra da partiya tərkibində siz öz fəaliyyətinizi davam etdirməlisiniz. Sizə gələcək fəaliyyətinizdə uğurlar arzulayıram və gördüyünüz işlərə görə təşəkkürümü bildirirəm”.
Göründyü kimi, ölkə başçısı iqtidarda təmsil olunan, yaşı 70-i keçmiş şəxslərin də bundan nümunə götürməsinin vacibliyini vurğulayıb. Hacıbala Abutalıbovla söhbətdən görünür ki, Prezident mərhum prezident Heydər Əliyevin silahdaşlarına, onun vaxtında vəzifəyə təyin olunan və dövlətçilik üçün xidmətləri olan adamlara xüsusi ehtiramla yanaşır. O da aydın görünür ki, ölkə başçısı bu qəbildən olan şəxslərlə siyasi etika çərçivəsində davranır. Bəs onlar bunun müqabilində nə etməlidirlər? Prezidentin yaşı 70-i keçmiş məmurlarla bağlı etdiyi çağırışa hansı formada reaksiya verməlidirlər?
- “Bu məsələdə Prezidentin nümayiş etdirdiyi siyasi etikaya, onun çağırışına səs verilməlidir”
Milli QHT Forumunun prezidenti Rauf Zeyni “Bakı-Xəbər”ə açıqlamasında bildirdi ki, cənab Prezidentin həmin çağırışı çox yerindədir və buna böyük zərurət var: “Bilirsiniz ki, kadr potensialının yenilənməsi lazımdır. Bunun idarəetmənin effektinin artırılmasında da böyük əhəmiyyəti var. Köhnə kadrların istefaya getməsi heç də o anlama gəlimir ki, onlar hansısa xətaya yol veriblər. Vəzifə heç kim üçün əbədi deyil, mütləq mənada cavanlara yol açılmalıdır. Cənab Prezident çox böyük mədəniyyətin daşıyıcısı olan bir ailədə böyüyüb. Heydər Əliyev və Zərifə xanımdan alınan tərbiyə onun bütün addımlarında, davranışlarında özünü göstərir. O, təkcə kadr məsələsinə deyil, bütün vacib detallara həmin məfkurədən yanaşır. Ölkə başçısı bir daha göstərdi ki, o, Heydər Əliyev siyasi yolunda xidmətləri olan şəxslərə böyük sayğı və ehtramla yanaşır. Bu məsələdə Prezidentin nümayiş etdirdiyi siyasi etikaya, onun çağırışına səs verilməlidir. Təşəbbüs yaşı 70-i keçən məmurlardan gəlməlidir. Prezidentin bu işarəsindən nəticə çıxarılıb, adekvat addımlar atılmalıdır. Bu heç də o anlama gəlmir ki, dövlətçiliyimiz üçün xidmətləri olan şəxslər unudulmalıdır. Onların bilik və bacarığından, məsləhətlərindən istifadə olunmalıdır. Məsələn, mən öz nümunəmi göstərirəm. 20 ildir QHT sektorundayam. 25 ildir dövlət vəzifəsi daşımıram. Vaxtilə Sumqayıtda şəhər sovetinin sədr müavini olmuşam. İmkanımız nəyə çatıbsa, Vətənə fəda etmişik, bundan sonra da edəcəyik. Məgər Vətənə, dövlətə qulluq etmək üçün mütləq vəzifən olmalıdır? Bu baxımdan da hesab edirəm ki, yaşı keçmiş adamlar gənclərə yol açmalıdırlar. Hər halda, Prezident bu zərurəti hiss edir ki, belə müraciət etdi. Əgər dövlət başçısı bunun siyasi etika çərçivəsində həllini istəyirsə, niyə qarşılıq verilməməlidir? Təbii ki, Prezident istədiyi adamı vəzifədən çıxara bilər. Ancaq o çalışır ki, bu bir qədər siyasi etiket səviyyəsində olsun”.
Məhəmmədəli QƏRİBLİ
