21/11/2019 00:01
728 x 90

Heydər Əliyev bu qorxaq liderlərin tayı deyildi – Prezidentin müqayisəsi nə qədər uğurlu sayılır...

Elçin Mirzəbəyli: “Ölkə başçısının bununla bağlı müqayisəsi tam yerində olmaqla yanaşı, reallığı əks etdirir”

img

Bəzi indiki dırnaqarası özünü lider adlandıran qorxaqlardan fərqli olaraq, Heydər Əliyev hər bir təhlükəyə, məhrumiyyətə getməyə hazır idi. Bunu Prezident İlham Əliyev Baş nazirin müavini Hacıbala Abutalıbovu vəzifədən azad edilməsi ilə bağlı verdiyi ərizəsi ilə əlaqədar qəbul etdiyi zaman deyib.

Ölkə başçısının sözlərinə görə, o vaxt ulu öndər Heydər Əliyevin xalq qarşısında nüfuzu çox yüksək idi və xalq ondan başqa heç kimi rəhbər vəzifəsində görmürdü: “O vaxt repressiya təhlükəsi çox böyük idi və Heydər Əliyevin hakimiyyətə gəlməsini əngəlləmək istəyənlər müxtəlif çirkin əməllərə əl atmışlar. Heydər Əliyevin yaxın silahdaşı Əjdər Xanbabayevi vəhşicəsinə qətlə yetirdilər, özü də nə vaxt? Həmin gün ki, Heydər Əliyev Moskvadan Bakıya gəlməli idi. Mən ondan bir gün qabaq Bakıya gəlmişdim ki, onu qarşılayım. Onun gəlişini əngəlləmək, ona hədə-qorxu gəlmək üçün günahsız bir insanı, ziyalını – Əjdər Xanbabayevi həmin o dəstə qətlə yetirdi. Düzdür, sonra onu öldürənlər öz layiqli cəzalarını aldılar və Heydər Əliyevin Azərbaycana qayıtmasını heç kim əngəlləyə bilmədi. Bütün təhlükələrə baxmayaraq, o, Bakıya gəldi, öz sözünü dedi. İndiki bəzi dırnaqarası özünü lider adlandıran qorxaqlardan fərqli olaraq, o, hər bir təhlükəyə, hər bir məhrumiyyətə getməyə hazır idi. Onun böyüklüyü bundadır”.

Həqiqətən də Heydər Əliyev böyük siyasətçi olaraq bir sıra məhrumiyyətlərə, təhlükələrə sinə gərdi. Xalqın mənafeyi naminə böyük təhlükələrlə üzləşsə də, geri addım atmadı. Özünü “lider” hesab edən bəzi müxalifət təmsilçiləri kimi qorxaqlıq göstərmədi. O baxımdan, Prezidentin sözügedən müqayisəsi indiki dövrdə nə dərəcədə yerindədir?

  • “Qorxaq olduqları üçün kritik situasiyalarda cəsarət ortaya qoya bilməyiblər”

Məsələyə münasibət bildirən politoloq Elçin Mirzəbəylinin sözlərinə görə, ölkə başçısının bununla bağlı müqayisəsi tam yerində olmaqla yanaşı, reallığı əks etdirir: “Azərbaycanın yaxın tarixində baş verən hadisələr çoxlarının yadındadır. Hansı ki, öz vəzifə səlahiyyətlərinə sahib çıxa bilməyən insanların necə davrandığının şahidi olmuşuq. Eyni zamanda, bəzi radikal dağıdıcı qrupların rəhbərlərinin də siyasi proseslərdəki davranışlarını, öz tərəfdaşlarına münasibətdə necə mövqe sərgilədiklərini çox görmüşük. Azərbaycan üçün önəmli olan məqamlarda dövlətin və millətin yanında deyil, əks qütbdə qaldıqlarının şahidi olmuşuq. Qorxaq olduqları üçün kritik situasiyalarda cəsarət ortaya qoya bilməyiblər. Buna rəğmən, utanmadan özlərini lider hesab edirlər. Bu aspektdən, təbii ki, cənab Prezidentin səsləndirdiyi fikirlər reallıqları əks etdirir. Heydər Əliyevin ən çətin situasiyalarda sərgilədiyi davranışlar bir nümunə, bir örnək olmalıdır. Özünü siyasi proseslərə hazırlayan şəxs, ilk növbədə, Heydər Əliyevdən öyrənməlidir”.

Vidadi ORDAHALLI

Son xəbərlər