Əli Həsənov sabotajçı məmurlar-media sövdələşmələrinin ünvanını bir az da konkretləşdirdi

“Burada konkret ad sadalamaq mümkün deyil. Digər tərəfdən də cənab Prezident bilir ki, hansı məmurlar Prezidentin yürütdüyü islahat kursuna maneə törətməyə çalışır, gizli yollarla sabotaj nümayiş etdirir. Əlbəttə, bunları cənab Prezident bilir, zamanı çatdıqca da bu insanlar öz cəzasını alacaqlar”.

Bunu Prezidentin ictimai-siyasi məsələlər üzrə köməkçisi Əli Həsənov mətbuata verdiyi müsahibəsində bildirib. Ə.Həsənov onu da qeyd edib ki, Prezidentin irəli sürdüyü islahatlar kursu bir ildən artıqdır, sözün həqiqi mənasında, ölkədə öz nəticələrini göstərməkdədir və islahatlar nəticəsində büdcəyə daxilolmalar artıb: “Əlbəttə, burada maddi marağına toxunulan şirkətlər, şirkət rəhbərləri də var. Bizim məmurların da bir qisminin yaxınları, ətrafında olan insanlar kommersiya ilə məşğuldur, bəzən kommersiya strukturlarında vergi sisteminə müqavimət hərəkətləri də müşahidə olunur. Bu barədə mediada da mütəmadi məlumatlar yayılır. Cənab Prezident bu çağırışları edir ki, şirkət rəhbərləri, məmurlar və onların ətrafındakı insanlar dövlətin islahatlar kursunu sabotaj etməsinlər. Dövlətin siyasi iradəsi ortadadır. Heç kim buna mane ola bilməz. Əgər belələri aşkarlanarsa, onlar cəzalandırılacaqlar. Bəzən mübarizə aparmaq üçün mətbuatdan da istifadə edirlər. Ayrı-ayrı saytlarda, xüsusən də reket saytlarda başqa-başqa insanlar, o cümlədən, islahatları həyata keçirən qurumlar haqqında müəyyən materiallar yayırlar. Belə hallara qarşı Azərbaycan Prezidenti və iqtidarı ciddi iradə meydana qoyub. Bu iradənin də nəticəsi olaraq bu tip neqativ hallar tezliklə aradan qaldırılacaq”.

Görünən odur ki, sabotajçı məmurlar və media barədə Prezidentin iqtisadi müşavirədə dediklərini Ə.Həsənov bir qədər də konkretləşdirdi. Bir daha aydın oldu ki, belələrinə qarşı mübarizə aparılacaq və islahatlar kursu davam etdiriləcək. Kimliyindən asılı olmayaraq, buna mane olanlar cəzalandırılacaqlar.

• “İslahatları sabotaj etməyə çalışanlar zamanı gəldikcə cəzalandırılacaqlar”

Sözügedən məsələ ilə bağlı fikirlərini “Bakı-Xəbər”lə bölüşən politoloq Elşən Manafovun fikrincə, Ə.Həsənovun açıqlamasından belə məlum oldu ki, islahatların aparılması davamlı olacaq və kimlərsə bunu əngəlləyə bilməyəcək: “Prezident İlham Əliyev son müşavirədə hakimiyyət daxilində islahatlara mane olan bəzi məmurların olmasına eyham vurdu. Bu belə qənaətə gəlməyə əsas verir ki, hakim komanda tərkibində mühafizəkar düşüncə tərzinə malik olan insanlar var. O cümlədən, ölkə başçısının islahatlar kursuna birmənalı surətdə dəstək verən və yeni texnologiyalarla işləməyə hazır olan şəxslər var. Yeniliklərə yiyələnmiş kifayət qədər cavan və daha məsuliyyətli kadr var. Təsadüfi deyil ki, Prezident İlham Əliyev Baş nazirin müavini Əli Həsənovu vəzifədən azad edilməsi ilə bağlı verdiyi ərizəsi ilə əlaqədar onu qəbul edərkən bir sıra məqamlara toxundu. Xüsusən ölkə başçısı onu qeyd etdi ki, o bununla bağlı yaxşı nümunə göstərdi: “Gənc kadrlara yer vermək üçün hesab edirəm ki, siz yaxşı nümunə göstərirsiniz. Ümid edirəm ki, iqtidar komandasında təmsil olunan digər yoldaşlara da bu, yaxşı bir örnək olacaqdır”. Bu, Prezident tərəfindən verilən kifayət qədər açıq mesaj idi. Bu o deməkdir ki, iş qabiliyyəti yüksək olan komanda təşkil olunacaq. Bütün bunlar onu göstərir ki, islahatların aparılması artıq günün vacib tələblərindən biridir. Dünya dəyişir və Azərbaycanda da cəmiyyət islahatlara tamarzıdır. Bunu hamıdan əvvəl ölkə başçısının görməsi və qiymətləndirməsi təqdirəlayiqdir. Görünən odur ki, hansısa məmurlar saytlara və reket mediasına məlumat ötürməklə islahatları əngəlləyə bilməyəcəklər. İslahatları sabotaj etməyə çalışanlar zamanı gəldikcə cəzalandırılacaqlar. Buna kimsənin şübhəsi olmamalıdır”.

Vidadi ORDAHALLI