Müşfiq Ələsgərli: “...aksiyanın keçirildiyi məkana gələn media təmsilçilərinə hüquq-mühafizə orqanlarının əməkdaşları tərəfindən heç bir maneçilik törədilməyib”
Oktyabr ayının 19-da bəzi destruktiv qruplar köhnə "ənənələrinə” sadiq qalaraq insanların rahatlığını pozmaqla razılaşdırılmamış küçə yürüşü keçirməyə, kütləvi iğtişaşlar törətməyə, asayişi kobud şəkildə pozmağa cəhd etdilər. Lakin hüquq-mühafizə orqanları tərəfindən qanunsuz yürüşün qarşısı alındı. Ancaq aksiyadan sonra müxalifət düşərgəsindən olan bəzi şəxslər və xaricdə fəaliyyət göstərən bir qrup jurnalist təşkilatları aksiya zamanı peşə fəaliyyətlərini yerinə yetirən media təmsilçilərinə maneçilik törədildiyini və saxlananlar arasında jurnalistlərin də olduğunu iddia edirlər.
Nyu-Yorkda yerləşən Jurnalistləri Müdafiə Komitəsi (JMK) oktyabrın 19-da Bakıda mitinq zamanı etirazçılarla birlikdə jurnalistlərin də saxlanması faktları ilə bağlı narahatlığını ifadə edib. Hətta JMK bununla bağlı bəyanat yayıb. Bəyanatda deyilir: "Azərbaycan hakimiyyəti jurnalistlərin nümayişləri işıqlandırması üçün şəraiti təmin etməli və qeyri-proporsional güc tətbiqindən yayınmalıdır".
Ancaq həqiqətdə isə vəziyyət fərqlidir. Aksiya zamanı peşə fəaliyyətlərini yerinə yetirən jurnalistlərə heç bir maneçilik törədilməyib. Əksinə, hüquq-mühafizə orqanlarının əməkdaşları üzərində “Press” geyimi olan şəxslərə çəkilişlərini aparması üçün şərait yaradıblar. Bunu sosial şəbəkədə yayımlanmış paylaşımlar vasitəsilə də müşahidə etmək olar. Azərbaycan hakimiyyəti hər zaman peşə fəaliyyətini yerinə yetirən media təmsilçilərini lazımi şəraitlə təmin edib.
- “Aksiyada iştirak edənlər arasında jurnalist adından istifadə edənlər olub”
Mətbuat Şurasının sədr müavini Müşfiq Ələsgərli “Bakı-Xəbər”ə açıqlamasında qeyd etdi ki, 19 oktyabr mitinqini işıqlandırmaq üçün aksiyada iştirak edən media təmsilçilərinə peşə fəaliyyətlərini yerinə yetirməsi üçün hər bir şərait yaradılmışdı: “Jurnalistlər sərbəst şəkildə işlərini həyata keçiriblər. Sadəcə olaraq, aksiyada iştirak edənlər arasında jurnalist adından istifadə edənlər olub. Belə ki, həmin şəxslərin bir qismi original olmayan gödəkçələrdən istifadə ediblər. Əslində, onlar jurnalist deyil, aksiya iştirakçısı idilər. Həmin şəxslərin jurnalist gödəkçəsinin harada və necə əldə etdiyini araşdırdıq. Jurnalist adından istifadə edənlər yürüş zamanı şüarlar səsləndirirdilər. Belə olan halda, həmin şəxslər hüquq-mühafizə orqanlarının əməkdaşları tərəfindən nəzarətə götürüldülər. Mətbuat Şurasına məxsus jurnalist gödəkçələrini geyinənlər isə yalnız peşə fəaliyyətlərini icra etməklə məşğul olublar. Mitinqi işıqlandırmaq üçün aksiyanın keçirildiyi məkana gələnlər peşəkar fəaliyyətlə məşğul olublar. Və onlara hüquq-mühafizə orqanlarının əməkdaşları tərəfindən heç bir maneçilik törədilməyib. Jurnalistlər sərbəst şəkildə qeydlərini götürüb, çəkilişlərini apararaq, reportajlarını hazırlayıblar”.
Günel CƏLİLOVA
