21/11/2019 18:12
728 x 90

Fransada 10-cu şəhərin ermənilərlə saxta “qardaşlaşma sazişi” ləğv olundu

Vaqif Abışov: “Fransa məhkəməsinin belə bir qərar verməsində Azərbaycan dövlətinin məqsədyönlü, uğurlu xarici siyasət aparmasının təsiri, rolu şübhəsizdir”

img

Uzun illərdir ermənilər işğal etdikləri Azərbaycan ərazilərində saysız saxtakarlıq həyata keçiriblər. Onlardan biri də işğal altında olan Azərbaycan şəhərlərinin Avropa ölkələri şəhərləri ilə “qaraşlaşdırılması”dır ki, bu da, heç şübhəsiz, xaricdəki erməni lobbisinin saxtakar fəaliyyəti və o şəhərlərin rəhbərliyinə təsir göstərməsi nəticəsində baş tutub.

Erməni lobbisinin dəridən-qabıqdan çıxmasına, özünü oda-közə vurub “qardaşlaşdırma”nı dərinləşdirməyə cəhd göstərməsinə baxmayaraq, haqq-ədalət öz yerini tutur. Bildiyimiz kimi, indiyə qədər işğal olunmuş Azərbaycan şəhərləri ilə xarici ölkə şəhərləri arasında imzalanan “qardaşlaşma sazişləri”nin həmin ölkələrin məhkəmələrinin hökmü ilə ləğv edilməsinin şahidi oluruq. İndiyə qədər Fransanın ayrı-ayrı şəhər məhkəmələrinin qərarı ilə 9 “qardaşlaşma sazişi”nə xitam verilib.  

Bu günlərdə isə Fransada bu istiqamətdə Azərbaycanın xeyrinə 10-cu məhkəmə baş tutub. Belə ki, qondarma rejimlə imzalanmış “xartiya”nın daha biri ləğv edilib.

Məlumatlara görə, oktyabrın 17-də Lion inzibati məhkəməsi Fransanın Vilörban kommunası ilə Azərbaycanın işğal olunmuş Şuşa şəhəri arasında 2015-ci il mayın 18-də imzalanmış “xartiya”nı ləğv edib. Bu barədə mətbuata Azərbaycan Xarici İşlər Nazirliyindən bildirilib.

Məlumatda Fransa məhkəməsinin Azərbaycan və Fransa milli qanunvericiliyinə zidd olaraq imzalanan qanunsuz “saziş”in ləğv olunmasına dair qərarı alqışlanıb: "Bu günədək Fransa şəhərləri ilə Azərbaycanın işğal olunmuş ərazilərindəki qondarma rejim tərəfindən yaradılan “yerli hakimiyyət orqanları” arasında imzalanan 10 qanunsuz “müqavilə” Fransanın müvafiq məhkəmə qərarları ilə ləğv olunub. Xüsusilə qeyd olunmalıdır ki, Azərbaycanın Dağlıq Qarabağ regionunun tarixi mərkəzi olan Şuşa şəhəri ilə imzalanmış 3 qanunsuz “xartiya”nın hamısı ləğv edilib”.

“Azərbaycan tərəfi inanır ki, hazırda qüvvədə olan və Fransa qanunvericiliyi, xüsusilə də ölkə Konstitusiyasının 73-cü maddəsi ilə ziddiyyət təşkil edən digər qanunsuz “sənədlər” də tezliklə Fransa məhkəmələri tərəfindən ləğv ediləcək. Qanunun aliliyi hər şeydən üstündür və Fransadakı erməni lobbi qrupları başa düşməlidirlər ki, onların Fransa qanunlarını və bu ölkənin beynəlxalq öhdəliklərini pozmaq bahasına öz maraqlarını reallaşdırmaq cəhdləri uğursuzluğa düçardır" - deyə Azərbaycan Xarici İşlər Nazirliyinin yaydığı məlumatda bildirilir.

  • “...digər xarici ölkələrdə də təkrarlana bilər”

Azərbaycan Milli Elmlər Akademiyasının (AMEA) A.Bakıxanov adına Tarix İnstitutunun aparıcı elmi işçisi, tarix elmləri doktoru Vaqif Abışov “Bakı-Xəbər”ə bildirdi ki, bu gün artıq dünya reallığı bilir, hansı dövlətin işğalçı olduğunu, hansı dövlətin isə ərazilərinin işğal edildiyini aydın şəkildə görür. V.Abışov hesab edir ki, qondarma rejimlə imzalanmış “xartiya”nın daha birinin ləğv edilməsində, şübhəsiz, Azərbaycan dövlətinin apardığı uğurlu xarici siyasətin təsiri var. “Fransa məhkəməsinin belə bir qərar verməsində Azərbaycan dövlətinin məqsədyönlü, uğurlu xarici siyasət aparmasının təsiri, rolu şübhəsizdir. Dövlətimiz tərəfindən Dağlıq Qarabağ problemi ilə bağlı beynəlxalq ictimaiyyətdə belə bir təbliğat aparılmasaydı, yəqin ki, biz qondarma rejimlə Fransa şəhərləri arasında imzalanan “qardaşlaşma xartiyası”nın məhkəmə qərarı ilə ləğvinə nail ola bilməzdik. Erməni lobbisinin güclü olduğu, kök saldığı Fransada, bu ölkənin məhkəməsində separatçıların əleyhinə qərar qəbul edilməsi bizim xarici siyasətin uğurudur. Hesab edirəm ki, Fransa məhkəmələrinin qərarı ilə qondarma rejimlə bu ölkənin şəhərləri arasında bağlanan “qardaşlaşma sazişi”nin ləğv edilməsi prosesi digər xarici ölkələrdə də təkrarlana bilər. Fikrimcə, Fransadan sonra bu hal başqa ölkələrdə yaşanacaq. Ermənistanın işğalçılıq siyasətini açıq və gizlin şəkildə dəstəkləyən bir sıra ölkələrdə də bu “saziş”lərin pozulması gözləniləndir. Əgər Avropanın iri dövlətlərindən biri olan, eyni zamanda da erməni lobbisinin güclü şəkildə fəaliyyət göstərdiyi bir ölkədə bu baş verirsə, demək, başqa ölkələrdə də təkrarlana bilər”.

V.Abışov hesab edir ki, başqa dövlətlərdə də ermənilərin Azərbaycan torpaqlarını işğal etməsi, burada qondarma rejim yaratması, saxta “qardaşlaşma xartiyası” imzalaması pislənəcək.

İradə SARIYEVA

Son xəbərlər