Warning: opendir(/home/sites/bakixeber/cache/): failed to open dir: No such file or directory in /opt/php7/lib/php/Cache/Lite.php on line 642
Baki Xeber - News
21/11/2019 17:56
728 x 90

Azərbaycanda yeni müxalifət - tam yenidən yaranacaq, ya köhnələr transformasiya olunacaq...

Məhərrəm Zülfüqarlı: “Köhnələrin yeni qaydalara və ya şəraitə uyğun şəkildə transformasiya olunması mümkün deyil”

img

Azərbaycan Respublikası Prezidentinin ictimai-siyasi məsələlər üzrə köməkçisi Əli Həsənov bu günlərdə öz “Facebook” hesabından yayımladığı “Azərbaycana yeni müxalifət lazımdır: radikal və dağıdıcı müxalifətdən qurtuluşun zamanı yetişib” başlıqlı məqaləsində maraqlı məqamlara toxunub.

Məqalədə bildirilir ki, bu ölkədə yenilənmək istəməyənlər yalnız 26 ildir Azərbaycanı xaos və anarxiyaya sürükləyən radikal müxalifət cəbhəsinin rəhbərləridir: “Uzun illərdir heç bir cəlbedici ideya və yaxud alternativ təklif ortaya qoya bilməyən, eyni cəfəng fikirləri təkrar-təkrar tirajlayan, bir neçə ambisiyalı şəxsin ətrafında cəmləşərək gecə-gündüz hakimiyyət eşqi ilə qovrulan, əsassız iddialarla dövlət qurumları və dövlət qulluqçularını mənəvi terrora, biabırçı söyüş kampaniyasına məruz qoyan, Azərbaycan cəmiyyətini ənənəvi pozucu fəaliyyətləri ilə bezdirən, 1990-cı illərin kif bağlamış qaranlığından çıxmaq iqtidarında olmayanlar keçən bütün dövr ərzində dayanmadan ölkədə hakimiyyətin dəyişməsini tələb etmişlər. Əlbəttə, heç bir iqtidar daimi deyil. Hər hansı bir siyasi partiyanın formalaşdırdığı iqtidarın ölkəni hansı müddətdə idarə etməsini Azərbaycan xalqı seçki yolu ilə müəyyən edir. Bu il fevralın 18-də qələmə aldığım “Müxalifətçilik missiyası və Azərbaycanın milli maraqları” adlı məqaləmdə də qeyd etmişdim ki, cəmiyyətdəki fərqli kəsimlərin, o cümlədən, müxalifətin cari proseslərə, gələcəyə hesablanmış proqramlara, konsepsiyalara baxış və rəylərini öyrənmək, alternativ ideyaları dəyərləndirmək və yeri gələndə, ən azı, ehtiyat variant olaraq nəzərdə saxlamaq təkcə rasional idarəçilik baxımından deyil, həmçinin, hakimiyyətdə olan komandanın istənilən siyasi rəqabətə daim hazır formada qalması üçün vacib şərtdir”.

Əli Həsənov məqaləsinin sonunda radikal müxalifətin yenilənməyə ehtiyacının olduğuna işarə edir: “Bəli, bu gün Azərbaycanda hər şey inkişaf edir və yenilənir. Hətta müxalifətin əsas etiraz məkanı olan “Məhsul” stadionu da yenidən qurulur, təmir olunur və müasir görkəm alır. Amma 26 il müddətində radikal müxalifət düşərgəsində rəhbər kürsüləri zəbt edərək, sivil istefa nümunəsi ortaya qoymağı bacarmayan Əli Kərimli tipli “əvəzsiz liderlər” təmsil olunduqları düşərgədə istənilən pozitiv dinamikanı öz mövcudluqları üçün təhlükə hesab edirlər. Buna görə də xalq tərəfindən kütləvi şəkildə boykot olunmuş bu radikal və dağıdıcı müxalifət “liderlərindən” qurtuluşun tam zamanıdır. Dinamik inkişaf edən, müasirləşən Azərbaycana, yeniləşən cəmiyyətimizə, yenidən qurulan geniş meydanlara sağlam düşüncəli təşkilatlar, qurucu, konstruktiv və sağlam müxalif qüvvələrin gəlişi zamanın tələbidir”.

Əli Həsənovun məqaləsinin başlığı və məzmunundan da görünür ki, mövcud şərait ölkədə yeni müxalifətin ortaya çıxmasını şərtləndirir. Həmin yeni müxalifət necə yaranmalıdır? Bunun üçün ən optimal variant hansı sayıla bilər: tam yenidən müxalifətin yaradılması, yoxsa köhnələrin  yenidən transformasiya olunması?

  • “Yaxın zamanlarda yetişərək siyasi arenaya çıxacaq gənclər...”

Tarix elmləri doktoru, professor Məhərrəm Zülfüqarlı “Bakı-Xəbər”ə açıqlamasında bildirdi ki,  hörmətli Əli Həsənovu o olduqca uğurlu bir siyasətçi kimi xarakterizə edir: “Mən müşahidə etmişəm, o hamı ilə açıq təmas qurur, tədbirlərdə də yaxınlaşıb hər kəslə ayrı-ayrılıqda görüşür. Yəni belə vizionu olan adam tam doğrunu söyləyə bilər. Bundan əlavə, Əli Həsənov uzun müddətdir hakimiyyətdə məhz siyasi sahəni, partiyalarla münasibəti kurasiya edir. Onun bu sahə ilə bağlı zəngin bilgiləri və təcrübəsi mövcuddur. Əli müəllimin məlum məqaləsi də çoxları üçün demokratiya dərsi sayılmalıdır. Mən də razıyam ki, bu zehniyyətlə radikal müxalifət uzağa gedə bilməz. Təbii ki, onların yenilənməsinə ehtiyac var. Fikir verirsinizsə, partiyalara rəhbərlik edənlər postlarından elə bərk yapışıblar ki, onu kiməsə vermək istəmirlər. Onlar sıralarına cəlb etdikləri gəncləri də qaranlığa, zülmətə aparırlar. Məsələnin başqa aspekti isə budur ki, həmin adamlar xalqdan qida almırlar. Onlar xaricdən idarə olunurlar. Kənardan idarə olunan adamdan  yaxşı nəsə gözləmək olmaz. Çünki onları idarə edənlər heç vaxt ölkəmizdə əminamanlığın olmasını istəmirlər. Bu yenilənməni artıq tarixi şərait də zəruri edir. Artıq yalanlar da yerimir. Xalq görür ki, bunlar yerindən tərpənə bilmir. Ona görə də əsl xalqın içindən çıxan müxalifətin formalaşması ilə proses yenilənə bilər. Yəni köhnələrin yeni qaydalara və ya şəraitə uyğun şəkildə transformasiya olunması mümkün deyil. Yaxın zamanlarda yetişərək siyasi arenaya çıxacaq gənclər həmin boşluğu doldura biləcəklər. Onda bunlar öz-özlərinə səhnəni tərk edəcəklər. Çünki kiminsə diqtəsi ilə idarə olunan adamların transformasiya olunması mümkün deyil. Sağlam müxalifət bütün dövlətlərə lazım olduğu kimi, bizə də gərəkdir. Ancaq niyyəti, düşüncəsi sağlam olan müxalifətdən söhbət gedir. Əli müəllimin anonsunu verdiyi proses yaxın zamanlarda startını götürəcək”.

Məhəmmədəli QƏRİBLİ

Son xəbərlər