13/11/2019 15:51
728 x 90

Avropa Birliyinin 19 oktyabr aksiyasına ikili standart yanaşması - aşkar yalan...

Elşən Həsənov: “Biz çox istərdik ki, Aİ Dağlıq Qarabağla bağlı olan haqsızlıqlara belə operativ mövqe ortaya qoysun”

img

Məlum olduğu kimi, Bakının mərkəzində keçirilən icazəsiz aksiya ilə bağlı nəticələrə tələm-tələsik reaksiya verənlərdən biri də Avropa İttifaqı olub. Ancaq Azərbyacan XİN Avropa İttifaqının bəyanatına münasibətdə faktların təhrif olunduğunu bildirib.

Qurumun sözçüsü L.Abdullayeva deyib ki, qanunsuz aksiya keçirən şəxslərin əksəriyyəti rəsmi xəbərdarlıq edildikdən sonra sərbəst buraxılıb: “Azərbaycanda sərbəst toplaşma azadlığı təmin olunub. Milli Şuranın oktyabrın 8-də Bakı Şəhər İcra Hakimiyyəti ilə Azərbaycan Dövlət İqtisad Universitetinin inzibati binalarının arasında yerləşən ərazidə 50 nəfərin iştirakı ilə piket keçirməsi Bakı Şəhər İcra Hakimiyyəti ilə razılaşdırılıb. Buna baxmayaraq, onlar həmin ərazidə faktiki olaraq küçə yürüşü keçirməyə cəhd ediblər. “Sərbəst toplaşmaq haqqında” Qanunun 9-cu maddəsinin III hissəsinin 1-ci bəndinə əsasən, müvafiq ali hakimiyyət binalarının 200 metr radiusunda keçirildiyi təqdirdə, mitinqlər, nümayişlər, küçə yürüşləri qadağan oluna bilər. Milli Şuranın oktyabrın 19-da, saat 15-dən 17-dək mitinq keçirilməsi ilə bağlı müraciətinə Bakı Şəhər İcra Hakimiyyəti tərəfindən baxılıb. “Sərbəst toplaşmaq azadlığı haqqında” Qanunun 9-cu maddəsinin 3-cü hissəsinin 2-ci bəndinə əsasən, metropolitenin mühafizə zonalarında toplantıların keçirilməsi qadağan edildiyindən, Bakı Şəhər İcra Hakimiyyəti tərəfindən mitinqin qeyd olunan vaxtda Bakı şəhəri Lökbatan qəsəbəsi, 28 May küçəsindəki “Neftçi” idman klubunun Qaradağ təlim idman bazasında keçirilməsi təklif olunub. Buna baxmayaraq, şəhərin mərkəzi hissəsində qanunsuz aksiyanın keçirilməsinə cəhd olunub”.

XİN mətbuat xidmətinin rəhbəri nəzərə çatdırıb ki, polis qurumları tərəfindən qanunsuz aksiyanın qarşısı alınıb: “Polis kübar və mədəni davranış nümayiş etdirib, heç bir insan xəsarət almayıb. Avropa İttifaqı tərəfindən bu gün Barselonada baş verən hadisələrə, o cümlədən, dinc nümayişçilərə qarşı polis tərəfindən rezin güllələrdən istifadə olunması, mətbuat nümayəndələrinin döyülməsi, həddən artıq şiddətdən istifadə olunması hallarına nəzər yetirilməsi yaxşı olardı. Fransada aylar ərzində nümayişçilərə qarşı tətbiq olunan polis qəddarlığı bütün insani davranış normalarını aşıb. 11 nəfər öldürülüb, minlərlə insan xəsarət alıb. Gözlərini itirmiş, şikəst olmuş insanlar var. Təəssüf ki, bu kimi hallarda da ikili standartlar tətbiq edilir. Polisin mədəni davranışına xələl gətirilir. Avropa İttifaqı tərəfindən öz burnunun ucunda olan hadisələrə göz yumulur. Azərbaycanla bu dildə və tərzdə danışmağa icazə verilə bilməz”.

Rəsmi şəxsin verdiyi açıqlamadan görünür ki, Avropa İttifaqı bu məsələyə ikili standartla yanaşıb və ciddi təhrifə yol verib. Maraqlıdır ki, Ermənistanda baş verən aşkar qanun pozuntuları ilə bağlı biz Avropa İttifaqından belə operativlik görə bilmirik. Həmçinin, Avropanın özündə etirazların dağıdılması ilə bağlı tətbiq olunan zor hərəkətlərinə Strasburqun susqun mövqeyinin şahidi oluruq. Onda isə maarqlıdır, Avropa İttifaqının Azərbaycanla bağlı operativ, lakin yanlış reaksiyasını necə dəyərləndirmək olar?

  • “Təəssüf ki, qurum ikili standartların təsirindən uzaqlaşa bilmir”

Azərbaycan Sosialist Partiyasının sədri Elşən Həsənov “Bakı-Xəbər”ə açıqlamasında bildirdi ki, Avropa İttifaqının bu məsələdə də tələskənliyə yol verməsi başadüşüləndir: “Təəssüf ki, onlar əksər vaxtlarda ikili standartlarla məsələlərə yanaşırlar. Bunu bizim indiyə qədər gördüyümüz faktlar da aydın söyləyir. Ermənistanda Paşinyan meydanda insanları toplayıb inqilab edəndən sonra nələr yaşandı? Demək olar ki, zor gücünə özünü Baş nazir seçdirdi, Venesiya Komissiyasının bütün tövsiyələrini kənara atdılar. Baxın görün, Avropa Birliyi belə operativlik nümayiş etdiribmi? Görə bilməzsiniz. Çünki onlar Azərbaycanla bağlı əllərinə keçirmək üçün bir təzyiq mexanizmi axtarırlar. Bakıda nə baş verib? Hansısa siyasi təşkilat şəhərin mərkəzində icazəsiz etiraz aksiyası keçirmək istəyib. Polis asayişi qorumamalıdır? Avropanın özündə niyə bu kateqoriyadan olan adamların üstünə atla yeriyirlər? Niyə etirazçılara qarşı hətta odlu silahdan da istifadə olunur? Avropa Birliyi yaxşı olar ki, bu suallara cavab tapsın. Mən hakimiyyətin müdafiəçisi deyiləm. Mərkəzçi mövqedən olan bir partiyanın sədriyəm. Bizim də narazılıqlarımız var. Onları sosial şəbəkələrdə, görüşlərdə ifadə edirik. Ancaq hesab edirik ki, izdihamlı mitinq keçirməyə hələ yetərli gücümüz yoxdur. Elektoratına arxayın olmayan partiyalar belə addımlar ata bilər. Şəhərin mərkəzində mitinq təyin etmək o deməkdir ki, ora təsadüfi adamların daha şox toplaşmasını hədəfləyirlər. Ona görə də polis buna icazə vermir. Bu cür aksiyalar partiyaya heç bir dividend vəd etmir. Yaxşı olar ki, elektoratlarını artırmaq üzərində çalışsınlar. Avropa İttifaqı ilə Azərbaycanın rəsmi mövqeyinin üst-üstə düşməməsi sübut etdi ki, qurum aşkar yalana yol verib. Biz çox istərdik ki, Aİ Dağlıq Qarabağla bağlı olan haqsızlıqlara belə operativ mövqe ortaya qoysun. Təəssüf ki, qurum ikili standartların təsirindən uzaqlaşa bilmir”.

Məhəmmədəli QƏRİBLİ

Son xəbərlər