Məlum olduğu kimi, oktyabrın 20-də bir qrup feminist qadın Bakının Nizami küçəsində, “Torqovı” adlanan ərazidə aksiya keçirib. Aksiya iştirakçıları qadınlara qarşı zorakılıq edilməsini və qadınların qətlə yetirilməsini pisləyib, “Şiddətə susma!”, “Şiddətə dözmə!” şüarları səsləndiriblər.
Onlar Azərbaycanın məişət zorakılığına qarşı mübarizəni nəzərdə tutan İstanbul Konvensiyasına qoşulmasını tələb ediblər. Polis icazəsiz aksiyanın qarşısını alıb.
Aksiyada diqqətçəkən məqamlardan biri də iştirakçıların polisə münasibətdə sərgilədikləri əsassız aqressiv münasibət idi. Belə ki, açıq-aşkar polisi təxribata çəkməyə cəhd edilirdi. Məlum məsələdir ki, sözügedən aksiya icazəsiz olduğuna görə qanun keşikçiləri bunun qarşısını almalı idi. Polislər də qanunun onlara verdiyi səlahiyyətlər çərçivəsində bunu etdilər. Ancaq görüntülərə baxanda məlum olur ki, aksiya iştirakçıları qanunun tələblərinə əməl etmək əvəzinə, polisə qarşı aqressiv münasibət sərgiləyir, kobudluq göstərirlər. Sanki bəzi qadınların ailə-məişət zəminində zorakılığa, ayrıseçkiliyə məruz qalmasının günahkarı polisdir, guya polislərin üzündən hansısa qadınlar zorakılığa məruz qalır və s. Hansı ki, ölkə polisi bütün mümkün qanuni vasitələrlə qadınların hüquqlarının qorunmasına çalışır. Aksiyanın keçirilməsi icazəsiz olduğuna görə, təbii ki, polis bunun qarşısını almalı idi. Belə olan halda, polisə qarşı sərgilənən kobudluq və onları təxribata çəkmək cəhdi heç bir əndazəyə sığmır.
“Polisin qanundan irəli gələn tələblərə uyğun olaraq öz vəzifə öhdəliklərini yerinə yetirməsi bəzi dairələri narahat edir”
Sözügedən məsələ ilə bağlı fikirlərini “Bakı-Xəbər”lə bölüşən “Polisə Dəstək” İctimai Birliyinin sədri Şəmsəddin Əliyevin sözlərinə görə, bir qrup feminist qadının polisi təxribata çəkmək cəhdi heç bir məntiqə sığmır: “Bunun özü çox böyük kobud qanun pozuntusu idi. Tutaq ki, bununla bağlı cəmiyyətdə hansısa problemlər mövcuddur. O zaman polisin bunda nə günahı var? Məgər polis bu problemləri yaradır? Təbii ki, yox. Belə olduqda polisə qarşı bu aqressiyanın haradan qaynaqlanması haqda suallar yaranır. Bu, açıq-aşkar, onu göstərir ki, şüurlu şəkildə polisi təxribata çəkib imicinə kölgə salmaq istəyirlər. Çünki polisin qanundan irəli gələn tələblərə uyğun olaraq öz vəzifə öhdəliklərini yerinə yetirməsi bəzi dairələri narahat edir. Xüsusən də xaricdəki dairələri. O üzdən, belə təxribatlara əl atırlar. Digər tərəfdən, Azərbaycanda əvvəlki kimi ailə-məişət zəminində zorakılıqlar baş vermir. Yəni belə halların sayı xeyli azalıb. Bu gün icra strukturlarında, təhsil, səhiyyə sahələrində, hakimiyyətin digər strukturlarında kifayət qədər sayda qadın çalışır. Belə olan halda, sözügedən aksiyanı keçirməyə heç bir əsas yox idi. Azərbaycan polisinə sərgilənən o cür münasibət isə, açıq-aşkar, təxribat idi. Nəzərə almaq lazımdır ki, əhalinin polisə etimad və inamı artıb. Bunu tək biz demirik. Bir sıra beynəlxalq sənədlərdə də bu öz əksini tapıb. Belə görünür ki, bəzi dairələri bütün bunlar narahat edir. Onlar bunu həzm etmək istəmirlər. Ona görə də istəyirlər ki, qanunun tələbinə əməl olunmasın və polisi qarşıdurmaya təhrik edib hörmətdən salsınlar. Buna da nail ola bilməyəcəklər. Kimin nə deməsindən, necə davranmasından asılı olmayaraq, ölkə polisi qanun çərçivəsində öz işini görəcək”.
Vidadi ORDAHALLI
