Məlum olduğu kimi, Əli Kərimlinin rəhbəri olduğu AXCP və Cəmil Həsənlinin sədrlik etdiyi “Milli Şura” oktyabr ayının 19-da Bakının mərkəzində icazəsiz etiraz aksiyası keçirməyə cəhd edib. Qeyd edək ki, onlar bu addımı şəhərin mərkəzində icazəli etiraz aksiyası üçün yer verilmədiyi ilə izah etməyə çalışırlar.
Bakı meriyası aksiya keçirmək istəyənlərə Qaradağ rayon ərazisində yer ayırsa da, onlar bundan imtina edib, şəhərin mərkəzində xaos yaratmağı üstün sayıblar. Nəticədə etirazçılar polislə üz-üzə gəlməli olublar. Təbii ki, polis da asayişi pozanlarla bağlı lazımi ölçü götürməlidir. Polisin qanun çərçivəsində atdığı addımlar bəzi radikal dairələr tərəfindən zorakılıq, işgəncə kimi dəyərləndirilməyə çalışılır. Ancaq biz analoji vəziyyətlə bağlı ABŞ və Avropanın bəzi ölkələrində olan icazəsiz etiraz aksiyalarında polisin davranışlarına fikir versək görərik ki, Azərbaycan polisi həddən artıq humanist və təmkinli davranış ortaya qoyub. Dünya ölkələrində də icazəsiz aksiyalar, qanunsuz piketlər məqbul sayılmır. Dünyada, demokratik ölkələr sayılan əksər dövlətlərdə belə hallar zamanı necə davranmaqla bağlı çoxlu misal var. Bu cür aksiyalar, mitinqlər xaos yaratmaq kimi dəyərləndirilir.
Ötən ilin dekabrında Fransada qiymət artımına qarşı keçirilən “Sarı jiletlilər”in nümayişləri zamanı polisin vətəndaşlara zor tətbiq etməsinə aid çoxlu sayda foto jurnalistlərin obyektivinə düşüb.
2019-cu il mayın 1-də Parisdə 1 May münasibətilə keçirilən mitinqdə polis nümayişçilərə zor tətbiq edib.
Avropanın digər ölkəsi İtaliyada da polislər qanunsuz aksiyalar zamanı zor tətbiq edirlər.
Ümumiyyətlə, Avropa son illər polis zorakılığının ən çox tətbiq edildiyi regionlardan birinə çevrilib.
Bir neçə il öncə Frankfurt, London, Madrid, Lissabon kimi iri şəhərlər Avropa Mərkəzi Bankının fəaliyyətinə olan etiraz dalğalarından silkələnmişdi.
Buna görə Almaniyanın Frankfurt şəhərində “Blockupy” hərəkatı zamanı kütləvi aksiyalar təşkil edilirdi. Həmin zaman da polisin etirazçılarla sərt davranışına dair çoxlu sayda fakt var.
Hüquqşünas Mehman Muradlı “Bakı-Xəbər”ə bildirdi ki, Azərbaycan polisinin davranışları tam qanunauyğun idi: “Hətta mən deyərdim ki, bir qədər də humanist idi. Qanuna tabe olmayan vətəndaşın qolunu burub maşına salmaq nə vaxtdan işgəncə və ya vəhşilik sayılıb? Söhbət polisin xidmət borcundan gedirsə, ona uyğun davranıblar. Amma "Polis haqqında" Qanunu açıb oxusalar, özləri də görəcək ki, polisin işi cinayətkarlığa qarşı mübarizə ilə yanaşı, həm də əhalinin dincliyini təmin etmək, kütləvi iğtişaşların qarşısını almaqdır. Dünyanın hər yerində qayda belədir. Ona görə də oturub-durub polisi pisləmək lazım deyil. Pisləniləsi bir məqam varsa, o da aksiyanı şəhərin mərkəzinə salıb bütün hərəkəti iflic etmək, başqalarını da bu oyuna qatmaqdır”.
Biz Avropanın bəzi ölkələrində icazəsiz aksiyaların iştirakçıları ilə polisin rəftarına dair müqayisəli fotoları təqdim edirik, qoy baxanların özü nəticə çıxarsın və görsünlər ki, əslində, Azərbaycan polisi əsl humanizm nümayiş etdirib.
Məhəmmədəli QƏRİBLİ
